భారతీయులు మోజుపడి కొంటున్న 7 సీటర్ కారు ఇదే

సొంత ఇల్లు, అందులో కారు ఉండాలని సగటి భారతీయుడి కల. ఇటీవలి కాలంలో కారు కొనుగోలు చేస్తున్న వారి సంఖ్య పెరిగింది. అలాగే కుటుంబం మొత్తానికి సరిపోయేలా పెద్ద కార్లపైనే ఎక్కువ మంది మొగ్గు చూపుతున్నారు. ఈ క్రమంలో 7 సీటర్ కార్లకు మంచి డిమాండ్ ఉంటోంది. మన దేశంలో మారుతీ సుజుకీ, టాటా మోటార్స్, హ్యుందాయ్, కియా వంటి దిగ్గజ కంపెనీలు కార్ల విక్రయాలు చేపడుతున్నాయి. దేశీయ అవసరాలకు తగ్గట్లుగా వివిధ మోడళ్లను మార్కెట్లోకి తీసుకొస్తున్నాయి. అయితే, 7 సీటర్ వేరియంట్‌లో ఓ కారును భారతీయులు మోజపడి కొంటున్నారు. ఈ ఏడాది మే, 2024లో అత్యధికంగా అమ్ముడైన 7 సీటర్ కార్లతో అగ్రస్థానంలో నిలిచింది. అదే మారుతీ సుజుకీ ఎర్టిగా 

మారుతీ సుజుకీ కంపెనీకి చెందిన ఎర్టిగా మోడల్ అత్యధికంగా సేల్స్ జరిగాయి. ఈ మోడల్ గత మే, 2024 నెలలో ఏకంగా 13,893 యూనిట్లు సేల్ అయ్యాయి. దీంతో మార్కెట్లో అత్యధికంగా అమ్ముడైన 7 సీటర్ కారు గా నిలిచింది. 7 సీటర్ సెగ్మెంట్‌లో ఇతర కంపెనీలు పోటీలో వెనకబడ్డాయని చెప్పవచ్చు. మరి ఈ కారు ధర ఎంత? ఎలాంటి ఫీచర్లు ఇందులో ఉన్నాయో ఇప్పుడు మనం తెలుసుకుందాం.

మారుతీ సుజుకీ ఎర్టిగా ప్రారంభ ధర రూ. 8.69 లక్షలు (ఎక్స్ షోరూమ్)గా ఉంది. టాప్ వేరియంట్ ధర రూ. 13.03 లక్షలు (ఎక్స్ షోరూమ్)గా ఉంది. ఈ కారు LXi, VXi, ZXi, ZXi+ వంటి నాలుగు వేరియంట్లలో లభిస్తోంది. అలాగే పెర్ల్ మిడ్ నైట్ బ్లాక్, పెర్ల్ ఆర్కిటిక్ వైట్, డిగ్నిటీ బ్రౌన్, మెటాలిక్ మగ్మా గ్రే, పర్ల్ మెటాలిక్ ఆబర్న్ రెడ్, సిల్వర్, పర్ల్ మెటాలిక్ ఆక్స్ ఫర్డ్ బ్లూ వంటి కలర్లలో లభిస్తోంది.

5 స్పీమ్ మాన్యువల్ లేదా 6 స్పీడ్ ఆటోమేటిక్ ట్రాన్స్‌మిషన్‌తో వస్తోంది. మైల్డ్ హైబ్రిడ్ టెక్నాలజీతో 1.5 లీటర్ పెట్రోల్ ఇంజిన్‌తో ఈ కారు లభిస్తోంది. అలాగే 103 పీఎస్, 137 ఎన్ఎం టార్క్ ఉత్పత్తి చేస్తుంది. అలాగే సీఎన్‌జీపై 88పీఎస్, 121.5 ఎన్ఎం టార్క్ ఉత్పత్తి చేస్తుంది. అయితే, సీఎన్‌డీ వేరియంట్‌లో కేవలం 5 స్పీడ్ మాన్యువల్ ట్రాన్స్‌మిషన్ మాత్రమే అందుబాటులో ఉంది. 7 ఇంచుల టచ్ స్క్రీన్, క్రూయిజ్ కంట్రోల్, ఆటో ఏసీ, పాడిల్ షిఫ్టర్ల వంటి అధునాత ఫీచర్లు ఉన్నాయి. ఇందులో 4 ఎయిర్ బ్యాగ్స్, పార్కింగ్ సెన్సార్లు, ఎలక్ట్రానికి స్టెబిలిటీ ప్రోగ్రామ్ వంటివి ఉన్నాయి.