ఓ అబద్దం తో రాష్ట్రమంతా లాక్ డౌన్
international | Suryaa Desk | Published : Sun, Nov 22, 2020, 11:25 AM
ఓ పిజ్జా డెలివరీ బాయ్ తాను చేస్తోన్న ఉద్యోగం గురించి బయటకు చెప్పుకోలేక ఓ అబద్ధం ఆడడంతో ఆస్ట్రేలియాలోని ఓ రాష్ట్రమంతా కలకలం చెలరేగింది. సౌత్ ఆస్ట్రేలియాలోని ఆడిలైడ్‌లో విదేశీయులు ఐసోలేషన్‌లో ఉండే ఓ హోటల్లో ఓ వ్యక్తి పనిచేస్తున్నాడు. అతడికి ఇటీవల కరోనా నిర్ధారణ అయింది. దీంతో ఆ హోటల్లో ఉంటోన్న విదేశీయులు ఆందోళన చెందారు.
కరోనా చైన్ ను అరికట్టే పనిలో భాగంగా అతడు ఎక్కడికి వెళ్లాడనే విషయాన్ని అధికారులు తెలుసుకోవాలానుకున్నారు. అతడు ఎవరెవరిని కలిశాడు వంటి విషయాలపై ఆరా తీశారు. దీంతో తాను ఓ ప్రముఖ పిజ్జా బార్‌లో పిజ్జా కొనడానికి వెళ్లాలని చెప్పాడు. ఆ షాపులోని వారికి కూడా కరోనా వచ్చే అవకాశం ఉందని చెప్పాడు.
దీంతో అతడికి ఎవరి నుంచి కరోనా సోకిందో తెలుసుకునే వీలు లేకపోవడంతో ఆ రాష్ట్రంలో సెకండ్ వేవ్ కరోనా వ్యాప్తి చెందకుండా లాక్‌డౌన్ విధించారు. అధికారులు ఆ కేసును ట్రేస్ చేసే క్రమంలో ఓ విషయం తెలుసుకుని షాక్ అయ్యారు. కరోనా సోకిన ఆ వ్యక్తి ఓ పిజ్జా పార్లర్‌లో పార్ట్ టైమ్ జాబ్‌ చేస్తున్నట్లు గుర్తించారు.
పిజ్జా డెలివరీ బాయ్‌గా తాను చేస్తోన్న ఉద్యోగాన్ని చెప్పుకోవడానికి అతడు సిగ్గుపడి పిజ్జా కొనడానికి వెళ్లానని అసత్యం చెప్పాడని నిర్ధారించుకున్నారు. చివరకు పిజ్జా పార్లర్‌లో పనిచేసే ఓ సెక్యూరిటీ గార్డు వల్ల అతడికి కరోనా వైరస్ సోకినట్లు అధికారులు తేల్చారు. దీంతో వెంటనే లాక్‌డౌన్‌ను రద్దు చేశారు. అతడు చెప్పిన అబద్ధం రాష్ట్రం మొత్తం అలజడి రేపిందని అధికారులు ఆగ్రహం వ్యక్తం చేశారు.
|
|