ఇటీవలే ప్రభుత్వ ఉద్యోగం సాధించిన ఓ యువకుడ్ని కిడ్నాప్ చేసి.. అతడికి తుపాకి గురిపెట్టి ఓ యువతి మెడలో బలవంతంగా తాళి కట్టించారు. విస్తుగొలిపే ఈ ఘటన బిహార్లోని వైశాలి జిల్లాలో బుధవారం చోటుచేసుకుంది. పోలీసుల కథనం ప్రకారం.. వైశాలి జిల్లా మహేయ మల్పూర్ గ్రామానికి చెందిన యువకుడు గౌతమ్ కుమార్.. ఇటీవలే బిహార్ పబ్లిక్ సర్వీస్ కమిషన్ పరీక్షలో అర్హత సాధించాడు. అతడికి రేపురాలోని ఉత్కారిమిట్ మధ్య విద్యాలయ ప్రభుత్వ పాఠశాలలో ఉపాధ్యాయుడిగా ఉద్యోగం లభించింది. ఇటీవలే అతడు విధుల్లో చేరాడు.
అయితే, బుధవారం మధ్యాహ్నం కారులో వచ్చిన కొందరు వ్యక్తులు.. స్కూల్ నుంచి గౌతమ్ను బలవంతంగా తీసుకెళ్లిపోయారు. ఈ విషయం గౌతమ్ కుటుంబసభ్యులకు తెలియడంతో ఆందోళనకు గురయ్యారు. వెంటనే పోలీస్ స్టేషన్కు వెళ్లి ఫిర్యాదు చేశారు. పోలీసులు తొలుత పట్టించుకోకపోవడంతో అతడి కుటుంబసభ్యులు అదే రోజు రాత్రి రోడ్డుపై నిరసనకు దిగారు. దీంతో పోలీసులు అప్రమత్తమై.. గౌతమ్ ఆచూకీ కోసం గాలించారు. గురువారం ఉదయం అతడు ఎక్కడున్నదీ గుర్తించారు.
గౌతమ్ను రాజేశ్ రాయ్ అనే వ్యక్తి అపహరించి.. తన కుమార్తెతో బలవంతంగా పెళ్లిచేసినట్టు తేలింది. గతంలో తన కుమార్తె చాందినీని పెళ్లి చేసుకోవాల్సిందిగా తన కుమారుడ్ని కోరాడని, అందుకు తిరస్కరించడంతో భౌతికదాడికి కూడా పాల్పడినట్టు బాధిత కుటుంబం ఆరోపించింది. పోలీసులు అక్కడకు చేరుకునేటప్పటికే గౌతమ్, చాందినీల వివాహం జరిపించాడు. నవ దంపతుల్ని తన ఇంట్లోనే బంధించాడు. తుపాకీ ఎక్కుపెట్టి తనతో బలవంగా తాళి కట్టించారని గౌతమ్ వాపోయాడు. నిందితులపై కేసు నమోదుచేసిన పోలీసులు దర్యాప్తు ప్రారంభించారు.
తనకు ఈ పెళ్లి అసలు ఇష్టం లేదని చెప్పాడు. ఇటీవల పట్నా హైకోర్టు ఇచ్చిన తీర్పును ప్రస్తావిస్తూ.. ఆర్మీ ఉద్యోగికి లఖీసరాయ్ అమ్మాయితో చేసిన 'బలవంతపు పెళ్లి'ని రద్దుచేసిన విషయాన్ని గుర్తుచేశాడు. ‘న్యాయమూర్తి ఎదుట ఉపాధ్యాయుడు వాంగ్మూలాన్ని రికార్డ్ చేస్తాం.. మేము అమ్మాయి బంధువులతో కూడా మాట్లాడుతున్నాం’ అని పటేపూర్ పోలీస్ స్టేషన్ అదనపు ఇంఛార్జ్ హసన్ సర్దార్ చెప్పారు.
![]() |
![]() |