ఇలా చేస్తే తక్కువ వడ్డీకే లోన్.. బ్యాంకులు వడ్డీ రేట్లు ఎలా నిర్ణయిస్తాయంటే?

ఏదైనా అవసరం ఏర్పడి పెద్ద మొత్తంలో డబ్బులు కావాల్సినప్పుడు చాలా మంది పర్సనల్ లోన్ తీసుకునేందుకు బ్యాంకులను ఆశ్రయిస్తారు. ఎలాంటి గ్యారంటీ లేకుండానే బ్యాంకులు సైతం వ్యక్తిగత రుణాలను ఇస్తుంటాయి. వీటిని అన్‌సెక్యూర్డ్ లోన్స్ అంటారు. నిర్ణీత కాల వ్యవధిలోపు తిరిగి చెల్లించాల్సి ఉంటుంది. ప్రతి నెల ఈఎంఐల రూపంలో లోన్ తిరిగి చెల్లించాల్సి ఉంటుంది. తమ ఆర్థిక స్తోమతను బట్టి మెచ్యూరిటీ టెన్యూర్ ఎంపిక చేసుకునేందుకు రుణ గ్రహీతలకు బ్యాంకులు అకాశం ఇస్తాయి. అయితే అన్‌సెక్యూర్డ్ లోన్స్ కాబట్టి ఎక్కువ వడ్డీ రేట్లు వసూలు చేస్తుంటాయి బ్యాంకులు. అయితే, వడ్డీ రేట్లను కొన్ని అంశాలు ప్రభావితం చేస్తాయి. రుణ గ్రహీత ఆయా అంశాలు బ్యాంకు నిబంధనలకు అనుగుణంగా మార్చుకోగలగితే తక్కువ వడ్డీకే లోన్ పొందవచ్చు. పర్సనల్ లోన్ వడ్డీ రేట్లు నిర్ణయించేందుకు బ్యాంకులు ఏ అంశాలు పరిశీలిస్తాయే తెలుసుకుందాం.

క్రెడిట్ హిస్టరీ

బ్యాంకులు పర్సనల్ లోన్ ఇచ్చే ముందు దరఖాస్తుదారుని క్రెడిట్ హిస్టరీ పరిశీలిస్తాయి. గతంలో ఏవైనా రుణాలు తీసుకున్నారా? వాటిని తిరిగి చెల్లించేందుకు ఎంత టైమ్ తీసుకున్నారు? అనే రికార్డులను చెక్ చేస్తాయి. రీపేమెంట్లు ఆన్ టైమ్‌లో చేసిన వారైతే మంచి క్రమశిక్షణ గల కస్టమర్‌గా పరిగణిస్తాయి. రుణం మంజూరు ఇచ్చేందుకు ఆసక్తి చూపిస్తాయి. వడ్డీ రేటు సైతం తగ్గిస్తాయి. అందుకే మంచి క్రెడిట్ స్కోర్ ఉండాలని చెబుతారు. సాధారణంగా 750 ఆపైన క్రెడిట్ స్కోర్ ఉంటే తక్కువ వడ్డీ రేటుతో లోన్ పొందవచ్చు.

ఆదాయం

పర్సనల్ లోన్ తీసుకోవాలనుకునే వారు నెల నెలా స్థిరమైన ఆదాయం అందుకుంటున్నారా లేదా? అనే అంశాన్ని బ్యాంకులు పరిశీలిస్తాయి. మంచి ఆదాయం ఉండి లోన్ తిరిగి చెల్లించగలిగే సామర్థ్యం వారికి ఉందని భావిస్తేనే లోన్ మంజూరు చేస్తాయి. స్థిరమైన ఆదాయం లేకపోతే రీపేమెంట్లు చేయలేరనే అంచనాకు వస్తారు. ఉద్యోగం, ఆదాయం ఉన్న వారికి లోన్ ఇచ్చేందుకు ఆసక్తి చూపిస్తాయి.

ఏ ఉద్యోగం చేస్తున్నారు?

లోన్ కోసం దరఖాస్తు చేసుకున్న వ్యక్తి ఎలాంటి ఉద్యోగం చేస్తున్నారనే విషయాన్ని పరిశీలిస్తాయి. ప్రభుత్వ ఉద్యోగులు అయితే ఉద్యోగ భద్రత ఉంటుందని తక్కువ వడ్డీ రేటుతో రుణాలు ఇస్తుంటాయి. ప్రైవేటు ఉద్యోగుల విషయంలో పని చేసే కంపెనీ పేరు ప్రఖ్యాతులను పరిగణనలోకి తీసుకుంటారు. పెద్ద కంపెనీల్లో ఉద్యోగం చేసేవారికి రుణాలు ఇచ్చేందుకు ఆసక్తి చూపిస్తాయి.

వీటితో పాటు రుణం ఎంత తీసుకుంటున్నారు, టెన్యూర్, మార్కెట్ పరిస్థితులు వడ్డీ రేట్లను ప్రభావితం చేస్తాయి. అందుకే లోన్ కోసం దరఖాస్తు చేసే ముందే పైన చెప్పిన వివరాలు తనిఖీ చేసుకోవాలి. క్రెడిట్ స్కోర్ తక్కువగా ఉంటే, ఈఎంఐలు సరిగ్గా కట్టలేని వారు లోన్ కోసం అప్లై చేస్తే రిజెక్ట్ చేసే అవకాశాలు ఎక్కువగా ఉంటాయి. లేదా అధిక వడ్డీలు చెల్లించాల్సి వస్తుంది. బ్యాంకుతో ఖాతాదారుని సంబంధం సైతం లోన్ విషయంలో కీలక పాత్ర పోషిస్తుందని చెప్పవచ్చు. దీర్ఘకాలం పాటు అనుబంధం ఉన్న కస్టమర్లకు తక్కువ వడ్డీకే లోన్ ఇస్తుంటాయి.