చైనాకు గట్టి ఎదురుదెబ్బ.. వుహాన్ పోర్టులో మునిగిపోయిన న్యూక్లియర్ సబ్‌మెరైన్‌

అణ్వాయుధ విస్తరణ కార్యకలాపాల్లో దూకుడుగా వ్యవహరిస్తోన్న డ్రాగన్‌కు ఊహించని ఎదురుదెబ్బ తగిలింది. చైనా ఎంతో ప్రతిష్ఠాత్మకంగా నిర్మిస్తోన్న అణు జలాంతర్గామి వుహాన్ పోర్టు వద్ద మునిగిపోయినట్టు అమెరికా నిఘా వర్గాలు వెల్లడించాయి. ఉపగ్రహాలు సేకరించిన ఫోటోలు, సమాచారం ద్వారా ఈ విషయాన్ని ధ్రువీకరించాయి. మాక్సర్ టెక్నాలజీస్‌ మార్చి 10న తీసిన శాటిలైట్ ఫోటోల ప్రకారం.. వుహాన్‌ సమీపంలోని షిప్‌యార్డ్ వద్ద ఈ జలాంతర్గామిని చైనా నిలిపిఉంచింది. మూడు నెలల తర్వాత జూన్‌ నాటి ఫోటోల్లో మాత్రం ఆ సబ్‌-మెరైన్ మళ్లీ తీరం వద్దకు తిరిగిరాలేదు. మే లేదా జూన్ నెలలో న్యూక్లియర్ సబ్‌మెరైన్ మునిగిపోయి ఉంటుందని పేర్కొంది.

‘‘ఇందులో ఎటువంటి ఆశ్చర్యం లేదు.. ఝౌ క్లాస్‌లోని తొలి జలాంతర్గామి తీరం సమీపంలో మునిగిపోయిందనే విషయాన్ని దాచిపెట్టేందుకు పీపుల్స్ లిబరేషన్ ఆర్మీ ప్రయత్నిస్తోంది’ అని అమెరికా రక్షణ శాఖకు చెందిన సీనియర్ అధికారి ఒకరు వ్యాఖ్యానించారు. ఇదిలా ఉండగా, మునిగిపోయిన ఝౌ-క్లాస్ అనేది చైనా న్యూక్లియర్-పవర్డ్ సబ్‌లలో మొదటిది. X-ఆకారంలో ఉండే విలక్షమైన ఈ జలాంతర్గామిని బహుళ ప్రయోజనాలకు కోసం రూపొందించింది. డ్రాగన్ ప్రభుత్వ రంగ సంస్థ చైనా స్టేట్ షిప్‌బిల్డింగ్ కార్పొరేషన్ దీనిని తయారుచేసింది. మే చివరవారంలో జల ప్రవేశానికి ముందు యాంగ్జీ నదిపై ఉన్న ఈ జలాంతర్గామి మిగిలిపోయిన పనులు పూర్తిచేస్తున్నట్టు గుర్తించారు.

కాగా, మునిగిపోయిన ఈ సబ్‌లో అణు ఇంధనం ఉండే అవకాశం ఉందని నిపుణులు భావిస్తున్నారు. అయితే ప్రాణనష్టం లేదా పర్యావరణ నష్టంపై ఎటువంటి నిర్ధారణ లేదు. ఒకవేళ, అందులో అణు ఇంధనం ఉండి ఉంటే.. పర్యావరణంపై తీవ్ర ప్రభావం చూపుతుంది. సముద్రంలో రేడియోధార్మికతతో జీవుల మనుగడకు ముప్పు తప్పదు. ఈ విషయంలో పీపుల్స్ లిబరేషన్ ఆర్మీ పారదర్శకత, సమర్థత, జవాబుదారీతనం గురించి అమెరికా ఆందోళన వ్యక్తం చేసింది. ప్రస్తుతం చైనా వద్ద 12 అణు, 48 డీజిల్ ఆధారిత జలాంతర్గాములు ఉన్నాయి. ఈ ప్రాంతంలో ముఖ్యంగా తైవాన్‌కు సంబంధించి అమెరికా ప్రభావాన్ని ఎదుర్కోవాలని, దక్షిణ చైనా సముద్రంలో ఆధిపత్యాన్ని ప్రదర్శించాలనే చైనా లక్ష్యంగా పెట్టుకుందని పెంటగాన్ నివేదించింది.