భర్త ఎదుటే భార్యపై అత్యాచారం

భర్త ఎదుటే భార్యపై అత్యాచారానికి పాల్పడిన ఘటన గురుగ్రామ్‌లో చోటుచేసుకుంది. ఈ ఘటన దేశంలోని మహిళల భద్రతను మరోసారి ప్రశ్నార్థకంలో పడేసింది. ఒంటరిగా ఉన్నప్పుడే కాదు... సొంతవారితో ఉన్నప్పుడు కూడా రక్షణ లేకుండా పోతోందనడానికి ఈ సంఘటన ఓ ఉదాహరణ. కారులో ప్రయాణిస్తోన్న వారిని అడ్డుకుని అందులోని తల్లీకూతుళ్లపై సామూహిక అత్యాచారానికి పాల్పడిన ఘటన ఉత్తర్‌ప్రదేశ్‌లో చోటుచేసుకున్న విషయం తెలిసిందే. తాజాగా హరియాణాలోని గురుగ్రామ్‌లో భర్త, బావ కళ్లముందే ఓ మహిళపై అత్యాచారం జరిగింది. పోలీసులు తెలిపిన వివరాల ప్రకారం.. గురుగ్రామ్‌కు చెందిన 22ఏళ్ల మహిళ తన భర్తతో కలిసి బంధువుల ఇంట్లో జరిగిన వేడుకకు సోమవారం హాజరయ్యింది. అక్కడ నుంచి తన బావ కారులో తిరిగి వెళ్తుండగా సెక్టార్ 56లోని బిజినెస్ పార్క్ సమీపంలో అత్యవసరంగా నిలపాల్సి వచ్చింది. 

ఇదే సమయంలో రెండు వాహనాల్లో వచ్చిన నలుగురు యవకులు ఎందుకు ఆపారని ప్రశ్నించి, ఓ దుండగుడు ఆ మహిళను కారులో నుంచి బయటకు లాగి సమీపంలోని పొదల్లోకి తీసుకెళ్లి అత్యాచారం చేశాడు. అతడిని అడ్డుకునేందుకు ప్రయత్నించిన బాధితురాలి భర్త, బావలను మిగతా ముగ్గురు యువకులు తుపాకీ గురిపెట్టి బెదిరించారని గురుగ్రామ్ ఏసీపీ మనీశ్ సెహగల్ తెలియజేశారు. అంతేకాదు దీని గురించి పోలీసులకు ఫిర్యాదు చేస్తే చంపుతామని బెదిరించిన అనంతరం నిందితులు అక్కడి నుంచి పరారయ్యారు. నిందితుల కారు నంబరును గుర్తించిన బాధితురాలి భర్త పోలీసులకు ఫిర్యాదు చేశారు. దీని ఆధారంగా కేసు నమోదు చేసి దర్యాప్తు చేపట్టిన పోలీసులు సోహ్నా సమీపంలోని జోహల్కా గ్రామంలో వారిని అరెస్టు చేశారు.