గౌతమ్ అదానీ శాలరీ అంతేనా? సొంత ఉద్యోగుల కంటే తక్కువట

అదానీ గ్రూప్ అధినేత, ఆసియాలోనే అత్యంత ధనవంతుల్లో ఒకరైన గౌతమ్ అదానీ వార్షిక వేతనం ఎంత ఉంటుందనే విషయం తెలుసుకోవాలనే ఆసక్తి చాలా మందిలో ఉంటుంది. అయితే, ఆయన శాలరీ ఎంతో తెలుస్తే ఇంత తక్కువ తీసుకుంటున్నారా? అని అనకుండా మానరు. ఎందుకంటే తన సహచర పారిశ్రామికవేత్తలతో పాటు సొంత కంపెనీల్లో పని చేసే ఉన్నత స్థాయి ఉద్యోగుల కంటే తక్కువ ఉంటుందట. ఆయన ఏడాదికి రూ.9.26 కోట్లు మాత్రమే శాలరీ తీసుకుంటున్నారని తాజాగా వెల్లడైంది. అదానీ గ్రూప్‌నకు చెందిన 10 లిస్టెడ్ సంస్థలు వార్షిక నివేదికలు విడుదల చేశాయి. అందులో రెండింటి నుంచే అదానీ వేతనం తీసుకుంటున్నారట.

అదానీ ఎంటర్ ప్రైజెస్ లిమిటెట్  వార్షిక నివేదిక ప్రకారం.. 2023-24 ఆర్థిక సంవత్సరంలో గౌతమ్ అదానీ శాలరీ రూ.2.19 కోట్లుగా ఉంది. ఇతర అలవెన్సులు, ప్రయోజనాల రూపంలో మరో రూ.27 లక్షలు అందుకున్నారు. ఈ కంపెనీని నుంచి గతేడాది రూ.2.46 కోట్లు తీసుకున్నారు. అంతకు ముందు ఏడాదితో పోలిస్తే ఇది 3 శాతం ఎక్కువని తెలుస్తోంది. అలాగే అదానీ పోర్ట్స్ అండ్ సెజ్ లిమిటెడ్ నుంచి ఆయన రూ. 6.8 కోట్లు జీతం పొందుతున్నట్లు నివేదికల ద్వారా తెలుస్తోంది. కుటుంబ యాజమాన్యంలో నడుస్తోన్న పెద్ద సంస్థ అధినేతలతో పోలిస్తే అదానీ వార్షిక వేతనం తక్కువగా ఉండడం గమనార్హం.

అంబానీ, సునీల్ మిత్తల్, రాజీవ్ బజాజ్‌ల కంటే తక్కువే..

దేశంలోనే అత్యంత సంపన్నుడైన ముకేశ్ అంబానీ వార్షిక వేతనం రూ.15 కోట్లుగా ఉండేది. అయితే, కరోనా మహమ్మారి విజృంభణ తర్వాత ఆయన వేతనం తీసుకోవడం లేదు. ఇక భారతీ ఎంటర్ ప్రైజెస్ అధినేత సునీల్ మిత్తల్ 2022-23లో రూ.16.7 కోట్లు వార్షిక వేతనం అందుకున్నారు. ఇక రాజీవ్ బజాజ్ రూ.53.7 కోట్లు, పవన్ ముంజాల్ రూ.80 కోట్లుగా ఉంది. అలాగే ఎల్ అండ్ టీ ఛైర్మన్ ఎస్ఎన్ సుబ్రమణ్యన్, ఇన్పోసిస్ సీఈఓ సలీల్ పరేఖ్‌ల కంటే గౌతమ్ అదౌనా వార్షిక వేతనం తక్కువగా ఉండడం గమనార్హం.

ఏఈఎల్ నుంచి అదానీ సోదరుడు రాజేశ్ మొత్తంగా రూ. 8.37 కోట్లు వేతనం పొందారు. ఆయన మేనల్లుడు ప్రణవ్ అదానీ రూ. 6.46 కోట్లు వేతనం తీసుకున్నట్లు తాజా నివేదిక వెల్లడించింది. బ్లూమ్‌బర్గ్ బిలియనీర్స్ ఇండెక్స్ ప్రకారం.. అదానీ సంపద విలువ 106 బిలియన్ డాలర్లుగా ఉంది. ఇక రిలయన్స్ ఇండస్ట్రీస్ అధినేత ముకేశ్ అంబానీ సంపద 111 బిలియన్ డాలర్లు ఉండగా ప్రపంచంలోనే అత్యంత సంపన్నుల జాబితాలో 12వ స్థానంలో కొనసాగుతున్నారు. ఇక అదానీ 14వ స్థానంలో ఉన్నారు.