ట్రెండింగ్
Epaper    English    தமிழ்

తెలంగాణ భవన్‌లో దీక్షా దివస్‌.. ఎన్నికల స్క్వాడ్‌ అభ్యంతరం

Telangana Telugu |  Suryaa Desk  | Published : Wed, Nov 29, 2023, 06:46 PM

తెలంగాణ ఉద్యమ చరిత్రను మలుపుతిప్పిన రోజు నవంబర్ 29. మలిదశ తెలంగాణ ఉద్యమంలో కీలకఘట్టం, రాష్ట్ర ఏర్పాటుపై కేంద్రాన్ని కదిలించిన రోజు అది. 'కేసీఆర్ చచ్చుడో.. తెలంగాణ వచ్చుడో' అని సింహనాదం చేసి గులాబీ బాస్ కేసీఆర్ ఆమరణ నిరాహార దీక్షను చేపట్టిన చారిత్రక దినం. గత 14 ఏళ్లుగా తెలంగాణలో ప్రతి ఏటా నవంబర్ 29ని దీక్షా దివస్‌గా జరుపుంటున్నారు. రాష్ట్ర గతిని మలుపు తిప్పిన ఘట్టం దీక్షా దివస్‌ అని బీఆర్ఎస్ నేతలు అంటున్నారు. ఈ రోజున ప్రత్యేక కార్యక్రమాలకు పిలుపునిచ్చారు. అందులో భాగంగా తెలంగాణ భవన్‌లలో బీఆర్ఎస్ పార్టీ ఆధ్వర్యంలో దీక్షా దివస్‌ వేడుకలకు సిద్ధం కాగా.. కేంద్ర ఎన్నికల సంఘం (ఈసీ) స్క్వాడ్‌ అభ్యంతరం వ్యక్తం చేసింది.


తెలంగాణ ఎన్నికల ప్రచార గడువు ముగిసినందున పార్టీ కార్యాలయాల్లో ప్రచారం నిర్వహించొద్దని అధికారులు సూచించారు. అయితే దీక్షా దివస్‌ ఎన్నికల కార్యక్రమం కాదని బీఆర్ఎస్ నేతలు వెల్లడించారు. ఇది రాష్ట్ర కార్యక్రమని.. పార్టీకి సంబంధించినది కాదని.. తాము ఎన్నికల ప్రచారం నిర్వహించటం లేదని అన్నారు. బీఆర్ఎస్ శ్రేణులు, అధికారుల మధ్య వాగ్వాదంతో అక్కడ టెన్షన్ వాతావరణం ఏర్పడింది. ఈ క్రమంలో ఎన్నికల అధికారులతో బీఆర్ఎస్ ఎమ్మెల్సీ శంభీపూర్ రాజు, పార్టీ లీగల్ టీమ్‌కు చెందిన సోమ భరత్ సీపీతో చర్చలు జరిపారు. సుమారు రెండు గంటల పాటు జరిగిన సంప్రదింపుల తర్వాత తెలంగాణ భవన్ లోపల మాత్రమే కార్యక్రమం నిర్వహించుకోవాలని, తెలంగాణ తల్లి విగ్రహానికి సైతం పూలమాల వేయవద్దని అధికారులు సూచించారు. పార్టీ కార్యాలయంలో లోపలే రక్తదాన శిబిరం నిర్వహిస్తామని బీఆర్ఎస్ నేతలు చెప్పగా.. అందుకు ఎన్నికల అధికారులు అంగీకరించారు. అనంతరం బీఆర్ఎస్ కార్యనిర్వాహక అధ్యక్షుడు, మంత్రి కేటీఆర్‌ సహా ఇతర నేతలు తెలంగాణ భవన్‌లో రక్తదానం చేశారు.










SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com