పీపీఎఫ్ ఖాతాదారులకు అలర్ట్.. ఈ పొరపాటు చేస్తే మీ ఖాతా బ్లాక్.. మళ్లీ యాక్టివేట్ చేసుకోవడమెలా?

చిన్న మొత్తాల పొదుపు పథకాల్లో పబ్లిక్ ప్రావిడెంట్ ఫండ్ (పీపీఎఫ్) ఒకటి. మంచి వడ్డీ రేటుతో ఆదాయం హామీ ఇస్తున్న క్రమంలో ఈ పథకానికి మంచి ఆదరణ లభిస్తోంది. ఈ పథకంలో 15 ఏళ్ల పాటు పెట్టుబడి పెట్టేందుకు వీలుంటుంది. ఈ పెట్టుబడులపై పన్ను ప్రయోజనాలు ఉంటాయి. దీర్ఘకాలికంగా మంచి రాబడి కోరుకునే వారికి ఈ స్కీమ్ బెస్ట్ ఆప్షన్. మెచ్యూరిటీ తర్వాత 5 ఏళ్ల చొప్పున పొడిగించుకోవచ్చు. ఈ పథకంలో ప్రస్తుతం వడ్డీ రేటు 7.1 శాతంగా ఉంది. అయితే, పీపీఎఫ్ ఖాతాదారులు కొన్ని నిబంధనలు తెలుసుకోవాలి. చిన్న చిన్న పొరపాట్లతో ఖాతా బ్లాక్ అయ్యే ప్రమాదం ఉంది. మరి ఏదైనా కారణంతో పీపీఎఫ్ అకౌంట్ ఇనాక్టివ్ గా మారితే ఎలా రీయాక్టివేట్ చేసుకోవాలో ఇప్పుడు మనం తెలుసుకుందాం.

పీపీఎఫ్ ఖాతాలో వార్షికంగా కనీసం రూ.500 నుంచి పెట్టుబడి పెట్టవచ్చు. గరిష్ఠంగా రూ.1.5 లక్షల వరకు ఇన్వెస్ట్ చేయవచ్చు. అయితే, ఏదైనా కారణం చేత ఇందులో కనీసం వార్షిక కంట్రిబ్యూషన్ రూ.500 కూడా జమ చేయలేని సందర్భంలో మీ ఖాతా ఇనాక్టివ్ గా పరిగణిస్తారు. ఆర్థిక ఏడాది ఏప్రిల్ 1 నుంచి మార్చి 31 మధ్య కనీస మొత్తం జమ చేయని సందర్భంలో ఇనాక్టివ్ ఖాతాగా వర్గీకరిస్తారు. ఇనాక్టివ్ ఖాతాల్లోని డబ్బులకు వడ్డీ చెల్లించరు. విత్ డ్రా చేసుకునేందుకు అవకాశం ఉండదు. చాలా నష్టపోవాల్సి వస్తుంది. పీపీఎఫ్ ఖాతా బ్లాక్ అయిన తర్వాత నిర్దిష్ట కాలపరిమితి లోపు తిరిగి యాక్టివేట్ చేసుకోవాలి. డీయాక్టివేట్ అయిన సంవతర్సరం నుంచి రెండేళ్లలోపు చేసుకోవాలి.

ఇనాక్టివ్ గా మారిన పీపీఎఫ్ ఖాతాను తిరిగి యాక్టివేట్ చేయవచ్చు. అయితే, అందుకు కొంత జరిమానా చెల్లించాల్సి వస్తుంది. ఏడాది లోపు అయితే సులభంగా యాక్టివేట్ అవుతుంది. ఒక వేళ రెండేళ్ల వరకు ఎలాంటి లావాదేవీలు జరగనప్పుడు కొన్ని దశలను అనుసరించాల్సి వస్తుంది. అయితే, శాశ్వతంగా మూసివేసిన ఖాతాను పునరుద్ధరించలేరని గుర్తుంచుకోవాలి.

ముందుగా మీ పీపీఎఫ్ ఖాతా ఉన్న బ్యాంక్ లేదా పోస్టాఫీసు శాఖకు వెళ్లాలి.

ఖాతాను పునరుద్ధరించాలనే ఉద్దేశాన్ని స్పష్టంగా పేర్కొంటూ రాత పూర్వక అభ్యర్థనను సమర్పించాలి.

కనీసం సబ్‌స్క్రిప్షన్ మొత్తం రూ.500 డిపాజిట్ చేయాల్సి ఉంటుంది.

ఖాతా డియాక్టివేట్ అయిన ప్రతి ఏడాదికి రూ.50 చొప్పున అపరాధ రుసుము చెల్లించాలి.

అధికారులు మీ అప్లికేషన్ పరిశీలించిన తర్వాత ఖాతాను పునరుద్ధరిస్తారు.

మీ ఖాతా పునరుద్ధరించిన తర్వాత పాక్షిక ఉపసంహరణలు లేదా లోన్ సౌకర్యం పొందేందుకు అవకాశం లభిస్తుంది.