హెచ్ 1 బీ వీసాలు. అమెరికాలో పనిచేసే ఐటీ ఉద్యోగులకు ఆ దేశం ఇచ్చే ప్రత్యేక వీసాలు. అయితే ఇప్పటివరకు ప్రతీ ఏటా ఇస్తున్న హెచ్ 1 బీ వీసాలు సరిపోవడం లేదని వాటి సంఖ్యను పెంచాలని ఎప్పటి నుంచో వాదనలు ఉన్నాయి. అయితే ఈ హెచ్ 1 బీ వీసాలు కలిగిన వారిలో ఎక్కువ మంది భారతీయులే ఉన్నారు. ఈ క్రమంలోనే భారత్ కూడా ఎన్నోసార్లు హెచ్ 1 బీ వీసాల కోటాను పెంచాలని అమెరికాను కోరింది. ఇలాంటి సమయంలోనే రిపబ్లికన్ పార్టీ తరఫున అమెరికా అధ్యక్ష అభర్థిత్వానికి పోటీ పడుతున్న భారత సంతతి వ్యక్తి వివేక్ రామస్వామి సంచలన వ్యాఖ్యలు చేశారు. తాను అధికారంలోకి వస్తే హెచ్ 1 బీ వీసాలకు ముగింపు పలకనున్నట్లు ప్రకటించారు. దీంతో ఈ హెచ్ 1 బీ వీసాలపై ఆధారపడే భారతీయుల్లో కొత్త ఆందోళన మొదలైంది.
రిపబ్లికన్ పార్టీ తరఫున అమెరికా అధ్యక్ష అభ్యర్థిత్వానికి పోటీ పడుతున్న వారిలో భారత సంతతికి చెందిన ఇద్దరు వ్యక్తులు ఉన్నారు. ఒకరు వివేక్ రామస్వామి కాగా.. మరొకరు నిక్కీ హేలీ. అయితే వివేక్ రామస్వామి తన డిబేట్లు, ఇంటర్వ్యూలలో సంచలన కామెంట్లు, అధికారంలోకి వచ్చాక చేసే పనుల గురించి సంచలన వ్యాఖ్యలు చేస్తున్నారు. ఇప్పటికే మాజీ అధ్యక్షుడు డొనాల్డ్ ట్రంప్ను పలుమార్లు పొగిడిన వివేక్ రామస్వామి.. ఒక వేళ తాను అధ్యక్షుడినైతే 2020 లో అమెరికా క్యాపిటల్ హిల్ భవనంపై దాడులకు పాల్పడిన ట్రంప్ మద్దతుదారులకు క్షమాభిక్ష పెడతానంటూ సంచలన ప్రకటన చేశారు. దీంతో పాటు తాజాగా 16 లక్షల మందికిపైగా ప్రభుత్వ ఉద్యోగులను తొలగిస్తానని.. ఎఫ్బీఐ సహా వివిధ సంస్థలను తొలగిస్తానని స్పష్టం చేశారు.
అయితే తాజాగా వివేక్ రామస్వామి చేసిన ఓ ప్రకటన భారతీయులకు షాక్ ఇచ్చింది. ఎక్కువ మంది భారతీయులు అమెరికాకు వెళ్లేందుకు ఉపయోగిస్తున్న హెచ్ 1 బీ వీసాలపై కీలక వ్యాఖ్యలు చేశారు. 2024 అమెరికా అధ్యక్ష ఎన్నికల్లో తాను గెలిస్తే వీసా వ్యవస్థలో సమూల మార్పులు చేస్తానని స్పష్టం చేశారు. ముఖ్యంగా హెచ్ 1 బీ వీసాల వ్యవస్థను రద్దు చేయాలని భావిస్తున్నట్లు వెల్లడించారు. అయితే హెచ్ 1 బీ వీసా మీదే అమెరికాకు వెళ్లిన వివేక్ రామస్వామి.. ఇలాంటి వ్యాఖ్యలు చేయడం తీవ్ర ఆశ్చర్యాన్ని కలిగిస్తోంది. వివేక్ రామస్వామి 29 సార్లు ఈ హెచ్ 1 బీ వీసాను ఉపయోగించడం గమనార్హం. ఇక వీసా లాటరీ వ్యవస్థ స్థానంలో మెరిటోక్రాటిక్ ప్రవేశంగా మారుస్తానని వెల్లడించాడు. ఈ సందర్భంగా హెచ్ 1 బీ వీసా వ్యవస్థపై సంచలన వ్యాఖ్యలు చేసిన వివేక్ రామస్వామి.. ఈ వీసా వ్యవస్థ మంచిది కాదని పేర్కొన్నారు. హెచ్ 1 బీ వీసాల వల్ల కేవలం ఆ ఉద్యోగిని స్పాన్సర్ చేసిన కంపెనీకి మాత్రమే ప్రయోజనం చేకూరుతోందని తెలిపారు.
అమెరికా సరిహద్దులను కాపాడేందుకు సైనిక బలగాలను ఉపయోగిస్తానని చెప్పారు. అమెరికాలో పుట్టినా.. పత్రాలు లేని వలసదారుల పిల్లలను కూడా దేశం నుంచి బహిష్కరిస్తానని వివేక్ రామస్వామి స్పష్టం చేశారు. ప్రతీ సంవత్సరం 65 వేల హెచ్ 1బీ వీసాలను అమెరికా అందిస్తుంది. అయితే వీటిని రెట్టింపు చేసి 1.30 లక్షలకు పెంచాలని ఈ ఏడాది జూలైలో భారతీయ అమెరికన్ కాంగ్రెస్ సభ్యుడు రాజా కృష్ణమూర్తి అమెరికా చట్టసభల్లో బిల్లు ప్రవేశపెట్టాడు. ఈ హెచ్ 1బీ వీసాల్లో దాదాపు నాలుగింట మూడు వంతుల వీసాలు భారతీయలే దక్కించుకుంటున్నారు.
![]() |
![]() |