పంజాబీ గాయకుడు సిద్ధూ మూసేవాలా హత్య కేసులో ప్రధాని నిందితుడైన గ్యాంగ్స్టర్ గోల్డీబ్రార్ను (Goldy Brar) అమెరికాలో గుర్తుతెలియని వ్యక్తులు కాల్చిచంపినట్టు జరుగుతోన్న ప్రచారాన్ని అక్కడి పోలీసులు ఖండించారు. కాలిఫోర్నియాలో జరిగిన కాల్పుల ఘటనలో చనిపోయిన వ్యక్తి గోల్డీబ్రార్ కాదని స్పష్టం చేశారు. హోల్ట్అవెన్యూలో మంగళవారం సాయంత్రం గుర్తుతెలియని వ్యక్తులు జరిపిన కాల్పుల్లో ఒకరు చనిపోయారని, అతడు కేంద్రంగా పనిచేసే గ్యాంగ్స్టర్ గోల్డీబ్రార్ అంటూ స్థానిక మీడియాలో వార్తలు ప్రసారమయ్యాయి. దీనికి సంబంధించిన వీడియోలు ఇవేనంటూ సోషల్ మీడియాలో కొన్నింటిని వైరల్ చేశారు.
అయితే, చివరికి పోలీసులు రంగంలోకి దిగి విచారణ చేపట్టడంతో అసలు విషయం బయటపడింది. ఈ ఘటనలో చనిపోయిన వ్యక్తి గోల్డీబ్రార్ కాదని ఫ్రెస్నో పోలీస్ విభాగం అధికారి లెఫ్టినెంట్ విలియం జే డూలే తెలిపారు. సోషల్ మీడియాలో వైరల్ అవుతోన్న ఆ వీడియోలు కాలిఫోర్నియా కాల్పుల ఘటనకు సంబంధించినవి కాదని, పాతవని చెప్పారు. ‘ఆన్లైన్లో జరుగుతోన్న ప్రచారం నమ్మి మృతుడు గోల్డీబ్రార్ అనుకుంటే కచ్చితంగా తప్పే.. అది పూర్తి అవాస్తవం. మా డిపార్ట్మెంట్కు ప్రపంచం నలుమూలల నుంచి ఎంక్వైరీలు వస్తున్నాయి. అసలు ఇలాంటి వదంతులు ఎలా మొదలయ్యాయో తెలియదు. ఈ కాల్పుల ఘటనలో మరణించింది 37 ఏళ్ల జేవియర్ గాల్డ్నె’ అని పేర్కొన్నారు.
కాలిఫోర్నియాలోని ఫ్రెస్నోలోని ఒక క్లబ్లో గ్యాంగ్స్టర్ గోల్డీ బ్రార్ అతడి అనుచరులు పవిత్ సింగ్, జగ్గూ భగ్నపురియాలు కొందరితో గొడవపడ్డారని సోషల్ మీడియాలో వైరల్ అవుతున్న కథనం తెలిపింది. ఈ సమయంలో సమయంలో జరిగిన కాల్పుల్లో బ్రార్ మరణించాడని పుకార్లు వ్యాపించాయి. ఈ హత్యకు గ్యాంగ్స్టర్ అర్ష్ దల్లా బాధ్యత వహించినట్లు ఆరోపణలు వచ్చాయి. చివరకు పోలీసులు విచారణలో అసలు విషయం బయటపడింది.
గోల్డీ బ్రార్గా ప్రచారంలో ఉన్న సతీందర్ సింగ్ భారత్లో మోస్ట్వాంటెడ్ క్రిమినల్. లారెన్స్ బిష్ణోయ్ గ్యాంగ్లో అత్యంత కీలకమైన సభ్యుడిగా ఉన్న బ్రార్ పేరు.. 2022లో జరిగిన సిద్ధూ మూసేవాల హత్య కేసులో ఒక్కసారిగా మార్మోగింది. అలాగే, బాలీవుడ్ నటుడు సల్మాన్ ఖాన్ ఇంటి వద్ద కాల్పులు ఘటనలో కూడా గోల్డీబ్రార్ పేరు వినిపించింది. ఈ కేసులో పోలీసులు అరెస్ట్ చేసిన అనూజ్ తపన్ అనే నిందితుడు పోలీసు కస్టడీలో ఆత్మహత్యకు పాల్పడ్డాడు.