అప్పులోళ్లు గెంటేసిన మహిళకు సాయం.. రూ. లక్షల అప్పు తీర్చిన లులు ఛైర్మన్

తీవ్ర ఆర్థిక ఇబ్బందుల్లో ఉన్న ఓ మహిళకు ఆపన్నహస్తం అందించి మరోసారి తన గొప్ప మనసు చాటుకున్నారు లులు గ్రూప్ ఛైర్మన్ ఎంఏ యూసుఫ్ అలీ. ఆమె అప్పు తీర్చడమే కాదు.. జీవితంలో స్థిరపడేందుకు మరో రూ.10 లక్షలు ఆర్ధిక సాయం చేశారు. ఆయన చూపిన ఉదారతపై నెట్టింట ప్రశంసల జల్లు కురుస్తోంది. వివరాల్లోకి వెళ్తే.. కేరళలోని నార్ద్‌ పరవుర్‌కు చెందిన సంధ్య, ఆమె భర్త ఇంటి నిర్మాణం కోసం ఐదేళ్ల కిందట ఒక ప్రైవేటు సంస్థలో రూ. 4 లక్షల రుణం తీసుకున్నారు. కానీ, రెండేళ్ల తర్వాత పిల్లల్ని, ఆమెను వదిలేసి భర్త ఇంటి నుంచి వెళ్లిపోయాడు.

దాంతో కుటుంబపోషణ, పిల్లల బాధ్యత, ఆ అప్పు భారం మొత్తం ఆమెపై పడింది. ఓ దుస్తుల దుకాణంలో పనిచేస్తూ పిల్లలను పోషిస్తోంది. కానీ, సకాలంలో వాయిదా చెల్లించలేకపోవడంతో వడ్డీతో కలిపి రూ.8 లక్షలైంది. ఆ మొత్తం చెల్లించాలని రుణం ఇచ్చిన సంస్థ ఒత్తిడి చేసింది. నాలుగుసార్లు హెచ్చరించిన సదరు సంస్థ.. తర్వాత చట్టపరమైన చర్యలు ప్రారంభించింది. ఇటీవల ఆమె పనికి వెళ్లిన తర్వాత రుణం ఇచ్చిన సంస్థ ఆ ఇంటిని స్వాధీనం చేసుకుంది. ఆ విషయం తెలిసిన ఆమె.. తన సామాన్లు తీసుకుంటామని అభ్యర్థించినా వారు మాత్రం కనికరించలేదు.

దాంతో ఆమె, పిల్లలు కట్టుబట్టలతో నడి రోడ్డుపై నిలబడాల్సి వచ్చింది. ఈ వ్యవహారం స్థానికుల్లో తీవ్ర ఆగ్రహం తెప్పించింది. రుణం ఇచ్చిన సంస్థపై మండిపడ్డారు. ఈ వ్యవహారం మీడియాలో ప్రసారం కావడంతో విషయం లులు అధినేత యూసఫ్ అలీ దృష్టికి చేరింది. సంధ్య పరిస్థితి తెలిసి చలించిపోయారు. వెంటనే తన సిబ్బందిని పంపి రుణం మొత్తం చెల్లించి ఇంటిని తిరిగి ఇప్పించారు. అంతేకాదు, ఆమెకు రూ.10 లక్షల ఆర్థిక సహాయం కూడా చేశారు. లులు గ్రూప్‌ మీడియా ప్రతినిధి ఆమెకు ఇంటి తాళం చెవి అందజేశారు.

కష్టంలో ఉన్న ఆమెను ఆదుకుని, ఈ బిలియనీర్ చేసిన సహాయం ప్రతిఒక్కరినీ కదిలించింది. దీనిపై సంధ్య మీడియాతో మాట్లాడుతూ.. దుర్బర స్థితి నుంచి తన కుటుంబాన్ని బయటపడేసిన యూసఫ్ అలీకి కృతజ్ఞతలు తెలియజేశారు. ఆయన మాకు చేసిన ఈ సాయాన్ని జీవితాంతం గుర్తుపెట్టుకుంటామని కన్నీటిపర్యంతమ్యారు.

ఇటీవల కాలంలో లులు ఛైర్మన్ స్టోరీలు సోషల్ మీడియాలో తెగ వైరల్ అవుతున్నాయి. ఎప్పటికప్పుడు తన అభిమానులకు సర్‌ప్రైజ్‌లు ఇస్తూ, ఖరీదైన కానుకలు ఇచ్చి ఆశ్చర్యంలో ముంచెత్తుతున్నారు. ఇటీవల ఒక అభిమానికి ఖరీదైన ర్యాడో వాచ్‌‌ను బహుమతిగా ఇచ్చారు. అతడ్ని తన ఆఫీసుకు పిలిపించి.. చేతికి వాచ్‌ను తొడిగడంతో అతడు షాకయ్యాడు. అలాగే ఒక యువతి తనతో సెల్ఫీ తీసుకోవడానికి ప్రయత్నిస్తుండటం గమనించిన ఆయన.. ఆమె దగ్గరకు వచ్చి, నవ్వుతూ సరదాగా ఫోటోకు పోజులు ఇచ్చిన విషయం తెలిసిందే.