లంచ్ బాక్స్‌లో నాన్ వెజ్ తీసుకురావద్దు.. స్కూల్ యాజమాన్యం ఆదేశాలు

ఉత్తర్‌ప్రదేశ్‌లోని ఓ ప్రైవేట్ స్కూల్‌లో "నో నాన్ వెజ్ లంచ్ బాక్స్" రూల్ తీసుకురావడం తీవ్ర వివాదానికి దారి తీసింది. దీనిపై విద్యార్థుల తల్లిదండ్రుల నుంచి అభ్యంతరాలు వ్యక్తం అయ్యాయి. దీంతో స్పందించిన స్కూల్ యాజమాన్యం.. ఇది కేవలం రిక్వెస్ట్ మాత్రమేనని.. తప్పకుండా పాటించాల్సిన రూల్ ఏమీ కాదని.. తల్లిదండ్రులకు మరో మెసేజ్ పెట్టింది. నోయిడాలోని సెక్టార్-132 లో ఉన్న ఓ ప్రైవేట్ పాఠశాల యాజమాన్యం.. మొదట తమ పాఠశాలలో చదువుతున్న విద్యార్థుల తల్లిదండ్రులకు ఓ వాట్సాప్ మెసేజ్ పంపించింది. ఇకపై స్కూల్‌లో 'నో నాన్ వెజ్ లంచ్ బాక్స్ రూల్' అమలు చేస్తున్నామని పేర్కొంది. ఈ రూల్‌ను అందరూ పాటించాల్సిందిగా స్కూల్ యాజమాన్యం కోరుతున్నట్లు తెలిపింది.

దీనిపై తల్లిదండ్రుల నుంచి వాట్సాప్‌లోనే అభ్యంతరాలు వ్యక్తం అయ్యాయి. కొందరు పాఠశాలకు ఫోన్ చేసి మరీ తమ అసంతృప్తిని వ్యక్తం చేశారు. కొత్త నియమ నిబంధనలపై తీవ్ర స్థాయిలో విమర్శలు వచ్చాయి. దీంతో ఆ పాఠశాల యాజమాన్యం కాస్త వెనకడుగు వేసింది. ఈ వాట్సాప్ మెసేజ్ పై వివాదం చెలరేగడంతో తల్లిదండ్రులకు మరో మెసేజ్ పెట్టింది. "నో నాన్ వెజ్ లంచ్ బాక్స్" కేవలం అభ్యర్ధన మాత్రమేనని.. ఎవరి ఇష్టం మేరకు వారు తమ పిల్లలకు లంచ్ బాక్స్ పెట్టుకోవచ్చని తెలిపింది. అయితే తాము ఆ రూల్ పెట్టడానికి గల కారణాన్ని కూడా ఆ స్కూల్ యాజమాన్యం వెల్లడించింది.

లంచ్ బాక్స్‌లో పెట్టిన నాన్ వెజ్‌ను ఉదయాన్నే వంట చేస్తారని.. అయితే దాన్ని బాక్స్‌లో పెట్టి మధ్యాహ్నం పిల్లలు తినే సమయానికి అది చెడిపోయే అవకాశం ఉందని పేర్కొంది. ఇలా తినడం వల్ల విద్యార్థుల ఆరోగ్యానికి హానికరమని.. అందుకే పిల్లల మధ్యాహ్న భోజనానికి మాంసాహారం ప్యాక్ చేయవద్దని తల్లిదండ్రులను కోరినట్లు చెప్పిది. అంతేకాకుండా రకరకాల విద్యార్థులు అంతా లంచ్ సమయంలో ఒకే దగ్గర కూర్చొని భోజనం చేస్తారని.. అయితే ఎవరికీ ఇబ్బందులు కలగకుండా ఉండేందుకు.. సానుకూల వాతావరణాన్ని కల్పించడానికి తమ స్కూల్ యాజమాన్యం కృషి చేస్తున్నట్లు తెలిపింది.