గుజరాత్ లయన్స్ ఎట్టకేలకు మళ్లీ విజయాన్ని అందుకుంది

ఐపీఎల్ పదో సీజన్‌లో వరుస ఓటములతో ఢీలాపడిన గుజరాత్ లయన్స్ ఎట్టకేలకు మళ్లీ విజయాన్ని అందుకుంది. కోల్‌కతా నైట్‌రైడర్స్‌తో ఈడెన్ ‌గార్డెన్స్ వేదికగా శుక్రవారం రాత్రి జరిగిన మ్యాచ్‌లో సురేశ్ రైనా (84: 46 బంతుల్లో 9x4, 4x6) కెప్టెన్ ఇన్నింగ్స్ ఆడటంతో 188 పరుగుల లక్ష్య ఛేదనకు దిగిన గుజరాత్ 4 వికెట్ల తేడాతో విజయాన్ని అందుకుంది. అంతక ముందు రాబిన్ ఉతప్ప (72: 48 బంతుల్లో 8x4, 2x6) అర్ధశతకం బాదడంతో తొలుత బ్యాటింగ్ చేసిన కోల్‌కతా 5 వికెట్ల నష్టానికి 187 పరుగులు చేసింది. ఛేదనలో అరోన్ ఫించ్ (31), మెక్‌కలమ్ (33) గుజరాత్‌కి మెరుపు ఆరంభమివ్వగా.. అనంతరం వచ్చిన దినేశ్ కార్తీక్ (3), ఇషాన్ కిషన్ (4), డ్వేన్ స్మిత్ (5) నిరాశపరిచారు. అయితే ఒక ఎండ్‌లో నిలకడగా ఆడిన సురేశ్ రైనా చివర్లో జడేజా (19 నాటౌట్)తో కలిసి జట్టును గెలుపు తీరాలకు చేర్చాడు. జట్టు స్కోరు 180 వద్ద రైనా వెనుదిరిగానా.. 19 ఓవర్ రెండో బంతిని జడేజా బౌండరీ బాది గెలుపు లాంఛనాన్ని పూర్తి చేశాడు. సీజన్‌లో ఆరో మ్యాచ్ ఆడిన గుజరాత్‌కి ఇది రెండో విజయం కావడం విశేషం.

అంతకముందు కోల్‌కతా జట్టులో ఓపెనర్ సునీల్ నరైన్ (42: 17 బంతుల్లో 9x4, 1x6) తొలి ఓవర్ నుంచే వరుసగా బౌండరీలు బాదడంతో 3.2 ఓవర్లకే కోల్‌కతా 45 పరుగులు చేసి భారీ స్కోరుకు బాటలు వేసుకుంది. మరో ఓపెనర్ గౌతమ్ గంభీర్ (33: 28 బంతుల్లో 1x4, 1x6) సింగిల్‌తో స్ట్రైక్ రొటేట్ చేస్తుంటే.. నరైన్ భారీ షాట్ల‌తో విరుచుకుపడ్డాడు. అయితే ఇన్నింగ్స్ నాలుగో ఓవర్ వేసిన సురేశ్ రైనా తెలివైన బంతితో నరైన్‌ని బుట్టలో వేసేయడంతో గుజరాత్ వూపిరి పీల్చుకుంది. అనంతరం వచ్చిన ఉతప్పతో కలిసి గంభీర్ ఇన్నింగ్స్‌ని నడిపించాడు. వీరిద్దరూ రెండో వికెట్‌కి 69 పరుగుల భాగస్వామ్యం నెలకొల్పడంతో కో‌ల్‌కతా 11.3 ఓవర్లలో 114/2తో మెరుగైన స్థితిలో నిలిచింది. ఈ దశలో గంభీర్ ఔటైనా.. 35 బంతుల్లో అర్ధశతకం పూర్తి చేసుకున్న ఉతప్ప క్రమంగా జోరు పెంచుతూ చివర్లో వెనుదిరిగాడు. అతనితో పాటు మనీశ్ పాండే (24: 21 బంతుల్లో 2x4) కూడా తర్వాత ఓవర్‌లోనే పెవిలియన్‌కి చేరడంతో స్కోరు వేగం నెమ్మదించింది. కానీ.. యూసఫ్ పఠాన్ (11 నాటౌట్ : 4 బంతుల్లో 2x4) ఫర్వాలేదనిపించడంతో కోల్‌కతా 187 పరుగులు చేసింది. గుజరాత్ బౌలర్లలో ప్రవీణ్ కుమార్, ఫాల్కనర్, థంపి, సురేశ్ రైనా తలో వికెట్ తీశారు. సూర్యకుమార్ యాదవ్ (1) రనౌట్‌గా వెనుదిరిగాడు.