అలిపిరి మార్గంలో బయటపడిన మృతదేహం,,,కేసు నమోదు

తిరుమల నడక మార్గంలో గుర్తుతెలియని వ్యక్తి మృతదేహం పడి ఉండట కలకలం రేగుతోంది. అలిపిరి మార్గంలోని నరసింహ స్వామి ఆలయం సమీపంలో మృతదేహాన్ని గుర్తించారు. రెండు రోజులుగా దుర్వాసన వస్తుండటంతో అక్కడి వ్యాపారులు అధికారులకు సమాచారం ఇచ్చారు. దీంతో టీటీడీ అధికారులకు అక్కడకు వెళ్లి చూడగా ఓ మృతదేహం కంటపడింది. ఆ మృతదేహం బాగా కుల్లిన స్థితిలో గుర్తుపట్టలేని విధంగా ఉంది. అయితే, దాని పక్కనే ఓ జింక కళేబరం కూడా పడి ఉంది. ఘటనా స్థలంలో ఒకే రకమైన నాలుగు జతలు చెప్పులు కూడా ఉన్నట్టు అధికారులు తెలిపారు.

ముఖ్యమంత్రి చంద్రబాబు నాయుడు తిరుమల పర్యటన నేపథ్యంలో నిర్వహించిన తనిఖీల సమయంలోనే మృతదేహం గుర్తించినట్టు తెలుస్తోంది. బాంబు స్క్యాడ్ తనిఖీలు నిర్వహిస్తున్నప్నుడే శవం బయటపడినట్టు సమాచారం. ఇక, మృతదేహం ఉన్న స్థితిని బట్టి పది రోజుల కిందటే ఘటన జరిగినట్టు భావిస్తున్నారు. ఈ ఘటనపై కేసు నమోదుచేసిన పోలీసులు.. దర్యాప్తు చేపట్టారు. ఎవరైనా హత్యచేసి అక్కడ పడేశారా? లేదా ఆత్మహత్య చేసుకున్నాడా? అనే కోణంలో పోలీసులు విచారిస్తున్నారు. అలాగే, అక్కడే జింక కళేబరం ఉండటంతో దీనికి ఏదైనా సంబంధం ఉందా? వన్యప్రాణాలను వేటాడానికి వచ్చారా? ఆ సమయంలోనే పొరపాటున అతడు చనిపోయాడా? అలాగే, అక్కడ ఉన్న నాలుగు జతల పాదరక్షలు ఎవరివి? అనేది తెలియాల్సి ఉంది. దీనిపై పోలీసులు, అటవీ శాఖ అధికారులు విచారిస్తున్నారు.

కాగా, అలిపిరి నడక మార్గంలో గతంలోనూ ఇటువంటి సంఘటనలు వెలుగులోకి వచ్చాయి. మూడేళ్ల కిందట ఓ సైనికుడు నరసింహ స్వామి వారి ఆలయం సమీపంలో చెట్టుకు ఉరేసుకుని.. ప్రాణాలు తీసుకున్నాడు. అక్కడ చెట్టుకు వేలాడుతున్న అస్థిపంజరం కొద్ది రోజుల తర్వాత గుర్తించారు. కాగా, రెండు నెలల కిందట చిత్తూరుకు చెందిన ఓ ప్రేమ జంట అలిపిరి మార్గంలో ఆత్మహత్యయత్నానికి ప్రయత్నించింది. పురుగులు మందు తాగి ఆత్మహత్యకు యత్నించగా.. శ్రీవారి దర్శనానికి వెళ్తున్న భక్తులు ఈ విషయాన్ని గమనించి వెంటనే టీటీడీ సిబ్బందికి సమాచారం ఇచ్చారు. దీంతో టీటీడీ సెక్యూరిటీ సిబ్బంది వేగంగా స్పందించి.. ఆత్మహత్యకు ప్రయత్నించిన ఇద్దరినీ కిందకు దించి ఆసుపత్రికి తరలించారు.