వైద్యుడి నిర్వాకం.. వేలికోసం వెళ్తే.. చిన్నారి నాలుకకు సర్జరీ చేశాడు!

వైద్యుడి నిర్వాకంతో ఓ చిన్నారి భవిష్యత్తులో మాట్లాడలేని పరిస్థితికి చేరుకుంది. తమ కుమార్తెకు అదనంగా ఉన్న ఆరో వేలిని శస్త్రచికిత్స ద్వారా తొలగించేందుకు తల్లిదండ్రులు ఆసుపత్రికి తీసుకెళ్లగా.. అక్కడ వైద్యుడు నాలుకకు శస్త్రచికిత్స చేశాడు. దారుణమైన ఈ ఘటన కేరళలోని కోజికోడ్ ఆస్పత్రిలో చోటుచేసుకుంది. వివరాల్లో వెళ్తే.. నాలుగేళ్ల బాలికకు ఆరో వేలు ఉండటంతో వైద్యులను తల్లిదండ్రులు సంప్రదించారు. సర్జరీ ద్వారా దాన్ని తొలగించవచ్చని డాక్టర్లు సూచించడంతో కుమార్తెను కోజికోడ్‌ ప్రభుత్వ ఆసుపత్రికి తల్లిదండ్రులు తీసుకెళ్లారు.

అక్కడ వైద్యులు గురువారం ఆ చిన్నారిని ఆపరేషన్‌ థియేటర్‌కి తీసుకెళ్లారు. కొంత సమయం తర్వాత థియేటర్‌లో నుంచి ఆ పాపను సిబ్బంది బయటకు తీసుకొచ్చారు. పాప చేతికి ఉండాల్సిన దూది నోట్లో కుక్కి ఉండటాన్ని చూసి తల్లిదండ్రులు ఖంగుతిన్నారు. ఆరా తీయడంతో అసలు విషయం బయటపడింది. వేలికి బదులు నాలుకకు శస్త్రచికిత్స చేసినట్లు గుర్తించిన ఆ తల్లిదండ్రులు కన్నీటిపర్యంతమయ్యారు. దీంతో రాష్ట్రవ్యాప్తంగా ఈ విషయం చర్చనీయాంశమైంది. వైద్యుడి తీరుపై తీవ్ర ఆగ్రహం వ్యక్తమైంది. దీంతో ప్రభుత్వం తక్షణమే స్పందించింది.

ప్రాథమిక దర్యాప్తు అధారంగా విధుల్లో నిర్లక్ష్యంగా వ్యవహరించిన అసోసియేట్ ప్రొఫెసర్ డాక్టర్ బెజోన్‌ జాన్సన్‌ను సస్పెండ్‌ చేసినట్లు కేరళ ఆరోగ్య మంత్రి వీణా జార్జి తెలిపారు. ఈ ఘటనపై పూర్తిస్థాయి దర్యాప్తునకు ఆమె ఆదేశించారు. వైద్యులు, సిబ్బంది ప్రోటోకాల్‌లను సక్రమంగా పాటించేలా చూడాలని ఆసుపత్రులకు కఠినమైన ఆదేశాలు ఇచ్చామని మంత్రి పేర్కొంది. మరోవైపు బాలిక కుటుంబీకుల ఫిర్యాదు మేరకు పోలీసులు డాక్టర్ జాన్సన్‌పై కేసు నమోదు చేశారు.

బాలిక తల్లిదండ్రులు మాట్లాడుతూ.. ‘శత్రువులకు కూడా ఇటువంటి పరిస్థితి రాకూడదు.. మా చిన్నారికి నాలుకకు సంబంధించి ఎటువంటి సమస్య లేదు.. నిర్లక్ష్యం కారణంగా జరిగిన పొరపాటుతో కుమార్తెకు భవిష్యత్తులో ఏవైనా ఇబ్బందులు ఎదురైతే ఆసుపత్రే బాధ్యత వహించాలి.. ఒకేరోజు రెండు సర్జరీలు ఉండటంతో డాక్టర్ పొరబడినట్లు ఉన్నతాధికారులు తెలిపారు.. వైద్యుడు కూడా క్షమాపణ చెప్పారు’ అంటూ ఆవేదనకు గురయ్యారు.