హరికేన్లు అమెరికా ఆర్థిక వ్యవస్థపై తీవ్ర ప్రభావం చూపాయి. ఇప్పటికే వరుసగా వచ్చిన హార్వే, ఇర్మాల కారణంగా అగ్రరాజ్యం భారీగా నష్టపోయింది. ఈ నష్టం మరింత పెరగవచ్చని నిపుణులు అంచనా వేస్తున్నారు. ఈ రెండు హరికేన్ల కారణంగా ఇప్పటి వరకు అమెరికా అక్షరాల 290 బిలియన్ డాలర్లు( రూ.18లక్షల కోట్లు) నష్టపోయింది. ఇది ఆ దేశ స్థూల జాతీయోత్పత్తిలో 1.5శాతానికి సమానం. ఇందులో ఇర్మా కారణంగా ఇప్పటికే 100 బిలియన్ డాలర్ల నష్టం వాటిల్లింది. ఇది భవిష్యత్తులో మరింత పెరగవచ్చు. ఇటీవల వచ్చిన హార్వే హరికేను అమెరికా చరిత్రలోనే అత్యంత నష్టదాయకమైంది. ఈ హరికేను కారణంగా 190 బిలియన్ డాలర్ల నష్టం వాటిల్లింది. ఇది అమెరికా జీడీపీలో ఒక శాతానికి సమానం. ప్రస్తుతం అమెరికా స్థూల జాతీయోత్పత్తి 19 ట్రిలియన్ డాలర్లు. ఈ విషయాన్ని ఆక్యూ వెదర్ అనే వాతావరణ సంస్థ తెలిపింది. వ్యాపార నష్టాలు, కోల్పోయిన ఉద్యోగాలు, దెబ్బతిన్న రవాణ , మౌలిక వసతుల, పంటనష్టం, ఇంధన ధరల పెరుగుదల, దెబ్బతిన్న ఇళ్లు, కోల్పోయిన విలువైన పత్రాల ఆధారంగా ఈ నష్టాన్ని లెక్కగట్టారు. వీటిల్లో అతితక్కువ మొత్తాన్ని మాత్రమే బీమా సంస్థలు భర్తీ చేస్తాయి.