దక్షిణాఫ్రికా హిట్టర్ ఏబీ డివిలియర్స్ మళ్లీ టెస్టులు ఆడితే బాగుంటుందని ఆ దేశ మాజీ క్రికెటర్ షాన్ పొలాక్ ఆశాభావం వ్యక్తం చేశాడు. దక్షిణాఫ్రికా మరో ఆరు నెలల్లో భారత్, ఆస్ట్రేలియా జట్లతో టెస్టు మ్యాచ్లు ఆడనున్న నేపథ్యంలో డివిలియర్స్ జట్టులో ఉంటే పోటీ ఆసక్తికరంగా ఉంటుందని పొలాక్ అభిప్రాయపడ్డాడు.
గత ఏడాది జనవరిలో గాయం కారణంగా టెస్టులకి దూరమైన డివిలియర్స్.. అనంతరం గాయం నుంచి కోలుకున్నా విశ్రాంతి పేరుతో సుదీర్ఘ ఫార్మాట్కి దూరంగానే ఉంటున్నాడు. రెండు నెలల క్రితం దక్షిణాఫ్రికా క్రికెట్ బోర్డుతో మాట్లాడి.. టెస్టు భవితవ్యంపై తుదినిర్ణయం తీసుకోనున్నట్లు డివిలియర్స్ ప్రకటించాడు. దీంతో టెస్టులకి అతను రిటైర్మెంట్ చెప్పబోతున్నట్లు వార్తలు వచ్చాయి.
‘నా అంచనా ప్రకారం డివిలియర్స్ మళ్లీ టెస్టుల్లో ఆడేలా ఒప్పించే ప్రయత్నం బోర్డు చేస్తూనే ఉంటుంది. మరో ఆరు నెలల్లో దక్షిణాఫ్రికా కఠిన ప్రత్యర్థులతో టెస్టులు ఆడనుంది. ఆ సమయంలో జట్టుతో సీనియర్గా డివిలియర్స్ ఉంటే టాప్ ఆర్డర్ బలిష్టం అవుతుంది. భారత్, ఆస్ట్రేలియా సిరీస్ రూపంలో దక్షిణాఫ్రికాకి గట్టి సవాల్ ఎదురుకానుంది’ అని పొలాక్ వివరించాడు.