తిరుమల శ్రీవారి ఆలయంలో వైభవంగా కోయిల్ ఆళ్వార్ తిరుమంజనం.. దర్శనాలకు బ్రేక్

తిరుమల శ్రీవారి ఆలయంలో కోయిల్ ఆళ్వార్ తిరుమంజనం వైవభవంగా నిర్వహించారు. శ్రీ వేంకటేశ్వరస్వామివారి సాల‌క‌ట్ల బ్ర‌హ్మోత్స‌వాల‌ను పుర‌స్క‌రించుకుని ఆలయ శుద్ధి కార్యక్రమం నిర్వహించారు అర్చకులు. ఉదయం 6 గంటల నుంచి 11 గంటల గంటల వరకు తిరుమంజనం కార్యక్రమాన్ని ఆగమోక్తంగా చేపట్టారు. శ్రీవారి ఆలయంలోని ఆనందనిలయం మొదలుకొని బంగారువాకిలి వరకు, శ్రీవారి ఆలయం లోపల ఉప దేవాలయాలు, ఆలయ ప్రాంగణం, గోడలు, పైకప్పు, పూజా సామాగ్రి తదితర వస్తువులను నీటితో శుభ్రపరిచారు. కర్పూరం, గంధం, కుంకుమ, పసుపు, కిచ్చిలి గడ్డ మొదలైన వాటితో కూడిన “పరిమళం” అనే సుగంధ మిశ్రమంతో శుభ్రం చేస్తారు. ఆలయ శుద్ధి సమయంలో స్వామివారి మూలవిరాట్టును వస్త్రంతో పూర్తిగా కప్పుతారు.

ప్రతి ఏటా నాలుసార్లు తిరుమల శ్రీవారి ఆలయంలో కోయిల్ ఆళ్వార్ తిరుమంజనం నిర్వహించడం ఆనవాయితీగా ఉంది. తిరుమల బ్రహ్మోత్సవాలు, వైకుంఠ ఏకాదశి, ఉగాది, ఆణివార ఆస్థానం ముందు వచ్చే మంగళవారం రోజు ఆలయ శుద్ధి నిర్వహిస్తారు. దాదాపు నాలుగు గంటల పాటూ తిరుమల శ్రీవారి ఆలయంలో దర్శనాలను నిలిపివేశారు. కోయిల్ ఆళ్వార్ తిరుమంజనం తర్వాత స్వామివారికి ప్రత్యేక పూజలు నిర్వహించి, నైవేద్యం సమర్పించి భక్తులను దర్శనాలకు అనుమతించారు. కోయిల్ ఆళ్వార్ తిరుమంజనం సందర్భంగా వీఐపీ బ్రేక్ దర్శనాలు (ప్రోటోకాల్ విఐపిలు మినహా), అష్టదళ పాద పద్మారాధన సేవను టీటీడీ రద్దు చేసింది.

అప్పలాయగుంట శ్రీ ప్రసన్న వేంకటేశ్వరస్వామివారి ఆలయంలో మూడు రోజుల పాటు జరిగిన పవిత్రోత్సవాలు ముగిశాయి. ఈ సందర్భంగా ఆలయంలో ప్రత్యేక కార్యక్రమాలు నిర్వహించారు. ఉదయం స్వామివారిని సుప్రభాతంతో మేల్కొలిపి తోమాలసేవ, అర్చన చేప‌ట్టారు. ఆ త‌రువాత‌ యాగశాలలో వైదిక కార్యక్రమాలు నిర్వహించారు. అనంత‌రం శ్రీదేవి, భూదేవి సమేత శ్రీ ప్రసస్న వేంకటేశ్వరస్వామివారి ఉత్సవమూర్తులకు స్నపన తిరుమంజనం వేడుక‌గా జరిగింది. ఈ సంద‌ర్భంగా పాలు, పెరుగు, తేనె, కొబ్బరినీళ్లు, ప‌సుపు, చందనంతో విశేషంగా అభిషేకం చేశారు. సాయంత్రం 6 గంటలకు తిరువీధి ఉత్సవం జరిగింది. అనంతరం పూర్ణాహుతితో పవిత్రోత్సవాలు ముగిశాయి.