పవన్ కళ్యాణ్‌కు గాయం.. అసలేమైంది

ఏపీ ఎన్నికల ప్రచారంలో బిజీగా ఉన్న జనసేన అధినేత పవన్ కళ్యాణ్ గాయపడ్డారు. పవన్ కళ్యాణ్ కాలికి గాయమైనట్లు తెలుస్తోంది. తిరుపతిలో జరిగే వారాహి విజయభేరి యాత్రలో పాల్గొనేందుకు పవన్ కళ్యాణ్ రేణిగుంట విమానాశ్రయానికి చేరుకున్నారు. విమానాశ్రయం లోపలి నుంచి బయటకు వచ్చే సమయంలో పవన్ కళ్యాణ్ కాలికి కట్టుతో కనిపించారు. బయటకు వచ్చే సమయంలో ఆయన కుడికాలి బొటనవేలుకు కట్టుతో కనిపించారు. అలాగే విమానాశ్రయం నుంచి కారులోకి వెళ్లే సమయంలో పవన్ కళ్యాణ్ చాలా నెమ్మదిగా నడుస్తూ వెళ్లారు. పవన్ కళ్యా్ణ్ కాలికి కట్టుతో ఉన్న ఫోటోలు, వీడియోలు వైరల్ అవుతున్నాయి. ఈ నేపథ్యంలో గాయం నుంచి పవన్ కళ్యాణ్ త్వరగా కోలుకోవాలంటూ ఆయన అభిమానులు కోరుకుంటున్నారు.

అయితే పవన్ కళ్యాణ్‌కు గాయం ఎలా తగిలిందనే దానిపై అటు పవన్ కళ్యాణ్ కానీ.. జనసేన పార్టీ కానీ ప్రకటన చేయలేదు. ఎన్నికల ప్రచారంలో ఉన్న పవన్ కళ్యాణ్ గతంలోనూ అస్వస్థతకు గురయ్యారు. పిఠాపురంలో ఎన్నికల ప్రచారం ఆరంభించిన కొత్తలో పవన్ కళ్యాణ్ జ్వరం బారిన పడ్డారు. దీంతో ప్రచారం ఆపి హైదరాబాద్ వచ్చిన పవన్ .. కోలుకున్న తర్వాత తిరిగి తన ఎన్నికల ప్రచారం కొనసాగించారు. అలాగే పవన్ కళ్యాణ్‌కు ఊపిరితిత్తుల్లో నెమ్ము చేరిందని.. గజమాలలు, ఫోటోల కోసం ఆయన్ని ఇబ్బంది పెట్టొద్దంటూ ఆ తర్వాత జనసేన కూడా అభిమానులకు విజ్ఞప్తి చేసింది. ప్రస్తుతం ఎన్నికల ప్రచారం ముగింపు దశకు చేరుకోవటంతో.. పవన్ విస్తృతంగా సభలు, సమావేశాలు నిర్వహిస్తున్నారు. ఇలాంటి సమయంలో పవన్ కాలికి గాయం కావటంతో త్వరగా కోలుకోవాలని అభిమానులు, జనసైనికులు ఆకాంక్షిస్తున్నారు.

ఇక పవన్ కళ్యాణ్ కోసం టాలీవుడ్ ఇండస్ట్రీ తరలివస్తోంది. పోలింగ్ తేదీ దగ్గర పడుతున్న కొద్దీ ఒక్కొక్కరుగా ఆయనకు మద్దతు తెలుపుతూ ముందుకు వస్తున్నారు. ఇవాళ ఉదయం మెగాస్టార్ చిరంజీవి.. పవన్ కళ్యాణ్‌ను గెలిపించాలంటూ వీడియో రిలీజ్ చేశారు. ఆ తర్వాత హీరోలు నాని, రాజ్ తరుణ్ , తేజా సజ్జా , రామ్ చరణ్ ఇలా పవన్ కళ్యాణ్‌ను గెలిపించాలని ట్వీట్లు చేశారు. ఎన్నికలకు మరో వారం రోజుల సమయం మాత్రమే ఉన్న నేపథ్యంలో వచ్చే రోజుల్ల మరికొంత మంది సినీ ప్రముఖులు కూడా పవన్‌ కళ్యాణ్‌కు మద్దతు ప్రకటించే అవకాశాలు కనిపిస్తున్నాయి.