మీ భర్తలు మద్యానికి బానిసలయ్యారు.. ఇలా చేస్తే మానేస్తారు: మహిళలకు మంత్రి టిప్‌ వైరల్‌

యువత మొదలు వృద్ధుల వరకు మద్యానికి బానిసలుగా మారుతున్నారు. పుట్టినరోజులు, పండుగలు, శుభకార్యాల సమయంలో యువత సంతోషం, సరదా పేరుతో మద్యం సేవిస్తున్నారు. క్రమంగా ఇది అలవాటుగా మారి బానిసలవుతున్నారు. మద్యపానం అలవాటు ఎన్నో కుటుంబాలను చిన్నాభిన్నం చేస్తోంది. ఆర్థికంగా, ఆరోగ్యపరంగా జీవితాలు నాశనమవుతున్నాయి. అయితే, మద్యానికి అలవాటుపడిన తమ భర్తలు, సోదరులు, తండ్రులతో మాన్పించడానికి మహిళలకు ఓ మంత్రి చెప్పిన టిప్ ప్రస్తుతం సోషల్ మీడియాలో వైరల్ అవుతోంది. మద్యం మాన్పించాలని కోరుకునే మహిళలు.. వారిని ఇంటికి తెచ్చుకుని మీ ఎదురుగా తాగమని చెప్పండని సదరు మంత్రి సలహా ఇవ్వడం గమనార్హం.

వివరాల్లోకి మద్యపానం, డ్రగ్స్‌ను నియంత్రించేందుకు మధ్యప్రదేశ్ ప్రభుత్వం అవగాహన కార్యక్రమాలు చేపట్టంది. ఇందులో సామాజిక న్యాయం, సాధికారికత మంత్రి నారాయణ్ సింగ్ కుశ్వాహా ఓ సూచన చేశారు. ‘‘తమ ఇంట్లోని పురుషులు మద్యం మానేయాలని మహిళలు కోరుకుంటే.. ముందుగా వారిని బయట తాగి రావద్దని చెప్పిండి... అదేదో ఇంటికి తెచ్చుకొని, మీ ముందు కూర్చొని తాగమని చెప్పండి.. కుటుంబసభ్యుల ముందు మద్యం సేవిస్తే.. వారిలో పశ్చాత్తాపం మొదలై ఆ అలవాటు క్రమంగా తగ్గడం ప్రారంభం అవుతుంది.. ఆ తర్వాత రోజుల్లో పూర్తిగా మద్యం మానేస్తారు.. తమ భార్యాపిల్లల ముందు తాగడానికి వాళ్లు సిగ్గుపడతారు. పిల్లలు చూస్తే వాళ్లు కూడా అలాగే ప్రవర్తించే ప్రమాదం ఉంటుందని వారికి గుర్తుచేయండి.. ఈ విధానం బాగా పని చేయొచ్చు’’ అని మంత్రి అన్నారు.

ప్రస్తుతం మంత్రి నారాయణ్ సింగ్ కుశ్వాహా సూచనలు సోషల్ మీడియాలో వైరల్‌ అవుతున్నాయి. దీనిపై స్పందించిన ప్రతిపక్ష కాంగ్రెస్ పార్టీ.. ఆయన ఉద్దేశం మంచిదే కావచ్చు కానీ చెప్పే విధానం సరిగాలేదని విమర్శించింది. ‘‘మంత్రి ఉద్దేశం మంచిదే అయినా దానిని చెప్పిన తీరు సరిగా లేదు. ఇంట్లో మద్యం సేవించడం వల్ల ఆ ఇల్లు గృహహింసకు కేంద్రంగా మారిపోతుంది... ఈ సలహా బదులుగా అసలు తాగొద్దని ఆయన చెప్తే బాగుండేది’ అని కాంగ్రెస్ పార్టీ మీడియా విభాగం అధ్యక్షుడు ముకేశ్ నాయక్ వ్యాఖ్యానించారు.