బంగ్లాదేశీ పోర్న్ స్టార్ ముంబైలో అరెస్ట్.. ఆ కేసులోనే కుటుంబం మొత్తం కూడా!

ఫేక్ సర్టిఫికేట్లతో భారత్‌లో అక్రమంగా నివసిస్తున్న బంగ్లాదేశీ పోర్న్ స్టార్ రియా బర్డేను మహారాష్ట్ర పోలీసులు అరెస్ట్ చేశారు. రియా బర్డేతోపాటు ఆమె సోదరి, సోదరుడిని కూడా అదుపులోకి తీసుకున్నారు. వారంతా బంగ్లాదేశ్ నుంచి ఇక్కడికి వచ్చి.. నకిలీ భారత పాస్‌పోర్ట్‌లతో నివాసం ఉంటున్నట్లు గుర్తించారు. మరోవైపు.. రియా బర్డే తల్లి.. బంగ్లాదేశ్ నుంచి వచ్చి.. మహారాష్ట్రకు చెందిన వ్యక్తిని పెళ్లి చేసుకున్నట్లు పేర్కొన్నారు. ఈ క్రమంలోనే రియా బర్డేతోపాటు తమ్ముడు, చెల్లికి నకిలీ ధ్రువపత్రాలు సృష్టించేందుకు ప్రయత్నాలు చేస్తున్నట్లు గుర్తించిన పోలీసులు వారిని అదుపులోకి తీసుకుని విచారణ జరుపుతున్నారు.

ముంబై ఉల్లాస్ నగర్‌లోని అంబర్‌నాథ్ ప్రాంతంలో నివసిస్తున్న రియా బర్డే కుటుంబాన్ని హిల్‌లైన్ పోలీసులు అదుపులోకి తీసుకున్నారు. వారి వద్ద న‌కిలీ ఇండియా పాస్‌పోర్టును గుర్తించి స్వాధీనం చేసుకున్నారు. వీరంతా బంగ్లాదేశ్ నుంచి వచ్చి మహారాష్ట్రలో హిందువులుగా నివసిస్తున్నట్లు పోలీసులు వెల్లడించారు. పోర్న్ ఇండస్ట్రీలో రియా బర్డే తన పేరును ఆరోహి బర్డే, బన్నా షేక్‌గా మార్చుకున్నట్లు పేర్కొన్నారు. పోర్న్, సీ గ్రేడ్ చిత్రాల్లో రియా బర్డే నటిస్తున్నట్లు పేర్కొన్నారు. వీరంతా నకిలీ పత్రాల ద్వారా భారత్‌లో నివాసం ఉంటున్నారనే సమాచారంతో అరెస్ట్ చేశారు. వీరిపై పలు సెక్షన్ల కింద కేసు నమోదు చేసి తరలించారు.

రియా బర్డే తల్లి బంగ్లాదేశీ అయినప్పటికీ.. భారత ధ్రువీకరణ పత్రాలను పొందడానికి మహారాష్ట్రలోని అమరావతికి చెందిన ఓ వ్యక్తిని కూడా వివాహం చేసుకున్నట్లు పోలీసుల విచారణలో వెల్లడైంది. ప్రస్తుతం రియా బర్డేతో పాటు ఆమె తల్లి అంజలి బర్డే అలియాస్ రూబీ షేక్.. తండ్రి అరవింద్ బర్డే, సోదరి రీతూ అలియాస్ మోనీ షేక్, సోదరుడు రవీంద్ర అలియాస్ రియాజ్ షేక్‌లను కూడా పోలీసులు ఈ కేసులో నిందితులుగా చేర్చి అరెస్ట్ చేశారు.

రియా బర్డే చాలా ప్రొడక్షన్ హౌస్‌లతో సంబంధం కలిగి ఉందని.. ఎన్నో పోర్న్ ఫిల్మ్స్‌లో నటించిందని పోలీసులు వెల్లడించారు. అయితే రియా బర్డే తల్లి రూబీ షేక్.. తాను పశ్చిమ బెంగాల్‌ వాసిని అని చెప్పి.. అమరావతికి చెందిన అరవింద్ బర్డేను పెళ్లి చేసుకున్నట్లు తెలిపారు. పెళ్లి తర్వాత నకిలీ బర్త్ సర్టిఫికేట్లతో పాటు.. ఇతర సర్టిఫికేట్లను వారంతా తయారు చేసుకున్నారని.. వాటిని ఆధారంగా చేసుకుని ఫేక్ ఇండియన్ పాస్‌పోర్టు కూడా పొందినట్లు తెలిపారు. రియా తల్లిదండ్రులు ప్రస్తుతం ఖతార్‌లో నివసిస్తున్నట్లు పోలీసులు విచారణలో గుర్తించారు. వ్యభిచారానికి సంబంధించిన కేసులో గతంలో రియా బర్డేను ముంబై పోలీసులు అరెస్ట్ చేసినట్లు వెల్లడించారు. రియా బర్డే బంగ్లాదేశ్‌కు చెందినదని.. అక్రమంగా భారత్‌లో నివసిస్తున్నట్లు ఆమె స్నేహితుడు ప్రశాంత్ మిశ్రాకు తెలియడంతో.. అతడు పోలీసులకు ఫిర్యాదు చేయగా.. ఈ మొత్తం వ్యవహారం బయటికి వచ్చింది.