డీఎస్పీని కారుతో ఢీకొట్టి పారిపోయే యత్నం.. వాహనంలో ఏముందని ఆరా తీస్తే!

నెల్లూరు జిల్లాలో ఓ యువకుడు రెచ్చిపోయాడు.. డీఎస్పీని కారుతో ఢీకొట్టాడు. శుక్రవారం అర్ధరాత్రి దాటిన తర్వాత వెంకటాచలం టోల్‌ ప్లాజా దగ్గర నెల్లూరు రూరల్ డీఎస్పీ ఘట్టమనేని శ్రీనివాసరావు ఆధ్వర్యంలో పోలీసులు వాహన తనిఖీలు చేపట్టారు. ఇంతలో నెల్లూరు నుంచి చెన్నై వైపు వెళ్తున్న కారును డీఎస్పీ ఆపే ప్రయత్నం చేయగా.. డ్రైవర్‌ కారుతో శ్రీనివాసరావును ఢీకొట్టి పరారయ్యాడు. ఈ ప్రమాదంలో గాయపడిన డీఎస్పీని నెల్లూరులోని ఓ ప్రైవేటు ఆసుపత్రికి తరలించి వైద్యం అందిస్తున్నారు.

వెంటనే పోలీసులు రంగంలోకి దిగారు.. తప్పించుకున్న ఆ యువకుడి కోసం గాలించారు. ఎట్టకేలకు శనివారం ఉదయం కారును నెల్లూరు జిల్లా సరిహద్దు ప్రాంతమైన మర్రిపాడు దగ్గర స్వాధీనం చేసుకున్నారు. అయితే యువకుడి ఆచూకీ మాత్రం దొరకలేదు.. అతడి కోసం గాలిస్తున్నారు. పోలీసులు స్వాధీనం చేసుకున్న కారులో ఏమున్నాయి అన్నది గోప్యంగా ఉంచారు. అయితే ఆ కారులో నిషేధిత పదార్థాలు తరలిస్తున్నట్లు అనుమానాలు వ్యక్తమవుతున్నాయి. ఈ ప్రమాదంలో డీఎస్పీకి గాయాలు కావడంతో పోలీసులు సీరియస్‌గా తీసుకున్నారు. నిందితుడ్ని త్వరలోనే పట్టుకుంటామన్నారు. అయితే మరో వాదన కూడా వినిపిస్తోంది.. ఈ కారులో వెళ్తున్న వారిలో ఒకర్ని పోలీసులు అదుపులోకి తీసుకోగా, మరో ముగ్గురు పరారయ్యారని చెబుతున్నారు. దీనిపై క్లారిటీ రావాల్సి ఉంది.

ఈ ఘటన గురించి తెలియగానే సర్వేపల్లి ఎమ్మెల్యే ఎమ్మెల్యే సోమిరెడ్డి చంద్రమోహన్‌ రెడ్డి ఆస్పత్రిలో చికిత్సపొందుతున్న డీఎస్పీని పరామర్శించారు. ఆరోగ్య పరిస్థితిపై ఆరా తీసి.. మెరుగైన వైద్యం అందించాలని డాక్టర్లకు సూచించారు. గంజాయి, డ్రగ్స్‌ అక్రమ రవాణాను సీఎం చంద్రబాబు దృష్టికి తీసుకెళ్తానన్నారు సోమిరెడ్డి. ఏకంగా ఓ డీఎస్పీని కారుతో ఢీకొట్టి హత్యాయత్నానికి పాల్పడటం దారుణమని.. డీఎస్పీని ఢీకొట్టి గంజాయి ముఠా అరాచకానికి ఒడిగట్టింది అన్నారు. కూటమి ప్రభుత్వంలో గంజాయి ముఠాల ఆగడాలను ఎట్టి పరిస్థితుల్లోనే ఉపేక్షించేది లేదని.. కచ్చితంగా తీవ్రంగా శిక్షిస్తామన్నారు.

నెల్లూరులో దారుణం జరిగింది.. పట్టాలు దాటుతుండగా ప్రమాదవశాత్తు రైలు ఢీకొని గుర్తుతెలియని వ్యక్తి చనిపోయారు. కొండాయపాలెం రైల్వేగేటు సమీపంలో ఈ ఘటన జరిగింది. వెంటనే సమాచారం అందుకున్న నెల్లూరు రైల్వే పోలీసులు సంఘటనా స్థలానికి చేరుకుని మృతదేహాన్ని పరిశీలించారు. మృతుని దగ్గర ఎలాంటి ఆధారాలు లభ్యం కాలేదు.