తండ్రికి ఆసరాగా నిలిచిన భారత అథ్లెట్

ఆమె భారత జూనియర్ రన్నర్. ఇప్పటికే అంతర్జాతీయ స్థాయిలో పతకాలు కూడా గెలిచింది. కిందటేడాది జరిగిన దక్షిణాసియా జూనియర్ అథ్లెటిక్స్‌లో 3000 మీటర్ల విభాగంలో బంగారు పతకం సాధించింది. కానీ, మన దేశంలో అథ్లెట్లు ఎన్ని పతకాలు గెలిచినా క్రికెటర్లకు వచ్చినంత ఆదాయం రాదు కదా! అందుకే ఇప్పటికీ ఆమె కుటుంబ సభ్యులు ఆర్థిక ఇబ్బందులను ఎదుర్కొంటున్నారు. తన సోదరి వివాహం చేయడానికి డబ్బులు లేక ఇబ్బంది పడుతోన్న తండ్రికి సాయం చేయడానికి తానే డబ్బు సంపాదించాలని ఆ అథ్లెట్ నిర్ణయించుకుంది. దేశంలో జరిగే మారథాన్లలో పాల్గొంటూ ప్రైజ్ మనీని తండ్రికి అందజేస్తోంది.
ఇంతకీ ఆ యువ రన్నర్ పేరు పూనమ్ సొనునె. మహారాష్ట్రలోని బుల్ధానా జిల్లా సగ్వాన్ గ్రామానికి చెందిన ఈమె ఒక సాధారణ రైతు బిడ్డ. తండ్రి ఆదాయం అంతంత మాత్రమే. అయినప్పటికీ పాఠశాలలో చదువుకునే రోజుల్లో అథ్లెటిక్స్‌లో పూనమ్ ప్రతిభను చూసి తండ్రి పోత్రహించారు. తన కూతురిని మంచి అథ్లెట్‌ను చేయాలనే ఉద్దేశంతో నాసిక్‌లోని విజయేంద్ర సింగ్ అనే కోచ్ దగ్గరకు పంపారు. తొలినాళ్లలో అక్కడా ఇక్కడా అప్పు చేసి కుమార్తెకు డబ్బు పంపేవారు. ఆ తరవాత విజయేందర్ సింగ్ చొరవ తీసుకుని కార్పోరేట్ సోషల్ రెస్పాన్స్‌బిలిటీ(సీఎస్ఆర్) ద్వారా పూనమ్‌కు సహాయం అందించారు. ఆయన శిక్షణలో పూనమ్ మంచి అథ్లెట్‌గా ఎదుగుతోంది.
ఇదిలా ఉంటే, పూనమ్ అక్కకు ఇటీవల ఆమె తండ్రి పెళ్లి కుదిర్చారు. పెళ్లి అయితే కుదిరింది కానీ, వివాహం జరిపించడానికి అవసరమయ్యేంత డబ్బు పూనమ్ తండ్రి దగ్గర లేదు. పెళ్లి కోసం మళ్లీ అప్పు చేయాల్సిందే. కానీ, తన తండ్రి మళ్లీ అప్పు చేయకూడదని పూనమ్ భావించింది. తండ్రికి ఆర్థికంగా సాయం చేయాలని నిర్ణయించుకుంది. దీని కోసం పూణేలో జరిగిన హాఫ్ మారథాన్‌లో పాల్గొంది. ఈ మారథన్‌లో విన్నర్‌గా నిలిచి రూ.1.25 లక్షల నగదు బహుమతిని అందుకుంది. ఈ మొత్తాన్ని తన అక్క పెళ్లి కోసం తండ్రికి అందించింది.
అక్క పెళ్లి కోసం డబ్బయితే సంపాదించగలిగింది కానీ.. వివాహాన్ని మాత్రం పూనమ్ చూడలేకపోతోంది. దీనికి కారణం ఈ ఏడాది దక్షిణాసియా గేమ్స్‌కు ఎంపిక కావడమే. మార్చి 9 నుంచి నేపాల్‌ రాజధాని కాఠ్మండులో సౌత్ ఏసియన్ గేమ్స్ 2019 ప్రారంభంకానున్నాయి. ఈ గేమ్స్‌లో భారత్ తరఫున పూనమ్ రంగంలోకి దిగుతోంది. కాగా, తమకు సొంత ఇల్లు లేదని.. మారథాన్లలో పాల్గొనడం ద్వారా డబ్బు సంపాదించి తన కుటుంబం కోసం ఇంటిని నిర్మిస్తానని పూనమ్ చెబుతోంది.