కార్యకర్త చెంపచెల్లుమనిపించిన డీకే శివకుమార్‌.. వీడియో వైరల్

ప్రస్తుతం దేశంలో లోక్‌సభ ఎన్నికలు జరుగుతున్న వేళ.. స్టార్ క్యాంపెయినర్లు తమకు కేటాయించిన నియోజకవర్గాల్లో విస్తృతంగా ప్రచారం చేస్తున్నారు. అయితే పెద్ద నేతలు తమ వద్దకు రావడంతో కొందరు కార్యకర్తలు అత్యుత్సాహం ప్రదర్శిస్తున్నారు. ఈ క్రమంలోనే ఎన్నికల ప్రచారానికి వెళఅలిన కర్ణాటక డిప్యూటీ సీఎం డీకే శివకుమార్‌కు ఊహించని అనుభవం ఎదురైంది. ఓ కార్యకర్త ఆయన భుజంపై చేయి వేయడంతో డీకే శివకుమార్‌ తీవ్ర ఆగ్రహానికి గురయ్యారు. దీంతో ఆ కార్యకర్త చెంపను చెల్లుమనిపించారు. అంతేకాకుండా అతడ్ని పక్కకు తోసేశారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.

కర్ణాటకలో మొత్తం 28 లోక్‌సభ స్థానాలు ఉన్నాయి. ఏప్రిల్ 26వ తేదీన 14 స్థానాలకు పోలింగ్ పూర్తి కాగా.. మిగిలిన 14 స్థానాలకు ఈ నెల 7 వ తేదీన ఎన్నికలు జరగనున్నాయి. ఇందులో భాగంగానే కాంగ్రెస్ పార్టీ తరఫున హావేరీ నియోజకవర్గంలో పోటీ చేస్తున్న వినోదా అసూటికి మద్దతుగా ప్రచారానికి వెళ్లారు. డీకే శివకుమార్‌కు స్వాగతం పలికేందుకు భారీగా కార్యకర్తలు తరలివచ్చారు. ఈ క్రమంలోనే డీకే శివకుమార్ కారు దిగి వస్తుండగా స్థానిక కాంగ్రెస్ నేత, మున్సిపల్ సభ్యుడు అల్లావుద్దీన్ మనియార్.. ఏకంగా ఆయన భుజంపై చేయి వేశాడు. దీంతో డీకే శివకుమార్ ఒక్కసారిగా అసహనానికి గురయ్యారు.

దీంతో వెంటనే అల్లావుద్దీన్ మనియార్ చెంపపై కొట్టాడు. అంతేకాకుండా అతడ్ని డిప్యూటీ సీఎం పక్కకు నెట్టేశారు. అది గుర్తించిన సెక్యూరిటీ సిబ్బంది కూడా అల్లావుద్దీన్‌ మనియార్‌ను వెనక్కి తోశారు. ఈ సంఘటనతో అల్లావుద్దీన్ మనియార్ ఒక్కసారిగా షాక్‌కు గురయ్యాడు. ఈ ఘటనకు సంబంధించిన వీడియో ప్రస్తుతం సోషల్ మీడియాలో తెగ వైరల్‌గా మారింది.

దేశవ్యాప్తంగా 7 విడతల్లో లోక్‌సభ ఎన్నికల పోలింగ్ జరుగుతోంది. ఇప్పటికే 2 విడతల్లో ఎన్నికలు ముగిశాయి. మూడో విడత మే 7, మే 13, 20, 25, జూన్ 1న వ తేదీన మిగిలిన దశ ఎన్నికలు జరగనున్నాయి. ఇక ఎన్నికల ఫలితాలు మాత్రం జూన్ 4 వ తేదీన విడుదల కానున్నాయి. కర్ణాటకలో కాంగ్రెస్ పార్టీ ఒంటరిగా పోటీ చేస్తుండగా.. బీజేపీ-జేడీఎస్ పార్టీలు కలిసి పోటీ చేస్తున్నాయి. ఈ క్రమంలోనే కర్ణాటకలో ఎంపీ ప్రజ్వల్ రేవణ్ణ, ఎమ్మెల్యే హెచ్‌డీ రేవణ్ణ సెక్స్ వీడియోల వ్యవహారంలో చిక్కుకున్నారు. ఈ కేసులో హెచ్‌డీ రేవణ్ణ అరెస్ట్ కాగా.. ప్రజ్వల్ రేవణ్ణ విదేశాలకు పారిపోయారు. అయితే కర్ణాటక డిప్యూటీ సీఎం డీకే శివకుమార్ కుట్ర చేసి వారిని ఇరికించారని మాజీ సీఎం కుమారస్వామి తీవ్ర ఆరోపణలు చేశారు.