కోడి రామకృష్ణ మృతి చిత్ర పరిశ్రమకు తీరని లోటు: పవన్
Andhra Pradesh Telugu | Suryaa Desk | Published : Fri, Feb 22, 2019, 09:53 PM
సీనియర్ దర్శకుడు కోడి రామకృష్ణ మృతితో టాలీవుడ్‌ను తీవ్ర దిగ్భ్రాంతికి గురి చేసింది. ఆయన మృతి పట్ల సినీ, రాజకీయ ప్రముఖులు సంతాపం తెలుపుతున్నారు. దర్శకుడు కోడి రామకృష్ణ మరణవార్త తెలిసి ఆవేదనకు లోనయ్యానన్నారు జనసేన పార్టీ అధ్యక్షుడు, నటుడు పవన్ కల్యాణ్. రామకృష్ణ మృతికి సంతాపాన్ని తెలియజేశారు.
‘‘ప్రముఖ దర్శకుడు కోడి రామకృష్ణగారు మృతి చెందారని తెలియగానే ఆవేదనకు లోనయ్యాను. వందకుపైగా చిత్రాలను రూపొందించిన ఆయన ఇటీవల అస్వస్థతకు లోనయ్యారని తెలిసి, తిరిగి కోలుకుంటారని అనుకున్నాను. వారి కుటుంబ సభ్యులకు నా ప్రగాఢ సానుభూతిని తెలియజేస్తున్నాను. కోడి రామకృష్ణగారి తొలి చిత్రం ‘ఇంట్లో రామయ్య వీధిలో కృష్ణయ్య’లో అన్నయ్య చిరంజీవిగారు కథానాయకుడు. నాటి నుంచి విభిన్న చిత్రాలు అందించిన ఆయన విజువల్ ఎఫెక్ట్స్ ప్రధానంగా రూపొందించడంలోనూ తన శైలిని చూపించారు. వారి మరణం చిత్ర పరిశ్రమకు తీరని లోటు. కోడి రామకృష్ణగారి ఆత్మకు శాంతి కలగాలని ప్రార్థిస్తున్నాను..’’ అన్నారు పవన్ కల్యాణ్.
|
|