ట్రెండింగ్
Epaper    English    தமிழ்

ఆ హత్యకేసులో భార్య...ఆమె తండ్రే నింధితులు

Andhra Pradesh Telugu |  Suryaa Desk  | Published : Fri, Apr 28, 2023, 09:34 PM

అల్లూరి సీతారామరాజు జిల్లాలో సంచలనంరేపిన ఫైనాన్స్ వ్యాపారి డెత్ కేసులో మృతుడి భార్య తండ్రితో పాటూ మరికొందరితో కలిసి హత్య చేసినట్లు తేల్చారు పోలీసులు. జి.మాడుగుల మండలం నేరోడివలసకు చెందిన హరి విజయ్‌.. ముంచంగిపుట్టు మండలం దారెల పంచాయతీ చివుకుచింతకి చెందిన ప్రీతిని 2014లో ప్రేమ వివాహం చేసుకున్నారు. వారికి ఒక పాప ఉంది. దంపతులు చోడవరంలో ఉంటూ ఫైనాన్స్‌ వ్యాపారం చేస్తున్నారు.


ఈ నెల 18న విజయ్‌కు గుండెనొప్పి వచ్చిందని భార్య ప్రీతి స్థానిక జిల్లా ఆస్పత్రిలో చేర్పించింది. కానీ అతడు ఆస్పత్రిలో చేర్చడానికి ముందే చనిపోయాడని నిర్ధారించారు. అప్పుడు విజయ్‌ కుటుంబ సభ్యులకు అనుమానం మొదలైంది. స్థానిక పోలీసులకు ఫిర్యాదు చేయడంతో.. అనుమానాస్పద మృతిగా కేసు నమోదు చేశారు. పోలీసుల దర్యాప్తులో కొన్ని అనుమానాలు మొదలయ్యాయి. విజయ్‌‌కు గుండెనొప్పి అంటూ భార్య ప్రీతి కారులో పాడేరు తీసుకురావడంతో పోలీసులు అనుమానం వ్యక్తం చేశారు. విజయ్ భార్య ప్రీతి కాల్‌ డేటాను సేకరించడంతో డొంక మొత్తం కదిలింది.


దర్యాప్తులో కథ మొత్తం బయటపడింది. ఫైనాన్స్‌ వ్యాపారం విషయంలో భార్యాభర్తలిద్దరి మధ్య గొడవలు జరుగుతున్నాయి. ఈ క్రమంలోనే విజయ్‌ను చంపేయాలని ప్రీతి ప్లాన్ చేసింది. ఆమె తండ్రితో పాటూ విజయ్ స్నేహితులతో కలిసి ఈనెల 17న స్కెచ్ వేశారు. విజయ్‌కు స్నేహితులతో కలిసి మద్యం తాగించారు.. మత్తులో ఉన్న అతడి మొహంపై దిండుతో అదిమి హత్య చేశారు. ఆ మరుసటి రోజు విజయ్‌ను కారులో పాడేరు ప్రభుత్వ ఆసుపత్రికి తీసుకొచ్చి గుండెపోటుతో కోమాలోకి వెళ్లిపోయాడని డ్రామా ఆడారు.


ప్రీతి డబ్బు ఆశతోనే విజయ్‌ను హతమార్చిందని.. అతడు చనిపోయాక ఆ డబ్బుతో హాయిగా జీవించవచ్చనే అత్యాశతో ఈ హత్య చేసినట్లు తేల్చారు పోలీసులు. విజయ్‌ అనుమానాస్పద మృతి కేసును హత్య కేసుగా మార్చారు.. ప్రధాన నిందితురాలు ప్రీతి తండ్రి శంకరరావును అరెస్ట్ చేశారు. విజయ్‌ హత్య చోడవరంలో జరగడం, నిందితులు అనకాపల్లి జిల్లాకు చెందిన వాళ్లు కావడంతో ఈ కేసును చోడవరం సర్కిల్‌కు బదిలీ చేశారు. మిగిలిన నిందితుల్ని కూడా అరెస్ట్ చేస్తామన్నారు పోలీసులు. ప్రీతి కాల్ డేటా, విజయ్ పోస్ట్‌మార్టమ్ రిపోర్ట్ ఆధారంగా ఈ కేసు మిస్టరీ వీడింది. డబ్బుపై అత్యాశతో కట్టుకున్న భర్త విజయ్‌ను చంపేసి ప్రీతి తండ్రితో సహా జైలు పాలయ్యింది.. ఈ దంపతుల కుమార్తె ఇప్పుడు ఒంటరిగా మిగిలింది.







SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com