2492 క్యారెట్ల వజ్రం లభ్యం.. ప్రపంచంలోనే రెండో అతిపెద్దది

ప్రపంచంలోనే రెండో అతిపెద్ద వజ్రాన్ని తాజాగా వెలికితీశారు. ఆ వజ్రం 2492 క్యారెట్ల బరువు ఉన్నట్లు అధికారులు వెల్లడించారు. బోట్స్‌వానాలోని కరోవే గనిలో ఈ వజ్రాన్ని.. కెనడాకు చెందిన లుకారా డైమండ్ కార్పొరేషన్ అనే సంస్థ.. కనుగొంది. ఇది ప్రపంచంలోనే ఇది రెండో అతిపెద్ద వజ్రమని లుకారా డైమెండ్‌ కార్పొరేషన్‌ గురువారం ఒక ప్రకటన విడుదల చేసింది. కరోవే గనిలో ఏర్పాటు చేసిన ఎక్స్‌-రే డిటేక్షన్‌ టెక్నాలజీ ఆధారంగా ఈ వజ్రాన్ని గుర్తించినట్లు ఆ సంస్థ పేర్కొంది. అయితే ఈ భారీ వజ్రం విలువ, నాణ్యతకు సంబంధించిన వివరాలను మాత్రం ఆ సంస్థ వెల్లడించలేదు. ఈ అతి పెద్ద 2492 క్యారెట్ల వజ్రాన్ని కనుగొనడం ఎంతో సంతోషంగా ఉందని లుకారా డైమండ్ కార్పొరేషన్‌ అధ్యక్షుడు విలియం లాంబ్‌ పేర్కొన్నారు.

1905లో దక్షిణాఫ్రికాలో వెలికితీసిన 3106 క్యారెట్ల కల్లినల్‌ వజ్రమే ఇప్పటివరకు ప్రపంచంలోనే అతి పెద్ద వజ్రంగా నిలిచింది. అయితే తాజాగా లభించిన ఈ వజ్రం.. రెండో అతిపెద్దదిగా నిలిచినట్లు లుకారా డైమండ్ కార్పొరేషన్ తెలిపింది. ఈ కల్లినల్ వజ్రాన్ని 9 ముక్కలు చేశారని.. వీటిలో కొన్ని జెమ్స్‌ బ్రిటిష్‌ క్రౌన్‌ ఆభరణాల్లో ఉన్నాయని తెలిపింది. ప్రపంచంలో అధికంగా వజ్రాలను ఉత్పత్తి చేసే దేశాల్లో బోట్స్‌వానా ఒకటి కావడం గమనార్హం. అంతేకాకుండా ఇటీవల వెలికి తీసిన ప్రపంచంలోని అతి పెద్ద వజ్రాలు.. బోట్స్‌వానాలోనే బయటపడ్డాయి. ఇదే కరోవే గనిలో 2019లో దొరికిన 1758 క్యారెట్ల సెవెలో వజ్రం ఇప్పటి వరకు రెండో అతి పెద్ద వజ్రంగా రికార్డుల్లో ఉండేది. ఈ సెవెలో వజ్రాన్ని ఫ్రెంచ్‌ ఫ్యాషన్‌ హౌస్‌ లూయిస్‌ వుయిట్టన్‌ కొనుగోలు చేసింది. తాజాగా బయటపడిన వజ్రం ఆ రికార్డును అధిగమించింది.

బోట్స్‌వానా రాజధానికి 500 కిలోమీటర్ల దూరంలో ఉన్న కరోవీ గనిలో ఈ 2492 క్యారెట్ల వజ్రం దొరికింది. దీంతో తమ దేశంలో ఇప్పటివరకు దొరికిన వజ్రాల్లో ఇదే అతి పెద్దదని బోట్స్‌వానా ప్రభుత్వం ప్రకటించింది. ఇక ప్రపంచ వజ్రాల ఉత్పత్తిలో బోట్స్‌వానాది 20 శాతం వాటా ఉంది. ఎక్స్‌-రే డిటేక్షన్‌ టెక్నాలజీ ఆధారంగా ఈ వజ్రాన్ని గుర్తించినట్లు లుకారా డైమండ్ కార్పొరేషన్ తెలిపింది. 2017 నుంచి ఈ టెక్నాలజీని వాడుతున్నామని.. ఈ టెక్నాలజీ వల్ల వజ్రాలను గుర్తించడంతో పాటు వాటిని విరిగిపోకుండా వెలికితీయవచ్చని పేర్కొంది. ఇక 2016 లో బోట్స్‌వానాలో దొరికిన 1109 క్యారెట్ల వజ్రాన్ని లండన్‌కు చెందని ఆభరణాల సంస్థ లారెన్స్ గ్రాఫ్ 5.3 కోట్ల డాలర్లకు (భారతీయ కరెన్సీలో సుమారు రూ. 444 కోట్లకు) కొనుగోలు చేసింది. ఇప్పుడు దానికి రెట్టింపు బరువు ఉన్న ఈ వజ్రం.. ఎంత ధరకు అమ్ముడుపోతుందోనని తీవ్ర ఆసక్తి నెలకొంది.