మాదకద్రవ్యాలతో క్రికెటర్‌ అరెస్ట్‌
Andhra Pradesh Telugu | Suryaa Desk | Published : Mon, Apr 23, 2018, 11:57 AM
మాదక ద్రవ్యాల అక్రమ రవాణాకు పాల్పడిన బంగ్లాదేశ్‌ మహిళా క్రికెటర్‌ను పోలీసులు అరెస్టు చేశారు. ఢాకా ప్రిమియర్‌ లీగ్‌లో ఆడే క్రికెటర్‌ నజ్రీన్‌ ఖాన్‌ ముక్తా ఆదివారం కాక్స్‌ బజార్‌ సిటీలో ఓ మ్యాచ్‌ ఆడి జట్టు సభ్యులతో బస్సులో తిరిగివస్తోంది. స్థానిక పోలీసులు ఆ వాహనాన్ని చిట్టగాంగ్‌ వద్ద ఆపి తనిఖీలు నిర్వహించారు.ఈ తనిఖీల్లో నజ్రీన్‌ వద్ద 14 వేల నిషేధిత మెథామ్ఫెటామైన్(యాబా) మాత్రలు లభ్యమయ్యాయి. మాదకద్రవ్యాల అక్రమ రవాణా కింద ఆమెను పోలీసులు అదుపులోకి తీసుకున్నారు. ఈ కేసులో అరెస్టయితే నిందితులకు గరిష్ఠంగా జీవితఖైదు పడే అవకాశం ఉంది. మెథామ్ఫెటామైన్, కెఫైన్‌ మిశ్రమం కలిగిన ఈ ట్యాబ్లెట్లు తీవ్ర దుష్ప్రభావాన్ని చూపిస్తాయి.
మయన్మార్‌కు సరిహద్దుల్లో కాక్స్‌ బజార్‌ నగరం ఉంది. మయన్మార్‌లో రఖీన్‌ రాష్ట్రం నుంచి భారీ ఎత్తున యాబా మాత్రలు బంగ్లాదేశ్‌కు అక్రమ రవాణా అవుతుంటాయి. ఇటీవల రోహింగ్య శరణార్థులు మయన్మార్‌ నుంచి బంగ్లాదేశ్‌కు తరలిరావడంతో ఈ అక్రమ రవాణా మరింత పెరిగినట్లు పోలీసులు చెబుతున్నారు. గత ఏడాది 40 మిలియన్ల యాబా మాత్రలను బంగ్లాదేశ్‌ పోలీసులు పట్టుకున్నారు. ఈ మాదకద్రవ్యాల అక్రమ రవాణాను అడ్డుకునేందుకు శిక్షలు కఠినం చేసి మరణశిక్ష విధించాలని బంగ్లాదేశ్‌ ప్రభుత్వం భావిస్తోంది.
|
|