వయనాడ్‌లో ప్రియాంక గాంధీకి పోటీగా బీజేపీ నుంచి మెకానికల్ ఇంజనీర్

ప్రస్తుతం దేశవ్యాప్తంగా మహారాష్ట్ర, ఝార్ఖండ్ అసెంబ్లీ ఎన్నికల ఫీవర్ నడుస్తోంది. వీటితో పాటు దేశవ్యాప్తంగా పలుచోట్ల ఉపఎన్నికలు జరుగుతున్నాయి. అయితే అన్నింటికంటే ముఖ్యంగా కేరళలోని వయనాడ్ లోక్ సభ నియోజకవర్గం ఉపఎన్నికపై అందరి దృష్టి నెలకొంది. కాంగ్రెస్ ముఖ్య నేత రాహుల్ గాంధీ ప్రాతినిథ్యం వహించిన నియోజకవర్గమనే కారణం ఒకటైతే.. ఆయన రాజీనామాతో జరుగుతున్న వయనాడ్ ఉపఎన్నికలో రాహుల్ గాంధీ సోదరి.. ప్రియాంకా గాంధీ వాద్రా పోటీ చేస్తుండటం మరో కారణం. అయితే వయనాడ్ ఉపఎన్నికల బరిలో ప్రియాంక గాంధీని ఢీకొట్టే బీజేపీ నేత ఎవరనే ఊహాగానాలకు కమలదళం తెరదించింది. ఇప్పటికే అనేక పేర్లు ప్రచారంలోకి రాగా.. బీజేపీ మాత్రం నవ్య హరిదాస్ అనే మహిళా నేతను ప్రియాంక గాంధీ మీదకు పోటీకి దించుతోంది. వయనాడ్ లోక్‌సభ ఉపఎన్నికల పోలింగ్ నవంబర్ 13న జరగనుండగా.. ఫలితాలు నవంబర్ 23న వెలువడతాయి.

ఇక ప్రియాంక గాంధీ మీదకు బీజేపీ బరిలోకి దింపుతున్న నవ్య హరిదాస్ ఎవరనే విషయాలను గమనిస్తే.. నవ్య హరిదాస్ ఓ మెకానికల్ ఇంజనీర్. 2007లో కాలికట్ యూనివర్సిటీ పరిధిలోని కేఎంసీటీ ఇంజనీరింగ్ కాలేజ్ నుంచి మెకానికల్ ఇంజనీరింగ్‌లో బీటెక్ పట్టా పొందారు. అసోసియేషన్ ఫర్ డెమొక్రటిక్ రిఫార్మ్స్ లెక్కల ప్రకారం నవ్య హరిదాస్ మీద ఎలాంటి క్రిమినల్ కేసులు లేవు. అలాగే రూ.1,29,56,264 ఆస్తులు.. రూ.1,64,978 అప్పులు ఉన్నాయి. ఆమె ట్విటర్ ప్రొఫైల్ ప్రకారం నవ్య హరిదాస్.. కోజికోడ్ కార్పొరేషన్ కౌన్సిలర్‌గా పనిచేశారు. ప్రస్తుతం బీజేపీ మహిళా మోర్చా రాష్ట్ర ప్రధాన కార్యదర్శిగా కొనసాగుతున్నారు. అలాగే ఆమె ఫేస్‌బుక్ పేజీ పరిశీలిస్తే.. బీజేపీ పార్లమెంటరీ పార్టీ నేతగా. బీజేఎంఎం స్టేట్ జనరల్ సెక్రటరీగా పేర్కొన్నారు.

మరోవైపు వయనాడ్ లోక్‌సభ ఉపఎన్నికలో ఎల్డీఎఫ్ ఇప్పటికే సీపీఐ లీడర్ సత్యన్ మోకేరీ పేరును ప్రకటించింది. కోజికోడ్ జిల్లా నడపురం నియోజకవర్గం నుంచి సత్యన్ గతంలో ఎమ్మెల్యేగా గెలుపొందారు. అలాగే వయనాడ్ లోక్‌సభ స్థానానికి గతంలో పనిచేసిన అనుభవం కూడా ఆయనకు ఉంది. 2014 ఎన్నికల్లో వయనాడ్ నుంచి పోటీచేసిన సత్యన్.. కాంగ్రెస్ అభ్యర్థి షాన్వాజ్ మెజారిటీని భారీగా తగ్గించగలిగారు. ఇటీవల జరిగిన సార్వత్రిక ఎన్నికల్లో రాహుల్ గాంధీ వయనాడ్, రాయ్ బరేలీ నుంచి పోటీ చేసి గెలుపొందారు. అనంతరం ఆయన వయనాడ్ ఎంపీ పదవికి రాజీనామా చేయడంతో ఉపఎన్నిక అనివార్యమైంది. మరోవైపు వయనాడ్ అభ్యర్థితో పాటుగా అస్సాం, బిహార్, ఛత్తీస్‌గఢ్, కర్ణాటక, కేరళ, మధ్యప్రదేశ్, రాజస్థాన్, పశ్చిమ బెంగాల్ రాష్ట్రాల్లో జరగనున్న శాసనసభ ఉపఎన్నికలకు కూడా బీజేపీ అభ్యర్థులను ప్రకటించింది.