పక్కనే ఉన్నా కమలా హారిస్ దగ్గరికి రాని తండ్రి

మరికొన్ని రోజుల్లో జరగనున్న అమెరికా అధ్యక్ష ఎన్నికల్లో హోరాహోరీ పోరు సాగనుంది. డెమోక్రాటిక్ పార్టీ తరఫున అధ్యక్ష అభ్యర్థిగా నిలిచిన ప్రస్తుత అమెరికా ఉపాధ్యక్షురాలు కమలా హారిస్.. మాజీ అధ్యక్షుడు, రిపబ్లికన్ పార్టీ అధ్యక్ష అభ్యర్థి డొనాల్డ్ ట్రంప్ కంటే ముందంజలో ఉన్నట్లు ప్రస్తుతం కొన్ని సర్వేల్లో వెల్లడి అవుతోంది. ఇప్పటివరకు డొనాల్డ్ ట్రంప్ ముందంజలో ఉండగా.. రేసులోకి కమలా హారిస్ వచ్చిన తర్వాత పరిస్థితులు మారిపోయాయి. ఈ నేపథ్యంలోనే నవంబర్ 5వ తేదీన జరగనున్న ఈ ఎన్నికల్లో కమలా, ట్రంప్ మధ్య తీవ్ర ఉత్కంఠ పోరు సాగనుందని అమెరికా రాజకీయ వర్గాలు, సర్వే సంస్థలు పేర్కొంటున్నాయి.

అయితే కమలా హారిస్‌కు తన తండ్రి డొనాల్డ్ జె హారిస్‌తో సంబంధాలు అంతంత మాత్రంగానే ఉన్నాయి. వైట్‌హౌస్‌కు సమీపంలోనే డొనాల్డ్ హారిస్ ఉంటున్నా.. ఆయన ఎన్నడూ తన కుమార్తెను కలవకపోవడం గమనార్హం. ఇక అమెరికా అధ్యక్ష బరిలో ఉన్న కమలా హారిస్‌ తరచూ తన తల్లిదండ్రుల గురించి ప్రస్తావిస్తూ ఉంటారు. ఏ విషయంలోనైనా భయపడకుండా ముందుకువెళ్లాలని తన తండ్రి చెప్పేవాడని ఇటీవల షికాగో డీఎన్‌సీ ప్రసంగంలో కమలా హారిస్ వెల్లడించారు. అయితే కమలా హారిస్ ప్రత్యర్థులు, మరీ ముఖ్యంగా డొనాల్డ్ ట్రంప్ లాంటి వారు.. మార్క్సిస్ట్‌ అయిన ఆమె తండ్రి నుంచే కమలా హారిస్ కమ్యూనిజాన్ని తన వంటబట్టించుకుందని తీవ్ర విమర్శలు కూడా చేస్తుంటారు. వైట్‌హౌస్‌లోని కమలా హారిస్ ఆఫీస్‌కు కేవలం చాలా దగ్గర్లోనే నివాసం ఉంటున్న డొనాల్డ్ హారిస్.. ఒక్కసారి తన కుమార్తెను చూడటానికి రాకపోవడంతో తండ్రీ-కుమార్తెలకు మాట్లాడుకోలేనంత దూరం ఉందన అర్థం అవుతోంది.

1938లో జమైకాలోని బ్రౌన్స్‌ టౌన్‌లో కమలా హారిస్ తండ్రి డొనాల్డ్‌ జె.హారిస్‌ పుట్టారు. ఆ తర్వాత లండన్‌కు వెళ్లి చదువుకున్న ఆయన.. అనంతరం కాలిఫోర్నియాకు వచ్చి పీహెచ్‌డీ పూర్తి చేశారు. 1962లో బెర్క్‌లీలో.. భారత్ నుంచి వెళ్లి క్యాన్సర్‌పై పరిశోధనలు చేస్తున్న కమలా హారిస్ తల్లి శామలాగోపాలన్‌ను తొలిసారి ఆయన కలిశారు. ఈ క్రమంలోనే వారిద్దరూ ప్రేమించుకుని పెళ్లి చేసుకోగా.. వారికి ఇద్దరు సంతానం పుట్టారు. పెద్ద కుమార్తె కమలా హారిస్ కాగా.. రెండో కుమార్తె మాయా హారిస్. ఇక కమలా హారిస్‌కు 7 ఏళ్ల వయసు ఉన్నపుడు ఆమె తల్లిదండ్రులు తీవ్ర విభేదాలతో విడిపోయారు. కమలా హారిస్ తన తల్లి వద్దే కెనడా, ఇల్లినాయిస్‌లలో పెరిగారు. ఆ తర్వాత కాలిఫోర్నియాకు వలస వెళ్లారు.

డొనాల్డ్‌ హారిస్‌ 1972లో స్టాన్‌ఫోర్డ్‌ యూనివర్సిటీలో ఎకనామిక్స్ ప్రొఫెసర్‌గా పనిచేశారు. అయితే ఆయనకు మార్క్సిస్ట్‌ ఎకానమిస్ట్‌గా పేరు ఉండేది. ఆ తర్వాత కొన్నేళ్ల పాటు విస్కన్సిన్‌ యూనివర్సిటీలో కూడా పని చేశారు. ఆ తర్వాత 1998లో టీచింగ్‌ నుంచి రిటైర్ అయ్యారు. అయితే 2020 లో తన కుమార్తె కమలా హారిస్‌.. అమెరికా ఉపాధ్యక్షురాలు అయినప్పటికీ.. డొనాల్డ్ హారిస్ నుంచి ఎలాంటి స్పందన రాలేదు. ఇక తన కుమార్తె ప్రస్తావనను కూడా ఆయన ఎక్కడా తీసుకురారు. ఇక 2009లో కమలా హారిస్ తల్లి శ్యామలా గోపాలన్ పేగు క్యాన్సర్‌తో చనిపోయారు.