అడవిలో గున్న ఏనుగుకు జెడ్ ప్లస్ సెక్యూరిటీ.. వైరల్ వీడియో

వన్యప్రాణులకు సంబంధించిన అనేక అద్బుత వీడియోలు, అరుదైన దృశ్యాలు మనసుకు ఆహ్లదం కలిగిస్తాయి. తాజాగా, అలాంటి వీడియో ఒకటి సామాజిక మాధ్యమాల్లో వైరల్ అవుతోంది. నిద్రపోతున్న గున్న ఏనుగుకు రక్షణగా చుట్టూ కొన్ని ఏనుగులు కాపాలా కాస్తున్న వీడియో ఐఏఎస్‌ అధికారిణి సుప్రియా సాహు ఎక్స్‌ (ట్విట్టర్)‌లో పోస్ట్ చేశారు. పిల్ల ఏనుగును క్రూరమృగాల బారి నుంచి కాపాడుకునేందుకు గజరాజులు చేసిన ప్రయత్నం నెటిజన్లను విశేషంగా ఆకట్టుకుంటోంది. తమిళనాడులోని అన్నామలైన టైగర్ రిజర్వ్ ఫారెస్ట్‌లో గున్న ఏనుగు చుట్టూ మిగతా ఏనుగులు రక్షణ వలయంగా ఏర్పడి కునుకు తీస్తున్న ఆ దృశ్యం వైరల్‌గా మారింది.

ప్రముఖ వైల్డ్‌లైఫ్ ఫోటోగ్రాఫర్ ధను పరాన్ తీసిన వీడియోను సుప్రియా సాహు షేర్ చేస్తూ.. ‘అన్నామలై టైగర్‌ రిజర్వ్‌ ఫారెస్ట్‌లో అందమైన ఏనుగు కుటుంబం ఎంతో ప్రశాంతంగా నిద్రపోతుంది చూడండి.. గున్న ఏనుగుకు ఆ కుటుంబం ఏవిధంగా జెడ్‌ కేటగిరీ రక్షణ కల్పిస్తోంది..! అలాగే కుటుంబ సభ్యుల భద్రతను ఓ పెద్ద ఏనుగు ఎలా లేచి చుట్టుపక్కల పరిస్థితిని గమనిస్తుందో.. అచ్చం మన కుటుంబంలానే ఉంది కదూ’ అంటూ క్యాప్షన్ పెట్టారు. చూడముచ్చటగా ఉన్న ఈ వీడియో ప్రస్తుతం సోషల్ మీడియాలో వైరల్‌గా మారింది.

15 సెకన్ల ఈ వీడియో నెటిజన్లను ఆకట్టుకుంటోంది. ఈ అరుదైన వీడియోను షేర్ చేసిన ఐఏఎస్ అధికారిణికి ధన్యవాదాలు తెలుపుతూ కామెంట్ల పెడుతున్నారు. ‘కుటుంబం కోసం పోరాడటం విలువైంది.. ఇది సంరక్షించదగినది’ అని ఒకరు కామెంట్ చేస్తే.. ‘కుటుంబమే మహా బలం.. ఈరోజు నేను చూసిన అద్భుత వీడియో ఇది’ అని మరొకరు... ‘అద్భుతం.. ఇటువంటి అందమైన దృశ్యాలను అరుదుగా చూస్తాం.. వీడియో షేర్ చేసినందుకు ధన్యవాదాలు’ అని ఇంకొకరు.. ‘ఎంత అద్భుతం. చాలా అరుదైన దృశ్యం! ఇది డెస్క్‌టాప్ వాల్‌పేపర్, రాబోయే తరాలకు వన్యప్రాణులపై అవగాహన కల్పించడానికి దీనిని ఉపయోగించుకోవచ్చు’ నెటిజన్ కామెంట్లు పెట్టారు.