వైసీపీ నేత జోగి రమేష్‌కు షాకుల మీద షాకులు.. పోలీసుల నోటీసులు

అగ్రిగోల్డ్ భూముల విక్రయానికి సంబంధించి వైసీపీ నేత, మాజీ మంత్రి జోగి రమేష్ కుమారుడు రాజీవ్‌ను మంగళవారం ఉదయం అదుపులోకి తీసుకున్నారు. తాజాగా ప్రస్తుత ముఖ్యమంత్రి, టీడీపీ అధినేత నారా చంద్రబాబు నాయుడు ప్రతిపక్షంలో ఉన్న సమయంలో ఆయన ఇంటిపై దాడి కేసులో జోగి రమేష్‌కు పోలీసులు నోటీసులు జారీ చేశారు. విచారణకు రావాలంటూ మంగళగిరి పోలీసులు జోగి రమేష్‌కు నోటీసులు ఇచ్చారు. మంగళవారం సాయంత్రం డీఎస్సీ కార్యాలయంలో హాజరుకావాలని స్పష్టం చేశారు.

  మరోవైపు అగ్రిగోల్డ్ భూముల వ్యవహారంలో అక్రమాలకు పాల్పడ్డారంటూ జోగి రమేష్ తనయుడు జోగి రాజీవ్‌ను మంగళవారం ఉదయం సీఐడీ అధికారులు అదుపులోకి తీసుకున్నారు. అయితే తాజా ఏసీబీ కూడా ఎఫ్ఐఆర్ నమోదు చేసింది. ఈ కేసులో ప్రాథమిక దర్యాప్తు నివేదిక  నమోదు చేసిన ఏసీబీ.. ఏ1గా జోగి రాజీవ్, ఏ2గా జోగి వెంకటేశ్వరరావు పేరును చేర్చింది. అలాగే గ్రామ సర్వేయర్ దేదీప్య, మండల సర్వేయర్ రమేష్, నున్న సబ్ రిజిస్ట్రార్‌లను ఈ కేసులో నిందితులుగా చేర్చారు. మరోవైపు అవ్వ వెంకట శేషు నారాయణ అనే వ్యక్తి ఫిర్యాదు మేరకు ఆగస్ట్ 8న పోలీసులు కేసు నమోదు చేశారు. దర్యాప్తు జరిపి నివేదికను డీజీపీకి గతంలోనే సమర్పించారు. గ్రామ, మండల సర్వేయర్లు అక్రమాలకు పాల్పడి తప్పుడు సర్వే చేసినట్లు నివేదికలో స్పష్టం చేశారు. ఈ నివేదిక ఆధారంగా కేసు నమోదు చేసిన ఏసీబీ.. ఏ1గా జోగి రాజీవ్, ఏ2గా జోగి వెంకటేశ్వరరావులను చేర్చింది.

మరోవైపు రాజీవ్ అరెస్ట్ మీద మాజీ మంత్రి జోగి రమేష్ స్పందించారు. టీడీపీకి తనపై కక్ష ఉంటే అది తనమీదే తీర్చుకోవాలి కానీ.. తన కొడుకును అరెస్ట్ చేయడం న్యాయం కాదని అన్నారు. అమెరికాలో చదువుకుని తన ఉద్యోగం తాను చేసుకుంటున్న జోగి రాజీవ్‌ను అరెస్ట్ చేయడం అన్యాయం అని మండిపడ్డారు. కక్షసాధింపు చర్యలు దుర్మార్గమన్న జోగి రమేష్.. ప్రభుత్వాలు మారుతుంటాయని.. ఇలాంటి కక్షసాధింపు చర్యలు సరికాదని అన్నారు. అగ్రిగోల్డ్ భూములు అటాచ్‌మెంట్లో ఉన్నాయని.. అలాంటి భూములను ఎవరైనా కొంటారా అని ప్రశ్నించారు. తప్పు చేసినట్లు తేలితే ఉరేసుకుంటానన్న జోగి రమేష్.. దీనిపై న్యాయపోరాటం చేస్తామని అన్నారు.