రైలు నుంచి జారిపడిన చిన్నారిని అర్ధరాత్రి శ్రమించి.. రైల్వే పోలీసులు కాపాడిన ఘటన ఉత్తర్ప్రదేశ్లో చోటు చేసుకుంది. చిన్నారికి గాలి కోసం ఎమర్జెన్సీ కిటికీ వద్ద ఉంచగా.. తండ్రి చేతుల్లో నుంచి జారిపోయి కింద పడిపోయింది. వెంటనే బాలిక తండ్రి రైల్వే పోలీసులకు ఫిర్యాదు చేయగా.. అర్ధరాత్రి పూట.. రైలు పట్టాల వెంబడి 16 కిలోమీటర్లు నడిచి.. ఆ బాలికను రక్షించారు. ఉత్తర్ప్రదేశ్లో ఆదివారం రాత్రి జరిగిన ఈ సంఘటన.. ఆలస్యంగా వెలుగులోకి వచ్చింది. రైల్వే పోలీసులు, ఉత్తర్ప్రదేశ్ పోలీసులు కలిసి నిర్వహించిన ఈ సెర్చ్ ఆపరేషన్ విజయవంతం కాగా.. దీనికి సంబంధించిన వీడియోను యూపీ పోలీసులు సోషల్ మీడియాలో పోస్ట్ చేయడంతో తెగ వైరల్ అవుతోంది.
మధ్యప్రదేశ్కు చెందిన ఓ కుటుంబం.. ఉత్తర్ప్రదేశ్లోని మథురకు వెళ్లేందుకు రైలు ఎక్కింది. ఈ క్రమంలోనే ఆదివారం రాత్రి.. రైలు వేగంగా ప్రయాణిస్తుండగా.. ఎమర్జె్న్సీ కిటికీ వద్ద కూర్చున్న 8 ఏళ్ల బాలిక.. ప్రమాదవశాత్తు.. ఆ కిటికీలో నుంచి బయటపడింది. అది గమనించిన ఆ బాలిక తండ్రి.. తర్వాత వచ్చిన లలిత్పూర్ రైల్వే స్టేషన్లో ఉన్న రైల్వే ప్రొటెక్షన్ ఫోర్స్కు ఫిర్యాదు చేశాడు. దీంతో వేగంగా స్పందించిన ఆర్పీఎఫ్, ఝాన్సీ జీఆర్పీ పోలీసులు.. ఆ రైలు ప్రయాణించిన మార్గంలో వెతుక్కుంటూ వెళ్లారు. ఈ క్రమంలోనే రాత్రి పూట చిమ్మ చీకట్లో 16 కిలోమీటర్లు గాలింపు చేపట్టి.. చివరికి చెట్ల పొదల్లో పడిపోయిన బాలికను గుర్తించారు.
ఈ పోలీసులు మొత్తం 4 టీమ్స్గా విడిపోయి.. సెర్చ్ ఆపరేషన్ చేపట్టగా.. ఆ బాలిక స్పృహ తప్పి కనిపించింది. అయితే ఆ ప్రాంతం నుంచి బాలికను తీసుకువెళ్లేందుకు ఎలాంటి రోడ్డు మార్గం లేకపోవడంతో ఆ మార్గంలో వెళ్తున్న గూడ్స్ రైలను ఆపి.. హుటాహుటిన లలిత్పూర్కు తరలించి.. అక్కడ ఆస్పత్రిలో చేర్పించి చికిత్స అందించారు. ప్రస్తుతం ఆ చిన్నారి పరిస్థితి క్షేమంగానే ఉన్నట్లు డాక్టర్లు తెలపడంతో అంతా ఊపిరిపీల్చుకున్నారు. ఈ సందర్భంగా తన కుమార్తెను అర్ధరాత్రి పూట కాపాడిన రైల్వే పోలీసులకు ఆ చిన్నారి తల్లిదండ్రులు కృతజ్ఞతలు తెలిపారు.
ఇక దీనికి సంబంధించిన వీడియో యూపీ పోలీసులు.. సోషల్ మీడియాలో షేర్ చేయడంతో ప్రశంసల జల్లు కురుస్తోంది. ఇక ఆ వీడియో సోషల్ మీడియాలో తెగ వైరల్గా మారడంతో.. నెటిజన్లు కొనియాడుతున్నారు. పోలీసులు, అధికారులు.. టీమ్ వర్క్తో ఆ బాలిక ప్రాణాలను రక్షించారని పేర్కొంటూ.. వారిని రియల్ హీరోలు అంటూ ఆకాశానికి ఎత్తేస్తున్నారు. దీంతో కామెంట్లు, లైక్లు, షేర్లతో ఆ వీడియో తెగ హల్చల్ చేస్తోంది.