కేరళలో మరో వ్యాధి.. అసలేంటీ వెస్ట్ నైల్ ఫీవర్.. లక్షణాలు ఎలా ఉంటాయి

మన దేశంలో చాలా కొత్త కొత్త వ్యాధులు, వైరస్‌లు సాధారణంగా కేరళలోనే వెలుగు చూస్తూ ఉంటాయి. ప్రపంచాన్నే గడగడలాడించిన కరోనా వైరస్ కూడా మన దేశంలో తొలిసారి కేరళలోనే బయటికి వచ్చింది. ఇటీవల మంకీ ఫీవర్ కూడా కేరళలో తీవ్ర కలకలం రేపింది. తాజాగా మరో ఫీవర్ ఆ రాష్ట్రాన్ని తీవ్రంగా కుదిపేస్తోంది. ప్రస్తుతం కేరళను వెస్ట్‌ నైల్‌ ఫీవర్‌ అనే వ్యాధి భయపెడుతోంది. రాష్ట్రంలో కేరళలోని పలు జిల్లాల్లో వెస్ట్‌ నైల్‌ ఫీవర్‌ వ్యాప్తిలో ఉన్నట్లు పినరయి విజయన్ నేతృత్వంలోని సీపీఐ ప్రభుత్వం వెల్లడించింది. ఈ క్రమంలోనే కేరళ ప్రజలంతా అలర్ట్‌గా ఉండాలని రాష్ట్ర ఆరోగ్యశాఖ ఆదేశాలు జారీ చేసింది.

రాష్ట్రంలో త్రిస్సూర్‌, మలప్పురం, కోజికోడ్‌ జిల్లాల్లో ఈ వెస్ట్ నైల్ ఫీవర్ కేసులు నమోదైనట్లు కేరళ ఆరోగ్య శాఖ తెలిపింది. ఈ నేపథ్యంలో అన్ని జిల్లాలు అప్రమత్తంగా ఉండాలని ఆదేశాలు ఇచ్చింది. వెస్ట్ నైల్ ఫీవర్ అనేది ఒక రకమైన వైరల్‌ జ్వరం. ఇన్‌ఫెక్షన్‌ సోకిన క్యూలెక్స్‌ దోమ ద్వారా ఈ వెస్ట్ నైల్ ఫీవర్ అనే వ్యాధి మనుషులకు సోకుతుందని ఆరోగ్య నిపుణులు పేర్కొన్నారు. ఈ వెస్ట్ నైల్ ఫీవర్‌కు ఎలాంటి మందులు గానీ, టీకాలు గానీ లేవని పేర్కొన్నారు. ఈ వ్యాధి సోకిన వారికి ఉన్న లక్షణాల ఆధారంగానే ట్రీట్మెంట్ చేస్తారని చెప్పారు.

వెస్ట్ నైల్ ఫీవర్ సోకకుండా అన్ని రకాల జాగ్రత్తలు పాటించాలని ప్రజలకు వైద్య నిపుణులు సూచిస్తున్నారు. ఈ వెస్ట్ నైల్ ఫీవర్‌ను తొలిసారి 1937లో ఉగాండాలో గుర్తించారు. ఇక మన దేశంలో మొదటిసారిగా కేరళలోనే ఈ వెస్ట్ నైల్ ఫీవర్ వెలుగులోకి వచ్చింది. 2011లో ఓ 6 ఏళ్ల బాలుడికి ఈ వెస్ట్ నైల్ ఫీవర్ సోకింది. అయితే ఆ బాలుడే 2019లో జ్వరం కారణంగా చనిపోవడం అప్పట్లో తీవ్ర సంచలనంగా మారింది.

ఇక రాష్ట్రంలో వెస్ట్ నైల్ ఫీవర్ వ్యాప్తి చెందడంతో ప్రజల్లో తీవ్ర ఆందోళనలు నెలకొన్నాయి. ఈ భయాల నేపథ్యంలో కేరళ ఆరోగ్యశాఖ మంత్రి వీణా జార్జ్‌ స్పందించారు. ఈ వెస్ట్ నైల్ ఫీవర్‌ రాష్ట్రంలో వ్యాప్తి చెందుతున్నప్పటికీ ప్రజలు ఆందోళన చెందాల్సిన అవసరం లేదని ధైర్యం చెప్పారు. జ్వరం లేదా వెస్ట్‌ నైల్‌ ఫీవర్‌కు సంబంధించిన ఏవైనా లక్షణాలు కనిపిస్తే మాత్రం తక్షణమే ఆస్పత్రికి వెళ్లి చికిత్స తీసుకోవాలని ఆమె సూచించారు. ప్రస్తుతం కేరళలో ఈ వెస్ట్ నైల్ ఫీవర్‌ సోకిన వారి పరిస్థితి బాగానే ఉన్నట్లు వెల్లడించారు.

వెస్ట్ నైల్ ఫీవర్ లక్షణాలు

ఈ వెస్ట్ నైల్ ఫీవర్ సోకిన వారికి కొన్ని లక్షణాలు ఉంటాయి. తలనొప్పి, జ్వరం, తల తిరగడం, కండరాల నొప్పులు, జ్ఞాపకశక్తి మందగించడం వంటివి కనిపిస్తూ ఉంటాయి. కానీ కొంతమంది వెస్ట్ నైల్ ఫీవర్ సోకిన వారికి ఇలాంటి లక్షణాలేవీ కనిపించకపోవచ్చు. ఇక మరికొందరిలో జ్వరం, తలనొప్పి, వాంతులు, దురద వంటి లక్షణాలు కనిపిస్తాయి. ఇక వెస్ట్ నైల్ ఫీవర్ సోకిన వారిలో కేవలం ఒకే ఒక శాతం కేసుల్లో మాత్రం మెదడు దెబ్బతినే ప్రమాదం ఉంటుందని డాక్టర్లు పేర్కొన్నారు. ఒక్కోసారి ఈ వెస్ట్ నైల్ ఫీవర్ కారణంగా చనిపోయే అవకాశాలు కూడా ఉంటాయని తెలిపారు. జపనీస్‌ ఎన్‌కెఫలైటిస్‌ వ్యాధి, ఈ వెస్ట్ నైల్ ఫీవర్ లక్షణాలు ఒకేరకంగా ఉన్నప్పటికీ.. ఆ జపనీస్ ఎన్‌కెఫలైటిస్‌తో పోల్చితే.. వెస్ట్ నైల్ ఫీవర్‌ సోకిన వారికి ప్రాణాపాయం తక్కువేనని డాక్టర్లు చెప్పారు.