పోలీసులపై ఉగ్రపంజా..ఒక కానిస్టేబుల్ మరణం

జమ్మూకశ్మీర్ లో ఉగ్రవాదులు రెచ్చిపోయారు. ఓ కానిస్టేబుల్ ప్రాణాలను హరించారు. అంతేకాదు ఈ దాడిలో ఓ చిన్నారి సైతం తీవ్రంగా గాయపడింది. ఉగ్రవాదులపై పోలీసులు విస్త్రుతంగా గాలిస్తున్నారు. జమ్మూకశ్మీర్‌లోని శ్రీనగర్ జిల్లాలో సౌరా ప్రాంతంలో ఉగ్రవాదులు ఓ పోలీస్ కానిస్టేబుల్‌ను హతమార్చారు. అంచర్‌లోని కానిస్టేబుల్ ఇంటి వెలుపల టెర్రరిస్టులు వారిపై విచక్షణా రహితంగా కాల్పులు జరిపారు. ఈ ఘటనలో కానిస్టేబుల్ ఏడేళ్ల కుమార్తె కూడా గాయపడింది. సైఫుల్లా ఖాద్రీపై ఉగ్రవాదులు కాల్పులు జరిపారని, దాడిలో అతను తీవ్రంగా గాయపడ్డాడని జమ్మూకశ్మీర్ పోలీసులు తెలిపారు. తన కుమార్తెను ట్యూషన్ క్లాస్‌కి దింపేందుకు ఇంటి నుంచి వెళ్లేందుకు సిద్ధమవుతుండగా ఈ దాడి జరిగిందని వెల్లడించారు.

ఈ కాల్పుల్లో గాయపడిన పోలీస్ కానిస్టేబుల్‌ సైఫుల్లా ఖాద్రీని, అతని కుమార్తెను స్థానిక ఆస్పత్రికి తరలించారు. అక్కడ చికిత్స పొందుతూ ఖాద్రీ మృతి చెందాడు. దీంతో ఆ అమరవీరుడికి నివాళులు అర్పిస్తున్నామని, ఆ కుటుంబానికి అండగా ఉంటామని జమ్మూకశ్మీర్ పోలీసులు చెప్పారు. అలాగే చిన్నారి కుడి చేతికి బుల్లెట్ గాయమైందని, అయితే పాపకు ప్రాణాపాయం తప్పిందని తెలిపారు.

అయితే ఈ దాడిని ఇన్‌స్పెక్టర్ జనరల్ ఆఫ్ పోలీస్ విజయ్ కుమార్ ఖండించారు. ఆ ఉగ్రవాదుల కోసం పోలీసు బృందాలు రంగంలోకి దిగాయని, త్వరలో పట్టుకుంటామని ఆయన చెప్పారు. ఈ నెలలో కశ్మీర్‌లో ఉగ్రవాదులు లక్ష్యంగా చేసుకున్న మూడో పోలీస్ కానిస్టేబుల్ ఖాద్రీ. అంతకుముందు మే 7న అంచర్ ప్రాంతానికి సమీపంలోని ఐవా వంతెన వద్ద ఉగ్రవాదులు ఒక పోలీసులను కాల్చి చంపారు. మే 13న పుల్వమా జిల్లాలో మరో పోలీసు మరణించారు.