అప్పుడే పుట్టిన బిడ్డను వదిలేసి కరోనా రోగి పరార్
national | Suryaa Desk | Published : Mon, Aug 17, 2020, 04:30 PM
అప్పుడే పుట్టిన శిశువును వదిలేసి ఓ మహిళ హాస్పిటల్ నుంచి పారిపోయింది. దీంతో కుటుంబసభ్యులతో పాటు హాస్పిటల్ వర్గాల్లో ఆందోళన నెలకొంది. దేశ రాజధాని ఢిల్లీలోని హిందూ రావ్ హాస్పిటల్‌లో ఈ ఘటన చోటు చేసుకుంది. టిఓఐ కథనం మేరకు..హాస్పిటల్ వర్గాలు తెలిపిన వివరాల ప్రకారం.. బిహార్‌లోని ఔరంగాబాద్‌కు చెందిన ఓ మహిళ తనకు డెలివరీ డేట్ దగ్గర పడటంతో కొన్ని రోజుల కిందట ఢిల్లీలోని హిందూ రావు హాస్పిటల్‌లో చేరింది. ఆమెకు కరోనా పరీక్షలు నిర్వహించగా పాజిటివ్ అని తేలింది. గర్భిణి అయిన ఆ మహిళకు వైద్యులు ప్రత్యేక చికిత్స అందించారు. ఆగస్టు 11న ఆమె ఆడబిడ్డకు జన్మనిచ్చింది. ఆ మరుసటి రోజు ఉదయం హాస్పిటల్ సిబ్బంది కళ్లుగప్పి వార్డు నుంచి వెళ్లిపోయింది. కుటుంబసభ్యులు, హాస్పిటల్ వర్గాలు ఆమె కోసం గాలించగా ఆచూకీ దొరకలేదు. దీంతో పోలీసులను ఆశ్రయించారు. ఘటనపై కేసు నమోదు చేసుకొని ఆ మహిళ కోసం గాలింపు చర్యలు చేపట్టినట్లు పోలీసులు తెలిపారు. పుట్టిన శిశువుకు కరోనా పరీక్షలు నిర్వహించగా నెగటివ్‌గా తేలింది. బిడ్డ సంపూర్ణ ఆరోగ్యంతో ఉందని హాస్పిటల్ వర్గాలు తెలిపాయి. ప్రస్తుతం ఆ శిశువు వారి సంరక్షణలోనే ఉంది. అయితే.. పారిపోయిన మహిళ గురించే అందరూ ఆందోళన చెందుతున్నారు. ఆమె నుంచి మరి కొంత మందికి కరోనా వైరస్ సోకే ప్రమాదం ఉందని ఆందోళనకు గురవుతున్నారు.
|
|