ఎయిర్టెల్ నుంచి సరికొత్త స్కీమ్..ఎక్కువ వడ్డీ.. రూ. 5 లక్షలకు
business | Suryaa Desk | Published : Mon, Sep 09, 2024, 09:38 PM
మీరు డబ్బులు పొదుపు చేస్తున్నారా. సంపాదనలో నుంచి పొదుపు చేస్తేనే.. దానిని మళ్లీ పెట్టుబడుల రూపంలోకి మళ్లిస్తేనే.. మలి వయసులో ఆర్థిక ఇబ్బందులు లేకుండా ఉండొచ్చు. హాయి జీవితం గడపొచ్చు. ఇందుకోసం మనకు చాలానే ఆప్షన్లు ఉన్నాయని చెప్పొచ్చు. ఒక్కొక్కరు ఒక్కోలా ఆలోచిస్తారు. కొందరు స్టాక్ మార్కెట్లలో ఇన్వెస్ట్ చేస్తే.. ఇంకొందరు మ్యూచువల్ ఫండ్లను ఎంచుకుంటుంటారు. ఇక రిస్క్ వద్దనుకుంటే.. కేంద్ర ప్రభుత్వం ఆఫర్ చేసే పోస్టాఫీస్ పథకాలు లేదా స్థిరంగా రిటర్న్స్ రావాలంటే బ్యాంక్ ఫిక్స్‌డ్ డిపాజిట్లను ఎంచుకుంటారని చెప్పొచ్చు. ఇక ఫిక్స్‌డ్ డిపాజిట్లకు సంబంధించి వడ్డీ రేట్లు బ్యాంకుల్ని బట్టి మారుతుంటాయి. టెన్యూర్‌ను బట్టి.. డిపాజిట్‌ను బట్టి.. బ్యాంకు రకాన్ని బట్టి వేర్వేరుగా ఉంటాయి. చాలా వరకు ప్రభుత్వ బ్యాంకుల కంటే ప్రైవేట్ దాంట్లో కాస్త ఎక్కువ.. అక్కడి కంటే.. ఎన్‌బీఎఫ్‌సీల్లో ఇంకాస్త ఎక్కువ.. అంతకుమించి స్మాల్ ఫైనాన్స్ బ్యాంకుల్లో వడ్డీ రేట్లు ఉంటాయని తెలిసిందే.
ఇక ఇప్పుడు దేశంలోని ప్రముఖ టెలికాం కంపెనీల్లో ఒకటైన.. భారతీ ఎయిర్టెల్ ఫిక్స్‌డ్ డిపాజిట్ సేవల్ని ప్రారంభించడం విశేషం. ఇక్కడ.. ఎయిర్టెల్ నుంచి ఎయిర్టెల్ ఫైనాన్స్ ఈ సర్వీసుల్ని ప్రారంభించింది. దేశంలోని ప్రముఖ ఎన్బీఎఫ్సీ లు, ఇంకా స్మాల్ ఫైనాన్స్ బ్యాంకుల భాగస్వామ్యంతోనే ఈ సదుపాయం తీసుకొచ్చింది.
ఈ ఫిక్స్‌డ్ డిపాజిట్లను ఇక మీదట ఎయిర్టెల్ థ్యాంక్స్ యాప్ ద్వారా.. ఎఫ్‌డీ చేయొచ్చని.. గరిష్టంగా ఇక్కడ సంవత్సరానికి 9.10 శాతం వరకు వడ్డీ ఇస్తున్నట్లు ఎయిర్టెల్ ఒక ప్రకటనలో తెలిపింది. ఇక ఈ ఫిక్స్‌డ్ డిపాజిట్ సేవల కోసం.. ఎయిర్టెల్ డిజిటల్ విభాగం ఎయిర్టెల్ ఫైనాన్స.. ఉత్కర్ష్ స్మాల్ ఫైనాన్స్ బ్యాంకు, సూర్యోదయ స్మాల్ ఫైనాన్స్ బ్యాంకు, శ్రీరామ్ ఫైనాన్స్ సహా శివాలిక్ బ్యాంకు వంటి సంస్థలతో జట్టు కట్టింది ఎయిర్టెల్.
>> మీరు ఎలాంటి బ్యాంక్ అకౌంట్ తెరవకుండానే.. ఎయిర్టెల్ థ్యాంక్స్ యాప్ ద్వారా ఎఫ్‌డీ బుక్ చేసుకోవచ్చు. మిగతా వాటిల్లో ఫిక్స్‌డ్ డిపాజిట్లను ముందస్తుగా ఉపసంహరించుకునేందుకు ప్రాసెస్ అంత ఈజీగా ఉండదు. వడ్డీ రేట్లలో కోత పడుతుంది. అయితే ఎయిర్‌టెల్‌లో వారం తర్వాత ఎప్పుడైనా.. డబ్బుల్ని విత్‌డ్రా చేసుకునే సదుపాయం ఉందని పేర్కొంది. ఇక్కడ లాకిన్, లిక్విడిటీ ఉండదన్న భయం ఏ మాత్రం అవసరం లేదని తెలిపింది.
ఎయిర్టెల్ ఫైనాన్స్ ప్రస్తుతం.. ఫ్లెక్సీ పర్సనల్ లోన్స్, కో బ్రాండ్ ఇన్‌స్టా ఈఎంఐ కార్డు, గోల్డ్ లోన్స్, కో బ్రాండ్ క్రెడిట్ కార్డులు వంటి వాటిని ఎయిర్టెల్ థ్యాంక్స్ ద్వారా అందిస్తుంది. త్వరలోనే బిజినెస్ లోన్స్, సెక్యూర్డ్ లోన్స్ కూడా అందించనున్నట్లు తెలిపింది. ప్రస్తుతం ఉన్న 9.10 శాతం వడ్డీ రేటు ప్రకారం.. 5 లక్షలు డిపాజిట్ చేసినట్లయితే.. ఏడాదిలో ఎయిర్టెల్ ఫైనాన్స్‌లో రూ. 44,463 వడ్డీ వస్తుంది. అంటే మొత్తం చేతికి రూ. 5,44,463 అందుతుందన్నమాట.
|
|