మ్యూచువల్ ఫండ్లలో 7 రకాల ప్రయోజనాలు.. ఫుల్ లిస్ట్ ఇదే!

మ్యూచువల్ ఫండ్ల రాబడులు కూడా స్టాక్ మార్కెట్ల పని తీరుపై ఆధారపడి ఉంటాయి. అయితే, రిస్క్ ఉన్నప్పటికీ గత చరిత్రను పరిశీలిస్తే పెట్టుబడిదారులు దీర్ఘకాలంలో మంచి రాబడులు అందుకున్నారు. చాలా రకాల ఫండ్లు మంచి రాబడులను అందించాయి. సగటును 12 శాతం రాబడి అందుతోంది. దీంతో చాలా మంది మ్యూచువల్ ఫండ్ల వైపు మళ్లుతున్నారు. ఇక్కడ కంపౌండింగ్ మ్యాజిక్ కనిపిస్తుంది. దీంతో తక్కువ సమయంలోనే ఎక్కువ రాబడులు అందేందుకు అవకాశం ఉంటుంది. ఈ క్రమంలో ప్రయోజనాల గురించి ఇప్పుడు మనం తెలుసుకుందాం.

నిపుణుల నిర్వహణ:

మ్యూచువల్ ఫండ్లను నిర్వహించేందుకు అనుభవైజ్ఞులైన ఫండ్ మేనేజర్లు ఉంటారు. మార్కెట్లను పరిశోధిస్తూ ఎప్పటికప్పుడు ట్రాక్ చేస్తుంటారు. ఎక్కువ రాబడి కోసం సరైన షేర్లను ఎంచుకుని తగిన సమయంలో కొనుగోలు చేయడం, విక్రయించడం చేస్తుంటారు.

రాబడి:

సంప్రదాయ పొదుపు మార్గాలైన బ్యాంకుల ఫిక్స్‌డ్ డిపాజిట్లు, రికరింగ్ డిపాజిట్లు, ప్రభుత్వ పథకాలతో పోలిస్తే మ్యూచువల్ ఫండ్లలో రాబడి ఎక్కువగానే ఉంటోంది. గత 15 ఏళ్ల చరిత్రను పరిశీలిస్తే 10 శాతం నుంచి 14 శాతం మధ్య సగటున వార్షిక రాబడి అందించాయి. అయితే, కొన్నిసార్లు నష్టాలూ ఉంటాయని గమనించాలి.

వైవిధ్యత:

మ్యూచువల్ ఫండ్లు అందించే గొప్ప ప్రయోజనాల్లో డైవర్సిఫికేషన్ ఒకటి. వివిధ షేర్లలో పెట్టుబడి పెట్టడం ద్వారా పోర్ట్ ఫోలియో వైవిధ్యంగా ఉంటుంది. కాబట్టి ఒక కంపెనీ నష్టాలు మిగిల్చినా మరో కంపెనీ షేర్లతో నష్టాలను పూడ్చుకోవచ్చు. దీని వల్ల నష్టభయం తగ్గుతుంది.

సౌకర్యవంతమైన పెట్టుబడులు:

మ్యూచువల్ పండ్లలో ప్రస్తుతం ఆన్‌లైన్ ద్వారా ఎక్కడినుంచైనా ఇన్వెస్ట్ చేసేందుకు వీలుంది. ఏజెంట్లు, బ్యాంకుల ద్వారా పెట్టుబడి పెట్టవచ్చు. అలాగే ఇ-కేవైసీ సదుపాయాన్ని వినియోగించుకుని ఆన్లైన్ ద్వారా కేవైసీ పూర్తి చేయవచ్చు.

తక్కువ మొత్తంతో పెట్టుబడి:

మ్యూచవల్ ఫండ్స్ లో చిన్న మొత్తాల్లోనూ ఇన్వెస్ట్ చేయవచ్చు. సిస్టమాటిక్ ఇన్వెస్ట్‌మెంట్ ప్లాన్ సిప్ ద్వారా నెలకు రూ. 500 నుంచి మొదలుకుని పెట్టుబడులు ప్రారంభించవచ్చు.

లిక్విడిటీ:

ఈ ఫండ్లు పెట్టుబడులకే కాదు, విత్ డ్రాకు ఎంతో అనుకూలం. పెట్టుబడిదారులు ఏ సమయంలోనైనా యూనిట్లను రిడీం చేసుకోవచ్చు. యూనిట్లు రిడీం చేసుకున్నాక 2- 3 రోజుల్లో డబ్బులు ఖాతాలోకి వస్తాయి.

ఆటో డెబిట్:

మ్యూచువల్ ఫండ్స్‌లో క్రమం తప్పకుండా పెట్టుబడులు పెట్టేందుకు సిప్ సహాయపడుతుంది. సిప్ లో ఆటో డెబిట్ సదుపాయమూ ఉంటుంది. ప్రతి వారం, నెల వారీ, త్రైమాసికం ఇల పెట్టుబడుల టెన్యూర్ ఎంచుకోవచ్చు.