బంగాళాఖాతంలో అల్పపీడనం.. ఏపీలోని ఈ జిల్లాలలో వానలు

ఏపీలో మళ్లీ వానలు దంచికొట్టనున్నాయి. బంగాళాఖాతంలో అల్పపీడనం ఏర్పడింది. ఈ అల్పపీడనం ప్రభావంతో పశ్చిమ బెంగాల్ రాష్ట్రంతో పాటుగా ఆంధ్రప్రదేశ్, తెలంగాణల్లోనూ వర్షాలు కురుస్తాయని వాతావరణశాఖ అంచనా వేసింది. దీని ప్రభావంతో వచ్చే నాలుగు రోజులు ఏపీలో పలుచోట్ల మోస్తరు నుంచి భారీ వానలు పడతాయని వాతావరణశాఖ వెల్లడించింది. మరీ ముఖ్యంగా రాయలసీమ జిల్లాలలో పలుచోట్ల భారీ వర్షాలు కురిసే అవకాశం ఉందని హెచ్చరించింది. ఇక అల్పపీడనం ప్రభావంతో శనివారం పార్వతీపురం మన్యం జిల్లాతో పాటుగా అల్లూరి జిల్లా, విశాఖ, అనకాపల్లి, కాకినాడ, ఏలూరు, ప్రకాశం, కర్నూలు, నంద్యాల, శ్రీసత్యసాయి, వైయస్ఆర్ జిల్లా, అన్నమయ్య, చిత్తూరు, తిరుపతి జిల్లాల్లో పలుచోట్ల వర్షం కురుస్తోంది. ఆయా జిల్లాలలో తేలికపాటి నుంచి మోస్తరు వర్షాలు పడుతున్నాయి.

అయితే బంగాళాఖాతంలో ఏర్పడిన ఈ అల్పపీడనం ప్రభావంతో ఆదివారం కూడా పలు చోట్ల వర్షాలు కురుస్తాయని ఏపీ విపత్తుల నిర్వహణ సంస్థ అంచనా వేసింది. పార్వతీపురం మన్యం, అల్లూరి సీతారామరాజు జిల్లా, కాకినాడ, అంబేద్కర్ కోనసీమ జిల్లా, తూర్పు గోదావరి, ఏలూరు, పల్నాడు, ప్రకాశం, అన్నమయ్య, చిత్తూరు, తిరుపతి జిల్లాల్లో కొన్ని చోట్ల తేలికపాటి నుంచి మోస్తరు వర్షం కురుస్తుందని.. ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ వెల్లడించారు. శ్రీకాకుళం, విజయనగరం, విశాఖపట్నం, అనకాపల్లి, పశ్చిమ గోదావరి, ఏలూరు, కృష్ణా, ఎన్టీఆర్ జిల్లా , గుంటూరు, బాపట్ల, కర్నూలు, నంద్యాల, అనంతపురం, శ్రీసత్యసాయి, వైయస్ఆర్ జిల్లాలలో తేలికపాటి వర్షాలు కురుస్తాయని అంచనా వేశారు.

మరోవైపు ఈ అల్పపీడనంతో పాటుగా మరో అల్పపీడనం కూడా ఏర్పడుతుందని ప్రైవేట్ వాతావరణ సంస్థ స్కైమెట్ అంచనా వేసింది. అలాగే నైరుతి బంగాళాఖాతంలో ఏపీ, తమిళనాడు తీరాలకు సమీపంలో అక్టోబరు 7 లేదా 8 తేదీల్లో తుఫాను ఏర్పడుతుందని స్కైమెట్ అంచనా వేసింది. దీని ప్రభావంతో ఏపీలో వర్షాలు కురుస్తాయని తెలిపింది.

మరోవైపు తిరుమలలో శనివారం భారీ వర్షం కురిసింది. శనివారం మధ్యాహ్నం సమయంలో ఒక్కసారిగా తిరుమల కొండపై భారీ వర్షం కురిసింది. గంటన్నరపాటు కొండపై వర్షం కురవటంతో.. రహదారులు మొత్తం జలమయమయ్యాయి. ఆలయ పరిసరాల్లోకి సైతం వర్షం నీరు చేరింది. మాడవీధుల్లోనూ వర్షం నీరు చేరటంతో భక్తులు ఇబ్బందులు పడ్డారు, ఇక వర్షం కారణంగా శ్రీవారి దర్శనం కోసం వచ్చిన భక్తులు తడిసి ముద్దయ్యారు.