ట్విస్ట్ ల మీద ట్విస్ట్ లు...ఈ వింత పెళ్లి చూశారా ఎక్కడైనా

కొన్ని వింత పెళ్లిళ్లులు..ట్విస్ట్ లతో కూడిన కథలు..పెళ్లిలు మనం సినిమాల్లోనే చూస్తుంటాం. కానీ నిజజీవితంలో కూడా ఇలాంటి జరుగుతాయని ఈ ఘటన రుజువు చేసింది. అంగరంగ వైభవంగా జరగాల్సిన వివాహం.. గందరగోళంగా మారింది. పెళ్లి చేసుకుని ఒకటవ్వాల్సిన వాళ్లు శత్రువులయ్యారు. వరుడు చేయిచేసుకోవడంతో పెద్ద గొడవ అయి పెళ్లి రద్దు అయింది. ఆ అమ్మాయి అప్పుడే వేరే వ్యక్తి నిపెళ్లి చేసుకుంది. అక్కడితో ఆ సమస్య అయిపోలేదు. వధువును కొట్టిన వరుడు ఆమెపై పోలీసులకు కంప్లైంట్ ఇచ్చాడు. పైగా పరిహారం కూడా డిమాండ్ చేస్తున్నాడు. తమిళనాడులో ఓ పెళ్లి వేడుకలో డ్యాన్స్ చేసినందుకు వరుడు కొట్టడంతో ఓ వధువు ఆ పెళ్లిని రద్దు చేసుకుంది. కడలూరు జిల్లా పన్రిటీ‌కి చెందిన వధువుకు పెరియకట్టు పాళయానికి చెందిన వరుడితో గతేడాది నవంబర్ 6న నిశ్చితార్థం అయింది. జనవరి 20న కడంపుల్యూర్ గ్రామంలో వారి పెళ్లి పెట్టుకున్నారు. అయితే ఆనందంగా జరగాల్సిన ఆ పెళ్లి రసాబాసాగా మారింది. వేడుకలో భాగంగా ముందురోజు వధువు ఆనందంగా డ్యాన్స్ వేసింది. అయితే వేరే వ్యక్తి చేతులు పట్టుకుని ఆమె డ్యాన్స్‌ వేయడంతో వరుడుకి కోపం వచ్చింది. వేదికపైకి ఎక్కి అందరి ముందు వధువు చెంపపై కొట్టాడు. వేరేవారితో ఎందుకు డ్యాన్స్ వేస్తున్నావ్ అంటూ ప్రశ్నించాడు. తనకు డ్యాన్స్ చేయాలనిపించి చేశానని ఆమె సమాధానం ఇచ్చింది. అలా వారి మధ్య వాగ్వాదం చోటుచేసుకుంది. అక్కడ గందరగోళ పరిస్థితి ఏర్పడింది. ఈ పరిణామంతో వధువు ఆ పెళ్లి వద్దని తన తల్లిదండ్రులకు చెప్పింది. ఎంత సర్దిచెప్పినా వినలేదు. దాంతో తల్లిదండ్రులు ఆ పెళ్లిని రద్దు చేసి.. తమ బంధువుల్లో వేరే వ్యక్తిని ఒప్పించి ముందు అనుకున్న ముహూర్తానికే ఆ అమ్మాయి పెళ్లి చేసేశారు. అయితే వధువును కొట్టిన వరుడు ఏ మాత్రం ఊరుకోలేదు. ఆ అమ్మాయికి వ్యతిరేకంగా ఫిర్యాదు చేశాడు. పన్రుటి మహిళా పోలీస్ స్టేషన్‌‌కు ఆమెపై కంప్లైంట్ ఇచ్చాడు. పెళ్లి ఏర్పాట్ల కోసం తన కుటుంబం రూ. ఏడు లక్షలు ఖర్చు చేసిందని, వధువు దగ్గర నుంచి నష్ట పరిహారం ఇప్పించాలని కోరాడు. వధువు బంధువులను తనపై దాడి చేశారని, తనను తిట్టారని కూడా ఫిర్యాదులో పేర్కొన్నాడు. వారి వల్ల తను అన్ని రకాలుగా నష్టపోయాానని పోలీసులకు చెప్పాడు.