ఇది కదా ఆట అంటే.. 100 రన్స్‌ తేడాతో జింబాబ్వేను చిత్తు చేసిన యువ భారత్‌

శుభ్‌మన్‌ గిల్‌ సారథ్యంలోని యువ భారత్‌ జట్టు జింబాబ్వే పర్యటనలో తొలి విజయాన్ని నమోదు చేసింది. ఆదివారం జరిగిన రెండో టీ20 మ్యాచ్‌లో ఆల్‌రౌండ్‌ ప్రదర్శనతో అదరగొట్టి 100 పరుగుల తేడాతో జింబాబ్వేని చిత్తుగా ఓడించింది. తొలుత బ్యాటింగ్‌లో 234/2 పరుగులు చేసిన టీమిండియా.. ఆ తర్వాత జింబాబ్వేను 18.4 ఓవర్లలో 134 పరుగులకు కుప్పకూల్చింది. కాగా శనివారం జరిగిన సిరీస్‌ ఆరంభ మ్యాచ్‌లో జింబాబ్వే 13 పరుగుల తేడాతో గెలిచింది. ఈ విజయంతో ఐదు మ్యాచ్‌ల టీ20 సిరీస్‌లో రెండు మ్యాచ్‌లు ముగిసే సరికి భారత్‌, జింబాబ్వేలు 1-1తో నిలిచాయి. మూడో టీ20 మ్యాచ్‌ బుధవారం జరగనుంది.ఈ మ్యాచ్‌లో తొలుత బ్యాటింగ్ చేసిన భారత్.. భారీ స్కోరు నమోదు చేసింది. ఐపీఎల్‌ 2024 హీరో అభిషేక్‌ శర్మ సెంచరీతో చితక్కొట్టడంతో నిర్ణీత 20 ఓవర్లలో 234/2 పరుగులు చేసింది. రుతురాజ్‌ గైక్వాడ్‌ (47 బంతుల్లో 77 రన్స్‌), రింకూ సింగ్ (22 బంతుల్లో 48 రన్స్‌) కూడా బ్యాట్ ఝుళిపించారు. ఈ మ్యాచ్‌లో తొలి పది ఓవర్‌లలో 74/1 పరుగులు మాత్రమే చేసిన భారత్.. ఆ తర్వాత యువ బ్యాటర్లు సిక్స్‌లు, ఫోర్లతో చెలరేగడంతో చివరి 10 ఓవర్లలో 160/1 రన్స్‌ పిండుకుంది.

అనంతరం భారీ లక్ష్యంతో బరిలోకి దిగిన జింబాబ్వే.. భారత బౌలర్ల ధాటికి వరుసగా వికెట్లు కోల్పోయింది. ఓ దశలో బ్రియాన్ బానెట్‌ 9 బంతుల్లో 26 పరుగులు చేయడంతో.. 2.5 ఓవర్లలో 40/1తో నిలిచింది. ఆ తర్వాత వరుసగా వికెట్లు కోల్పోయి.. పీకల్లోతు కష్టాల్లో పడింది. పేసర్లు ముకేశ్‌ కుమార్‌, ఆవేశ్‌ ఖాన్‌ల దెబ్బకు 46/4తో నిలిచింది. ఆ తర్వాత కూడా వరుసగా వికెట్లు కోల్పోయి 18.4 ఓవర్లలో 134 పరుగులకు ఆలౌట్‌ అయింది. భారత బౌలర్లలో ముకేశ్‌ కుమార్‌ 3, ఆవేశ్‌ ఖాన్‌ 3, రవి బిష్ణోయ్‌ 2, వాషింగ్టన్‌ సుందర్‌ 1 వికెట్‌ తీశారు. ఈ మ్యాచ్‌ ఫలితంతో ఐదు మ్యాచ్‌ల టీ20 సిరీస్‌ 2 మ్యాచ్‌లు ముగిసే సరికి 1-1తో సమమైంది. మూడో టీ20 మ్యాచ్ జూలై 10న జరగనుంది.