ఏపీలో మరో హామీ అమలు చేసిన చంద్రబాబు సర్కార్

ఆంధ్రప్రదేశ్‌లో కూటమి ప్రభుత్వం మరో ఎన్నికల మేనిఫెస్టో హామీని నెరవేర్చింది. రాష్ట్రంలో మాజీ సైనికోద్యోగుల కార్పొరేషన్‌ను ఏర్పాటు చేస్తూ ఉత్తర్వులు జారీ చేశారు. ఈ కార్పొరేషన్‌కు రూ.10 కోట్ల కార్పస్‌ ఫండ్ కేటాయించారు.. అవసరాన్ని బట్టి ఈ కార్పొరేషన్‌కు మరిన్ని నిధులు కేటాయించనున్నారు. ఈ మేరకు రాష్ట్రం హోంశాఖ ముఖ్య కార్యదర్శి కుమార్‌ విశ్వజిత్‌ ఉత్తర్వులు ఇచ్చారు. ఈ కార్పొరేషన్ ద్వారా మాజీ సైనికోద్యోగుల రీ సెటిల్‌మెంట్, పునరావాసానికి వీలుగా సుస్థిరాభివృద్ధి ప్రాజెక్టులు చేపట్టనున్నారు.

అలాగే మాజీ సైనికోద్యోగులకు ఉద్యోగ, ఉపాధి కల్పనతో పాటుగా.. వైకల్యం ఉన్న సైనికులు, యుద్ధంలో ప్రాణాలు విడిచిన సైనికుల భార్యలు, సైనికులైన భర్తలను కోల్పోయిన భార్యలు, వారిపై ఆధారపడి ఉన్న కుటుంబ సభ్యులు జీవన ప్రమాణాలు మెరుగుపరిచేందుకు అవసరమైన కార్యక్రమాలను ఈ కార్పొరేషన్‌ చేపడుతుంది. ఎప్పటి నుంచో మాజీ సైనికోద్యోగుల కోసం కార్పొరేషన్‌ ఏర్పాటు చేయాలనే డిమాండ్‌ ఉంది. గతంలోనే రక్షణ మంత్రిత్వశాఖ అన్ని రాష్ట్రాలు ఈ కార్పొరేషన్‌ ఏర్పాటు చేయాలని సూచించిన సంగతి తెలిసిందే.

నారా లోకేష్ యువగళం పాదయాత్ర చేసిన సమయంలో కొందరు మాజీ సైనికోద్యోగులు కలిసి.. కార్పొరేషన్ ఏర్పాటు చేయాలని కోరారు. వెంటనే స్పందించిన లోకేష్.. ప్రభుత్వం అధికారంలోకి వస్తే ఈ కార్పొరేషన్‌ ఏర్పాటు చేస్తామని హామీ ఇచ్చారు. ఈ కార్పొరేషన్ హామీని ఎన్నికల మేనిఫెస్టోలో పొందుపరిచారు. గత నెలలో జరిగిన కేబినెట్ సమావేశంలో మాజీ సైనికోద్యోగుల కార్పొరేషన్‌ ఏర్పాటుకు ఆమోదం తెలపగా.. ఇప్పుడు ఉత్తర్వులు జారీ చేశారు. ఈ కార్పొరేసన్ స్వరూపం, కార్యకలాపాలకు సంబంధించిన పూర్తి విధివిధానాలు త్వరలోనే విడుదల చేయనున్నారు. ఏపీ ప్రభుత్వం కార్పొరేషన్ ఏర్పాటు చేయడంపై మాజీ సైనికోద్యోగులు హర్షం వ్యక్తం చేశారు. తమ ఆవేదనను ప్రభుత్వం అర్థం చేసుకుని కార్పొరేషన్‌ను ఏర్పాటు చేయడాన్ని ఆహ్వానిస్తున్నామన్నారు. యువగళం పాదయాత్రలో ఇచ్చిన హామీ మేరకు మేనిఫెస్టోలో చేర్చి.. ఇప్పుడు ఆ హామీని నేరవేర్చడంలో కీలకమైన పాత్ర పోషించిన మంత్రి నారా లోకేష్‌కు ధన్యవాదాలు తెలిపారు మాజీ సైనికోద్యోగులు