40 లక్షల వరకు పన్ను లేదు
Andhra Pradesh Telugu | Suryaa Desk | Published : Thu, Jan 10, 2019, 04:05 PM
న్యూఢిల్లీ: చిన్న వ్యాపారస్థులకు ఊరట కలిగించే నిర్ణయం తీసుకుంది గూడ్స్ అండ్ సర్వీసెస్ ట్యాక్స్ (జీఎస్టీ) కౌన్సిల్. ఏడాదికి రూ. 40 లక్షల లోపు టర్నోవర్ ఉన్న వ్యాపార సంస్థలకు జీఎస్టీ నుంచి మినహాయింపు ఇచ్చారు. ఇప్పటి వరకు ఈ మినహాయింపు రూ.20 లక్షలుగా ఉండేది. ఇక ఈ ఏడాది ఏప్రిల్ 1 నుంచి కంపోజిషన్ స్కీం కింద పరిమితిని రూ. 1.5 కోట్లకు పెంచినట్లు ఆర్థిక మంత్రి, జీఎస్టీ కౌన్సిల్ చైర్మన్ అరుణ్ జైట్లీ వెల్లడించారు. గ‌తంలో ఏడాదికి రూ.కోటి లోపు టర్నోవర్ ఉన్న‌వాళ్లు మాత్రమే ఈ కంపోజిషన్ స్కీమ్‌లో చేరే అవ‌కాశం ఉండేది. కంపోజిషన్ స్కీమ్ కింద ట‌ర్నోవ‌ర్‌ను లెక్కించేట‌ప్పుడు ఒకే పాన్ (ప‌ర్మ‌నెంట్ అకౌంట్ నంబ‌ర్‌)తో రిజిస్ట‌ర్ అయిన అన్ని వ్యాపారాలను లెక్క‌లోకి తీసుకుంటారు. గురువారం జీఎస్టీ కౌన్సిల్ 32వ సమావేశం జరిగింది. ఆ తర్వాత మీడియాతో మాట్లాడిన జైట్లీ మీడియాతో మాట్లాడారు. కంపోజిషన్ స్కీం కింద ఉన్న వాళ్లు మూడు నెలలకోసారి పన్ను చెల్లించినా.. రిటర్న్స్ మాత్రం ఏడాదికోసారి ఫైల్ చేసుకోవచ్చని ఆయన చెప్పారు. సేవల రంగానికి కూడా కంపోజిషన్ స్కీంను విస్తరిస్తున్నట్లు జైట్లీ తెలిపారు.
|
|