ఐఫోన్ కోసం కిడ్నీ అమ్మాడు
international | Suryaa Desk | Published : Sat, Jan 05, 2019, 08:07 PM
స్మార్ట్‌ఫోన్లపై యువతకు ఉండే పిచ్చి గురించి ప్రత్యేకంగా చెప్పక్కర్లేదు. అత్యాధునిక ఫీచర్లున్న ఫోన్‌ను సొంతం చేసుకోవడానికి కొంత మంది యువకులు స్థాయికి మించి ప్రవర్తిస్తారు. ఈ క్రమంలో దొంగతనాలకు కూడా వెనుకాడటం లేదు. ఇక స్మార్ట్‌ఫోన్లలో ఐఫోన్లకు ఉన్న క్రేజ్ అంతా ఇంతా కాదు. చేతిలో ఐఫోన్ ఉంటే అదో పెద్ద స్టేటస్‌ అనుకుంటారు కొందరు. ఐఫోన్ కొనివ్వలేదని ఇంట్లో నుంచి పారిపోవడం, ఆత్మహత్యలు చేసుకోవడం లాంటి ఘటనల గురించి ఇంతకుముందు విన్నాం. కానీ, చైనాకు చెందిన ఓ యువకుడు ఐఫోన్ కోసం చేసిన పని చర్చనీయంగా మారింది.
చైనాకు చెందిన వాంగ్ అనే యువకుడు ఐఫోన్ కోసం ఏకంగా తన కిడ్నీనే అమ్ముకున్నాడు. ఫలితంగా జీవితాంతం మంచానికే పరిమితమయ్యే పరిస్థితి ఏర్పడింది. ఐఫోన్ కోసం వాంగ్ 2011లో తన కిడ్నీని 3,200 డాలర్లకు అమ్మేశాడు. ఆ డబ్బుతో ఐఫోన్ కొనుక్కుని మిగిలిన మొత్తంతో జల్సా చేశాడు. అయితే.. వాంగ్ కిడ్నీ తొలగించేటప్పుడు చేసిన సర్జరీ విజయవంతం కాలేదు. దీంతో ఇన్‌ఫెక్షన్‌ సోకి మరో కిడ్నీ కూడా పాడైపోయింది.
ఉన్న ఒక్క కిడ్నీ కూడా పాడవడంతో వాంగ్ పరిస్థితి దారుణంగా తయారైంది. బతికినంత కాలం డయాలసిస్‌ చేసుకోవాల్సి వస్తోంది. వాంగ్ తల్లిదండ్రుల పరిస్థితి అంతంతమాత్రమే. ఏడాది పాటు వాళ్లు అతడికి కష్టపడి డయాలసిస్‌ చేయించారు. మున్ముందు చికిత్స చేయించడానికి వారి వద్ద డబ్బు లేదు. చేయించకపోతే వాంగ్ బతకడు. దీంతో వారు తీవ్ర విషాదంలో కూరుకుపోయారు. ఈ వార్త సోషల్ మీడియాలో వైరల్‌ అవుతోంది.
|
|