26 ఏళ్ల క్రితం కిడ్నాప్ అయిన యువకుడు.. పక్కింట్లోనే నిర్బంధం.. పట్టించిన సోషల్ మీడియా పోస్ట్

ఓ వ్యక్తి 26 ఏళ్ల క్రితం కిడ్నాప్ అయ్యాడు. దీంతో అతని జాడ కోసం కుటుంబ సభ్యులు ఏళ్లపాటు వెతికారు. పోలీసులకు ఫిర్యాదు చేసినా ఫలితం లేకపోయింది. కొన్నేళ్లపాటు ప్రయత్నించినా ఎక్కడా అతని ఆచూకీ లభించకపోవడంతో అతని కుటుంబం ఆశను వదులుకుంది. అయితే కిడ్నాప్ అయిన 26 ఏళ్ల తర్వాత ఆ వ్యక్తి.. నిర్బంధం నుంచి బయటికి వచ్చాడు. అది కూడా తన ఇంటి పక్కన ఉన్న ఇంట్లోనే కిడ్నాప్ అయి 26 ఏళ్ల పాటు అందులోనే ఉన్నాడు. ఇక ఆ వ్యక్తి కిడ్నాపర్ల చెర నుంచి బయటికి రావడానికి అసలు కారణం ఒక సోషల్ మీడియా పోస్ట్. ఈ సంఘటన అల్జీరియాలో చోటు చేసుకుంది. ఎట్టకేలకు అతని ఆచూకీ పట్టుకున్న పోలీసులు.. చివరికి కుటుంబ సభ్యులకు అప్పగించారు.

ఉత్తర అల్జీరియాలోని డెజెల్ఫా అనే పట్టణంలో అల్జీరియా సివిల్ వార్ సమయంలో 1998 లో ఈ కిడ్నాప్ ఘటన చోటు చేసుకుంది. ఒమర్‌ బిన్‌ ఒమ్రాన్‌ అనే వ్యక్తి కాలేజీకి వెళ్తుండగా.. దుండగులు కిడ్నాప్ చేశారు. అప్పటికి ఒమర్ బిన్ ఒమ్రాన్ వయసు 19 ఏళ్లు. అయితే అతడిని కిడ్నాప్ చేసింది.. ఇంటి పక్కన ఉన్న వ్యక్తే కావడం గమనార్హం. కిడ్నాప్ చేసిన తర్వాత ఒమర్ బిన్ ఒమ్రాన్‌ను తీసుకెళ్లి తన ఇంట్లో ఉన్న పశువుల పాక కింద సెల్లార్‌లో బంధించాడు. ఒమర్ బిన్ ఒమ్రాన్ కిడ్నాప్ అయి ఉన్న ప్రాంతం తన ఇంటికి కేవలం 200 మీటర్ల దూరంలోనే ఉంది.

అయితే తమ కుమారుడు కాలేజీకి వెళ్లి తిరిగి ఇంటికి రాకపోవడంతో తీవ్ర ఆందోళనకు గురైన ఒమర్ బిన్ ఒమ్రాన్ తల్లిదండ్రులు చుట్టుపక్కల వెతికారు. చివరికి కనిపించకపోవడంతో పోలీసులకు కూడా సమాచారం అందించారు. వాళ్లు కేసు నమోదు చేసి వెతికినా ఎలాంటి ఫలితం దక్కలేదు. అయితే అప్పటికే అల్జీరియాలో అంతర్యుద్ధం జరగడంతో అందులో కిడ్నాప్ లేదా హత్యకు గురయ్యాడని ఒమర్ బిన్ ఒమ్రాన్ కుటుంబ సభ్యులు అనుమానం వ్యక్తం చేశారు. కానీ కుమారుడి రాక కోసం ఏళ్లపాటు ఎదురుచూసిన అతని తల్లి చివరికి 2013 లో ప్రాణాలు కోల్పోయింది.

అయితే ఒమర్ బిన్ ఒమ్రాన్‌ను కిడ్నాప్ చేసిన వ్యక్తి సోదరుడు ఇటీవల సోషల్ మీడియాలో ఒక పోస్ట్ పెట్టాడు. గతంలో తన సోదరుడు ఓ వ్యక్తిని కిడ్నాప్ చేశాడని.. అందులో తనకు కూడా పాత్ర ఉందని పేర్కొన్నాడు. ఈ వీడియో కాస్తా ఒమర్ బిన్ ఒమ్రాన్ కుటుంబ సభ్యులకు చేరడంతో వారు పోలీసులకు ఫిర్యాదు చేసి పాత కేసును మళ్లీ విచారణ జరిపించాలని కోరారు. దీంతో రంగంలోకి దిగిన పోలీసులు.. ఆ వీడియోలో ఉన్న వ్యక్తిని పట్టుకుని చివరికి ఒమర్ బిన్ ఒమ్రాన్‌ను బంధించిన చోటును కనుగొన్నారు. అయితే ఆ చోటును చూసి వారు షాక్ అయ్యారు. ఎందుకంటే ఇంటి పక్కనే అతడ్ని నిర్బంధించి ఉండటం గమనార్హం.

ఇక అక్కడ ఉన్న సెల్లార్‌లో వెతకగా.. ఒమర్ బిన్ ఒమ్రాన్‌ కనిపించాడు. ప్రస్తుతం అతని వయసు 45 ఏళ్లు. అతని యవ్వనం మొత్తం ఆ సెల్లార్‌లోనే గడిచిపోయింది. తాను ఆ సెల్లార్‌లో కిడ్నాప్ అయి ఉన్నపుడు తన కుటుంబ సభ్యులు అక్కడి నుంచి వెళ్లేవారని.. గట్టిగా అరిచి వారిని పిలుద్దామంటే.. కిడ్నాపర్ పక్కనే ఉండేవాడని ఒమర్ బిన్ ఒమ్రాన్‌ తెలిపాడు. ఒమర్ బిన్ ఒమ్రాన్‌ను కిడ్నాప్ చేసిన 61 ఏళ్ల వ్యక్తి పారిపోతుండగా.. పోలీసులు పట్టుకుని అరెస్ట్ చేశారు. ఒమర్ బిన్ ఒమ్రాన్‌కు వైద్య పరీక్షలు, మానసిక చికిత్స అందిస్తున్నట్లు అధికారులు వెల్లడించారు.