ఓటరు లిస్టులో పేరు లేదా?.. డోంట్ వర్రీ.. అయినా ఓటు వేయొచ్చు

ప్రస్తుతం రెండు రాష్ట్రాలలో ఎన్నికల హడావిడి నడుస్తోంది. ఏపీలోని 175 అసెంబ్లీ స్థానాలు, 25 లోక్ సభ నియోజకవర్గాలకు మే13న ఎన్నికలు జరగనున్నాయి. అలాగే తెలంగాణలోని 17 లోక్ సభ నియోజకవర్గాలకు మే 13న పోలింగ్ జరగనుంది. ఈ నేపథ్యంలో ఓట్ల పండుగలో పాల్గొనేందుకు ఇప్పటికే అందరూ తమ సొంత ఊర్లకు సిద్ధమయ్యారు. ఓట్ల పండుగలో పాల్గొనేందుకు ఉత్సాహంగా పోలింగ్ కేంద్రాలకు వెళ్లే జనం.. ఒక్కోసారి నిరుత్సాహపడే అవకాశం ఉంది. ఎందుకంటే ఓటర్ల జాబితాలో తమ పేరు కనిపించకపోతే వారు కంగారుపడే అవకాశం ఉంది. కానీ ఓటర్ లిస్టులో పేరు లేకపోయినా ఓటు వేయొచ్చని మీకు తెలుసా..?

ప్రజాస్వామ్య వ్యవస్థలో అత్యంత కీలకమైనవి ఎన్నికలు. ఈ ఎన్నికల్లో అర్హులైన ప్రతి ఒక్కరూ తమ ఓటుహక్కు వినియోగించుకునేందుకు ఎన్నికల సంఘం చర్యలు తీసుకుంటుంది. ఈ క్రమంలోనే ఓటరు జాబితాలో పేరు లేకపోయినా.. ఏదైనా కారణంతో ఓటర్ లిస్టు నుంచి పేరు తొలగించినా.. అలాంటి వారికి ఓటు వేసేందుకు ఎన్నికల సంఘం మరో అవకాశం కల్పిస్తోంది. అదెలాగంటే.. ఓటరు జాబితా రూపకల్పన సమయంలో బీఎల్‌వోలు, ఇతర ఎన్నికల సిబ్బంది ఇళ్లవద్దకు క్షేత్రస్థాయి పరిశీలనకు వస్తుంటారు. అలాంటి సమయంలో మనం ఇంటివద్ద లేకపోయినా.. ఉపాధి కోసం వేరే ప్రాంతాలకు వలస వెళ్లి పరిశీలన సమయంలో అందుబాటులో లేకపోయినా.. అలాంటి వారిపేర్లు జాబితా నుంచి తొలగించే అవకాశం ఉంది.

అయితే ఇలా క్షేత్రస్థాయి పరిశీలన సమయంలో లేనివారి పేర్లను ఆబ్సెంటీ, షిఫ్టెడ్ అండ్ డూప్లికేట్ ఓటర్స్ (ASD) లిస్టులో అధికారులు చేర్చుతారు. ఈ లిస్టును అన్ని పోలింగ్ కేంద్రాలకు అందజేస్తారు. ఈ నేపథ్యంలో ఓటరు లిస్టులో కనుక మీ పేరు లేకపోతే.. పోలింగ్ రోజును మీరు ఎన్నికల ప్రిసైడింగ్ అధికారిని సంప్రదించాలి. ప్రిసైడింగ్ ఆఫీసర్ వద్ద ఉన్న ఏఎస్డీ లిస్టులో మీపేరు ఉందో లేదో చెక్ చేసుకోవాలి. ఒకవేళ ఆ లిస్టులో కనుక మీ పేరు ఉంటే.. గుర్తింపు కార్డుల ఆధారంగా ప్రిసైడింగ్ అధికారి మీ ఐడెంటిటీని నిర్థారించుకుంటారు.

ఆ తర్వాత మీ పేరును ఫారం 17లో నమోదు చేసి, మీ నుంచి సంతకం, వేలిముద్ర తీసుకుంటారు. ఆ తర్వాత ఎన్నికల అధికారి మీ పేరును పోలింగ్ కేంద్రంలో ఉన్న ఏజెంట్లకు గట్టిగా అనౌన్స్ చేస్తారు. ఆ తర్వాత మీ నుంచి నిర్ధిష్టమైన ఫార్మాట్లో డిక్లరేషన్ తీసుకుంటారు. అలాగే మీ ఫోటో, వీడియో కూడా తీసుకుంటారు. ఆ తర్వాత మీకు ఓటేసేందుకు ఆవకాశం ఇస్తారు. అయితే ఏఎస్డీ లిస్టులో పేరు ఉంటేనే ఇలా ఓటు వేసేందుకు ఆఖరి అవకాశం ఉంటుంది. ఏఎస్డీ లిస్టులో కూడా పేరు లేకపోతే మీకు ఓటేసేందుకు అవకాశం ఉండదు.