ఏపీలో శనివారం పిడుగులతో కూడిన వర్షాలు.. విపత్తుల నిర్వహణ సంస్థ హెచ్చరిక

ఏపీలో మరో నాలుగు రోజుల పాటు వర్షాలు కురవనున్నాయి. మే నెల మొదటి వారం వరకూ ఏపీవ్యాప్తంగా గరిష్ట ఉష్ణోగ్రతలు నమోదుకాగా.. అప్పటి నుంచి అక్కడక్కడా వర్షాలు కురుస్తూనే ఉన్నాయి. ద్రోణి ప్రభావంతో కురుస్తున్న వర్షాలతో మండే ఎండల నుంచి ఏపీవాసులు ఉపశమనం పొందుతున్నారు. తాజాగా మరో నాలుగు రోజులపాటు వర్షాలు పడే అవకాశం ఉందని వాతావరణ శాఖ వెల్లడించింది. రాయలసీమ, అలాగే ఉత్తర తమిళనాడు మీదుగా ఆవర్తనం కొనసాగుతున్నట్లు ఏపీ విపత్తుల నిర్వహణ సంస్థ తెలిపింది. అలాగే ఛత్తీస్‌ఘఢ్ నుంచి కొమోరిన్ ప్రాంతం వరకూ ద్రోణి విస్తరించి ఉందని.. వీటి ప్రభావంతో వచ్చే నాలుగు రోజులు ఏపీలో అక్కడక్కడా పిడుగులతో కూడిన తేలికపాటి నుంచి మోస్తారు వర్షం కురిసే అవకాశం ఉందని ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ తెలిపారు.

శనివారం అల్లూరి సీతారామరాజు, ప్రకాశం, నెల్లూరు, కర్నూలు, నంద్యాల, అనంతపురం, శ్రీ సత్యసాయి, వైయస్ఆర్, అన్నమయ్య, చిత్తూరు, తిరుపతి జిల్లాల్లో అక్కడక్కడా పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని తెలిపారు. మన్యం, గోదావరి జిల్లాలు, కోనసీమ, ఏలూరు, కృష్ణా, ఎన్టీఆర్, గుంటూరు, పల్నాడు, బాపట్ల జిల్లాల్లో అక్కడక్కడ పిడుగులతో కూడిన తేలికపాటి వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది. శుక్రవారం సాయంత్రం ఆరు గంటల వరకూ సత్యసాయి జిల్లా నంబులపూలకుంటలో 84 మి..మీ.., బాపట్ల జిల్లా చెరుకుపల్లిలో 78మిమీ వర్షపాతం నమోదైనట్లు వెల్లడించింది. రాష్ట్రవ్యాప్తంగా శుక్రవారం 55 ప్రాంతాల్లో వర్షం పడినట్లు ఏపీ విపత్తుల నిర్వహణ సంస్థ తెలిపింది.

పిడుగులు పడే అవకాశం ఉన్న నేపథ్యంలో ప్రజలకు ఏపీ విపత్తుల నిర్వహణ సంస్థ పలు సూచనలు చేసింది. చెట్ల కింద ఉండొద్దని సూచించింది. అలాగే రైతులు, పశువుల కాపరులు జాగ్రత్తలు తీసుకోవాలని తెలిపింది. మే21 వరకూ వర్షాలు కురవడనుండగా.. ఆ తర్వాత పగటి పూట ఉష్ణోగ్రతలు సాధారణం కంటే అధికంగా నమోదయ్యే అవకాశం ఉందని వాతావరణ శాఖ ఇప్పటికే వెల్లడించింది.