ఇంటి రుణం కావాలా నాయనా...పోటీపడుతున్న బ్యాంకర్లు

మీకు ఇంటి రుణం కావాలా నాయనా అన్నట్లుగా రుణం ఇచ్చేందుకు బ్యాకర్లు పోటీపడుతున్నారు. ఎస్‌బీఐ సహా పలు బ్యాంకులు పోటీపడి మరీ చౌక వడ్డీకే హౌసింగ్ రుణాలు అందిస్తున్నాయి.  మీరు కొత్త ఇంటిని కొనుగోలు చేయాలని భావిస్తున్నారా? అయితే మీకు ఒక విషయాన్ని గుర్తు పెట్టుకోవాలి. హోమ్ లోన్ తీసుకొని ఇల్లు కొనుగోలు చేస్తే మీకు పలు రకాల ప్రయోజనాలు ఉంటాయి. ప్రస్తుతం అతితక్కువ వడ్డీ రేటుకే హోమ్ లోన్స్ లభిస్తున్నాయని చెప్పుకోవచ్చు. ఎస్‌బీఐ సహా పలు బ్యాంకులు పోటీపడి మరీ చౌక వడ్డీకే హౌసింగ్ రుణాలు అందిస్తున్నాయి. అందువల్ల ఇప్పుడు హోమ్ లోన్ తీసుకుంటే చౌక వడ్డీ రుణం పొందొచ్చు. అంతేకాకుండా హోమ్ లోన్ తీసుకోవడం వల్ల కలిగే మరో ముఖ్యమైన బెనిఫిట్ ట్యాక్స్ సేవింగ్. హోమ్ లోన్స్‌పై పలు రకాలుగా పన్ను మినహాయింపు ప్రయోజనాలు పొందొచ్చు. మొత్తంగా అయితే రూ. 5 లక్షల వరకు ట్యాక్స్ బెనిఫిట్ సొంతం చేసుకోవచ్చు. ఆదాయపు పన్ను చట్టంలోని సెక్షన్ 24బీ, సెక్షన్ 80సీ, సెక్షన్ 80ఈఈఏ వంటి వాటి కింద పన్ను మినహాయింపులు పొందొచ్చు. వీటన్నింటి ప్రకారం చూస్తే.. ఏకంగా రూ.5 లక్షల వరకు పన్ను తగ్గింపు బెనిఫిట్స్ లభిస్తాయి. సెక్షన్ 80సీ కింద చెల్లించిన రుణ మొత్తంపై రూ.1.5 లక్షలు మినహాయింపు పొందొచ్చు. అలాగే సెక్షన్ 24బీ కింద రుణంపై చెల్లించిన వడ్డీ మొత్తంపై రూ.2 లక్షలు మినహాయింపు వస్తుంది. ఇవి రెండూ కాకుండా సెక్షన్ 80ఈఈఏ కింద రుణ వడ్డీ మొత్తంపై మరో రూ.1.5 లక్షల వరకు అదనంగా పన్ను మినహాయింపు పొందొచ్చు. ఈ బెనిఫిట్ కేవలం మార్చి 31 వరకే ఉంటుంది. అందువల్ల మీరు ఇప్పుడు హోమ్ లోన్ తీసుకుంటే మొత్తంగా రూ. 5 లక్షల వరకు పన్ను తగ్గింపు సొంతం చేసుకోవచ్చు. అయితే మీరు సెక్షన్ 80ఈఈఏ కింద అదనపు పన్ను మినహాయింపు పొందాలంటే మాత్రం కొన్ని నిబంధనలను అనుసరించాల్సి ఉంటుంది. మీరు కొనుగోలు చేసే ఇంటి విలువ రూ.45 లక్షలు దాటకూడదు. అంతేకాకుండా ఇంటిని కొనుగోలు చేసిన దగ్గరి నుంచి ఐదేళ్ల వరకు విక్రయించకూడదు. ఇంటి కొనుగోలుదారుడి పేరుపై ఇతర ప్రాపర్టీలు ఉండకూడదు.