భారత్-ఇజ్రాయేల్ బంధానికి రతన్ టాటా ఛాంపియన్: బెంజిమిన్ నెతన్యాహు

ప్రముఖ పారిశ్రామికవేత్త, టాటా గ్రూప్‌ గౌరవ ఛైర్మన్‌ రతన్‌ టాటా మరణంపై విదేశీ నేతలు సంతాపం తెలుపుతున్నారు. తాజాగా, ఇజ్రాయెల్‌ ప్రధాన మంత్రి బెంజమిన్‌ నెతన్యాహు సంతాపం తెలుపుతూ.. ప్రధాన మంత్రి నరేంద్ర మోదీకి ‘ఎక్స్‌’ (ట్విట్టర్) వేదికగా పోస్ట్‌ పెట్టారు. భారత్‌-ఇజ్రాయేల్‌ స్నేహబంధంలో రతన్ టాటా కృషిని కొనియాడారు.

‘నేను, ఇజ్రాయేల్‌లోని అనేక మంది ప్రజలు రతన్‌ టాటా మృతికి సంతాపం తెలుపుతున్నాం.. ఆయన భారత్‌ గర్వించదగ్గ ముద్దుబిడ్డ. భారత్-ఇజ్రాయేల్ స్నేహబంధంలో ఆయనొక ఛాంపియన్‌.. రతన్‌ కుటుంబానికి నా సంతాపం తెలియజేయండి’ అని మోదీని నెతన్యాహు కోరారు. టాటా గ్రూప్‌ ఛైర్మన్‌గా రతన్‌ టాటా తన వ్యాపార సామ్రాజ్యాన్ని దాదాపు 100 దేశాలకు విస్తరించారు. అంతేకాదు, తన దాతృత్వంతో అనేక సేవా కార్యక్రమాలను చేపట్టారు. అందుకే, ప్రపంచ దేశాధినేతలు ఆయనకు నివాళులర్పిస్తున్నారు.

‘‘భారతదేశమే కాదు.. ప్రపంచం ఒక మంచి మనసున్న వ్యక్తిని కోల్పోయింది’ అని భారత్‌లోని అమెరికా దౌత్యవేత్త ఎరిక్‌ గ్యార్సెట్టి అన్నారు. ‘నేను దౌత్యవేత్తగా నామినేట్‌ అయినప్పుడు భారత్‌ నుంచి నాకు అందిన తొలి శుభాకాంక్షలు రతన్‌ టాటావే’ అని ఆయన గుర్తుచేసుకున్నారు. అంతేకాదు, మా స్వస్థలానికి టాటా చాలా సాయం చేశారు. దక్షిణ కాలిఫోర్నియా యూనివర్సిటీ బోర్డు సభ్యుడిగానూ ఉన్నారు. ‘తన దేశ శ్రేయస్సు, సమానత్వం, మన ప్రపంచం కోసం చాలా చేశారు.. ఆయన జ్ఞాపకం ఒక ఆశీర్వాదం కావచ్చు’ అని అన్నారు.

భారత్‌లోని ఆప్తమిత్రుడిని కోల్పోయిందని ఫ్రాన్స్ దేశాధ్యక్షుడు ఇమ్మాన్యుయేల్ మెక్రాన్ ఆవేదన వ్యక్తం చేశారు. ‘‘రతన్‌ టాటా దూరదృష్టి, సారథ్యం.. భారత్‌, ఫ్రాన్స్‌లో పరిశ్రమలు అభివృద్ధికి దోహదపడ్డాయి.. టాటా కుటుంబానికి, భారతీయులకు నా ప్రగాఢ సానుభూతి తెలుపుతున్నా’’అని మెక్రాన్‌ సోషల్‌ మీడియాలో పోస్ట్‌ పెట్టారు. వీరే కాదు.. గూగుల్‌ సీఈవో సుందర్‌ పిచాయ్‌, మైక్రోసాఫ్ట్‌ అధినేత బిల్‌ గేట్స్‌ తదితరులు రతన్‌ టాటా మృతిపట్ల సంతాపం తెలియజేశారు.

‘గూగుల్‌లో రతన్ టాటాతో చివరిసారిగా కలిసినప్పుడు వైమో రోగతి గురించి మాట్లాడాం.. ఆయన విజన్ వినడానికి స్ఫూర్తిదాయకంగా ఉంది. ఆయన మనకు అసాధారణమైన వ్యాపారం, దాతృత్వ వారసత్వాన్ని వదిలిపెట్టారు.. భారత్‌లో ఆధునిక వ్యాపార నాయకత్వాన్ని మార్గదర్శకత్వం చేయడంలోనూ, అభివృద్ధి చేయడంలోనూ కీలకపాత్ర పోషించారు’ అని పిచాయ్ అన్నారు.

‘రతన్ టాటా ఒక దార్శనిక నాయకుడు.. జీవితాలను మెరుగుపరచడంలో అతని అంకితభావం భారత్, ప్రపంచంపై చెరగని ముద్ర వేసింది. నేను ఆయన అనేక సందర్భాల్లో కలుసుకునే అవకాశం కలిగింది... మానవాళికి సేవ చేయాలనే ఆయన ఉద్దేశ్యం, బలమైన సంకల్పం నన్ను ప్రభావితం చేసింది’ అని బిల్ గేట్స్ కొనియాడారు.